АР-м и Прокуратурэ къеты
ЦIыфхэм ясоциальнэ фитыныгъэхэр къаухъумэх
ЦIыфхэм ясоциальнэ фитыныгъэхэр къэухъумэгъэнхэмкIэ УФ-м играждан процессуальнэ Кодекс прокурорхэм фитыныгъэшхохэр аретых.
Кодексым истатьяу 45-м къызэригъэнафэрэмкIэ, цIыфым ифитыныгъэхэр, ишъхьафитыныгъэ ыкIи ихэбзэ шIоигъоныгъэхэр къыухъумэнымкIэ прокурорым заявление ытын зилъэкIыщтыр цIыфым ипсауныгъэ зэщыкъуагъэу ыкIи ежьым хьыкумым зыфигъэзэн амал имыIэ зыхъукIэ ары.
Прокурорым фитыныгъэу иIэхэм ахахьэхэрэп IофшIэн зэфыщытыкIэхэм алъэныкъокIэ цIыфым исоциальнэ фитыныгъэхэр, ишъхьафитыныгъэ ыкIи ихэбзэ шIоигъоныгъэхэр къыухъумэныр, кIэдэуныр, джащ фэдэу ащ иунагъо исхэм япхыгъэу ахэр къыухъумэнхэр, къэралыгъо ыкIи муниципальнэ псэупIэ фондхэм япхыгъэ фитыныгъэу яIэхэм кIэдэунхэр, псауныгъэм ыкIи гъэсэныгъэм япхыгъэ Iофыгъохэр.
Зигугъу къэтшIыгъэ Iофхэм алъэныкъокIэ прокурорым хьыкумым зыфигъэзэным фэшI цIыфхэм заявление атхын фае.
2020-рэ илъэсым, прокурорхэм ядэо 600-м ехъу хьыкумхэм агъэцэкIагъ. Ахэр цIыфхэм япенсионнэ ыкIи нэмыкI социальнэ Iофыгъохэм, зыныбжь имыкъугъэхэм, тыкъэзыуцухьэрэ дунаир ыкIи чIыопсыр, цIыфым ипсэупIэ фитыныгъэхэр къэухъумэгъэнхэм япхыгъэх.
ГущыIэм пае, муниципальнэ къэралыгъо къулыкъушIэр хэбзэнчъэу къызэрэIуагъэкIыгъэм, ар IофшIапIэм ягъэштэжьыгъэным ыкIи Iоф зыщимышIэгъэ уахътэм тефэрэ лэжьапкIэр етыжьыгъэным фэгъэхьыгъэу Шэуджэн районым ипрокуратурэ дэо тхылъэу хьыкумым фигъэзагъэр гъэцэкIагъэ хъугъэ.
Хьыкумым зэригъэунэфыгъэмкIэ, цыхьэ зэрэфимышIыжьырэм къыхэкIэу муниципальнэ къулыкъушIэр зэдаохэрэм зэрэIуигъэкIыгъэр мытэрэз зекIуакIэу зэрихьагъэу ары.
Зыныбжь имыкъугъэхэм яфитыныгъэхэр къэухъумэгъэнхэм фытегъэпсыхьагъэу псэупIэ зэрагъэгъотынымкIэ ны мылъкур зыгъэфедагъэхэм ясабыйхэр яIахь хэлъэу унэр зытыратхэныр, зипсауныгъэ зэщыкъуагъэхэм социальнэ мэхьанэ зиIэ псэуалъэхэр Iэрыфэгъу афэхъунымкIэ прокурорхэм ядаохэмкIэ хьыкумхэм унашъохэр ашIыгъэх.
КIАРЭ Фатим.