Адыгеим и ЛIышъхьэ Оперативнэ штабым изэхэсыгъо зэрищагъ
Коронавирусым пэуцужьыгъэнымкIэ Оперативнэ штабым изэхэсыгъо видеоконференцие шIыкIэм тетэу Адыгеим и ЛIышъхьэу КъумпIыл Мурат тыгъуасэ зэрищагъ.
Коронавирусым епхыгъэу колл-гупчэм иIофшIэн зэхэщэгъэнымкIэ республикэм и ЛIышъхьэ пшъэрылъэу къафишIыгъэхэр зэрагъэцакIэхэрэм афэгъэхьыгъэу Адыгэ Республикэм ивице-премьерэу Наталья Широковам къыIотагъ. Номерэу 8(8772) 210-301-мкIэ линие 50-мэ непэ Iоф ашIэ. Федеральнэ номер зыкIэу 122-мкIи цIыфхэм закъыфагъэзэн алъэкIы. ПЦР-анализэу атыгъэхэм якIэуххэмкIэ цIыфхэм макъэ ягъэIужьыгъэным волонтерхэр – апшъэрэ еджапIэхэм ястудентхэр, кIэлэеджакIохэр къыхагъэлажьэх.
«УплъэкIунхэмкIэ ГъэIорышIапIэм пшъэрылъ фэсэшIы «линие плъырхэм» Iоф зэрашIэрэр ыуплъэкIунэу. ИщыкIагъэу зыхъурэм Урысые политикэ партиеу «Единэ Россием» ишъолъыр къутамэ, АР-мкIэ ОНФ-м, общественнэ организациехэм, ныбжьыкIэ объединениехэм ялIыкIохэр IэпыIэгъу къызфэжъугъэхъух. Амбулаторнэ сымаджэхэм Iэзэгъу уцхэр зэрафахьыхэрэм, коронавирусыр къызэузыгъэхэм япсауныгъэ изытет шъуалъыплъэным мэхьанэшхо иI», — къыIуагъ КъумпIыл Мурат.
Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднемрэ Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустемрэ зэпахырэ узымкIэ республикэм иIофхэм язытет къытегущыIагъэх.
Ковидыр къызэутэлIагъэхэм Iэзэгъу уцхэу арахьылIэщтхэм яIэпэчIэгъанэхэр стационархэм аIэкIэлъых. НепэкIэ госпиталищмэ нэбгырэ 920-мэ ащяIэзэнхэ алъэкIыщт. Тыгъэгъазэм и 15-м ехъулIэу къэлэ сымэджэщым джыри чIыпIэ 260-рэ щагъэхьазырыщт. Мы охътэ благъэм кислородыр зэраIэкIагъахьэрэ системэхэр ащ щагъэуцоу аублэщт. Республикэм и ЛIышъхьэ псынкIэу а Iофыр зэшIуахынэу, зэпыу имыIэу IэзапIэхэм кислородыр аIэкIэгъэхьэгъэным анаIэ тетынэу къыIуагъ.
Адыгэ Республикэм псауныгъэр къэухъумэгъэнымкIэ иминистрэ къызэрэхигъэщыгъэмкIэ, Мыекъуапэ иурамэу Победэм къыщызэIуахыгъэ амбулаторнэ гупчэм мафэ къэс пэтхъу-Iутхъу уз зиIэ нэбгыри 100-м ехъу къеуалIэ. Ащ фэдэ гупчэ джыри бэ темышIэу Калининым иурам тет поликлиникэу N 3-м къыщызэIуахынэу рахъухьэ. Мы учреждениехэм поликлиникэхэм яIоф нахь къафагъэпсынкIэщт.
Адыгэ Республикэм и ЛIышъхьэ ипресс-къулыкъу