Адыгэ Республикэм и ЛIышъхьэу КъумпIыл Мурат сэкъатныгъэ зиIэхэм азыфагу щызэхащэрэ республикэ зэнэкъокъум илауреат хъугъэхэм тыгъуасэ афэгушIуагъ, къалэжьыгъэхэр аритыжьыгъэх. Хабзэ зэрэхъугъэу сэкъатныгъэ зиIэхэм я Дунэе мафэ ехъулIэу мы Iофтхьабзэр зэхащэ.

ШIухьафтыным икъыдэхын хэлэжьэнхэу нэбгырэ 28-мэ ятхылъхэр ащ фэгъэ­зэгъэ комиссием къырахьылIагъэх. Дипломхэр ыкIи Адыгеим ыцIэкIэ щыт шIухьафтынхэр сэкъатныгъэ зиIэ нэбгыри 10-мэ афагъэшъошагъэх: Игорь Патрия, Роман Катасоновым, Даур Светланэ, Аида Стрикачевам, Виктор Усачевым, Кам Заурбый, Къоджэшъэо Миланэ, Любовь Шевченкэм, Дмитрий Угрехелидзе, Унэрэкъо Нэфсэт.

Гъэсэныгъэм ыкIи шIэныгъэм, литературэм ыкIи искусствэм, техническэ ыкIи лъэпкъ творчествэм, физическэ культурэм ыкIи спортым, общественнэ IофшIэным алъэныкъокIэ ахэм текIоныгъэхэр къыдахыгъэх. КъумпIыл Мурат ежь ышъхьэкIэ ахэм афэгушIуагъ, щыIэныгъэм чанэу зыкъызэрэщагъэлъагъорэм фэшI афэрэзагъ. Джащ фэдэу Адыгеим и ЛIышъхьэ ипшъэрылъкIэ шIухьафтынэу аратырэм пылъ ахъщэм хагъэхъуагъ, сомэ мин 30 хъущтыгъэти 50-м нагъэсыгъ, ар нэбгырэ пэпчъ раты. — Къиныгъохэм шъуяолIагъ нахь мышIэми, еджэным, творчествэм, медицинэм, гъэсэныгъэм ыкIи спортым алъэныкъокIэ гъэхъэгъэшIухэр шIушIынхэ шъулъэкIыгъ. Сэнаущыгъэ зыхэлъ шъощ фэдэ ныбжьыкIэхэр зэрэтиIэхэм тырэгушхо. БэхэмкIэ шъо шъущысэтехыпI. Сыдигъуи къыжъуготхэ шъуянэ-шъуятэхэм, шъуи­кIэлэегъаджэхэм тхьашъуе­гъэпсэу ясэIо. Къэралыгъор, обществэр IэпыIэгъу къышъуфэ­хъунхэм зэрэфэхьазырхэр шъушIэ­нэу сыфай. ЩыIэны­гъэм илъэныкъо зэфэшъхьаф­хэмкIэ гъэхъагъэу шъуиIэхэр тэркIэ мэхьанэшхо зиIэ зэфэ­хьысыжь, — къыIуагъ АР-м и ЛIышъхьэ.

КъумпIыл Мурат къызэрэхигъэщыгъэм­кIэ, карантиным илъэхъан цIыфхэр чIыпIэ къин ифагъэх. Мыщ фэдэ уахътэм гумэкIыгъо зиIэ цIыфхэр язакъоу къэмы­нэнхэм хэбзэ къулыкъухэм амалэу яIэр рахьылIагъ. Социальнэ къулыкъухэм, волонтерхэм, партиеу «Единэ Россием» хэтхэм, ОНФ-м илIыкIохэм яшIогъэшхо къагъакIо, гъомылапхъэхэр, Iэзэгъу уцхэр цIыфхэм аIэкIагъахьэх, психологическэ IэпыIэгъу арагъэгъоты. Джащ фэдэу Адыгеим ипредпринимательхэм, цIыф къызэрыкIохэм алъэкI къагъанэрэп.

Iофтхьабзэм хэлажьэхэрэр республи­кэм ипащэ къыфэрэзагъэх ыкIи предложение заулэ къахьыгъ. Iэрыфэгъу щыIакIэр гъэпсыгъэнымкIэ Iофэу ашIагъэми къэзэрэугъоигъэхэр тегущыIагъэх. Нэшъухэм ыкIи дэеу зылъэгъухэрэм ящыкIэгъэ тхьапэхэр агъэхьазырынхэмкIэ IэпыIэгъу афэхъугъэныр хэбзэгъэуцугъэ шапхъэу щытын зэрэфаем КъумпIыл Мурат дыригъэштагъ.

— Пшъэрылъ шъхьаIэу тиIэр республикэм щыпсэухэрэм зэкIэми зэфэдэ амалхэр яIэнхэм тыкъыфэкIоныр ары. ТэркIэ мэхьанэшхо иI сэкъатныгъэ зиIэхэм зэрэухъумагъэхэр зэха­шIэныр, гухэлъэу яIэхэр щыIэныгъэм щыпхыращын алъэкIыныр. Iэрыфэгъу щыIакIэм игъэ­псын лъытэгъэкIуатэ, реабилитацием ыкIи Iэзэгъу уцхэм япхыгъэ Iофыгъохэр зэшIотэ­хых, мы купым хахьэхэрэр спортым, общественнэ щыIакIэм чанэу ахэлэжьэнхэ алъэкIыным тыпылъ, — къыхигъэщыгъ Адыгеим и ЛIышъхьэ.

МыщкIэ Iофышхо зыгъэцэкIэрэ сэкъат­ныгъэ зиIэхэм яшъолъыр общественнэ организациехэм республикэм ипащэ афэрэзагъ. Мы IофшIэным общественникхэр къыхэгъэлэжьэгъэнхэ зэрэфаер, УФ-м и Президентэу Владимир Путиным ащ мэхьанэшхо зэрэритырэр хигъэунэфыкIыгъ.

Сэкъатныгъэ зиIэхэм я Дунэе мафэ фэгъэхьыгъэ Iофтхьабзэхэм къадыхэлъы­тагъэу оргтехникэ зэрагъэгъотынымкIэ общественнэ организациихмэ сертификатхэр аратыгъэх.

АР-м и ЛIышъхьэ ипресс-къулыкъу.