Партиеу «Единэ Россиер» зызэхащагъэр илъэс 19 зыхъугъэ мафэр адрэхэм зэратекI щымыIэу гуфэкIо гупчэхэм ахэтхэм агъэкIуагъ.

«МэфэкI мафэми тидепутатхэр, партием хэтхэр цIыфхэм IэпыIэгъу афэхъугъэх. Пандемием илъэхъан депутатхэр зэкIэ шIушIэным пылъых. ТиIоф­шIэгъухэм фэныкъохэм мафэ къэс гъомылапхъэхэмрэ Iэзэгъу уцхэмрэ афащэх, врачхэм шхын стырхэр, зызэраухъумэрэ пкъы­гъохэр аIэкIагъахьэх», — хи­гъэунэфыкIыгъ партием и Генеральнэ совет исекретарэу Андрей Турчак.

ГуфакIохэм шъолъырхэм арыс врачхэр сымаджэхэм адэжь ащэх. Къэралыгъо Думэм идепутатхэри, нэмыкI депутатхэри волонтер движением хэла­жьэх. «Единэ Россием» ишъо­лъыр къутамэхэмрэ ифракциехэу законодательнэ зэIукIэхэм, къэлэ думэхэм ащыIэхэмрэ ятранспорт къызфагъэфедэнэу сымэджэщхэм аратыгъ. Партием хэтхэм къаугъоигъэ ахъщэмкIэ пандемием лъэшэу зэрар зэрихыгъэ шъолъырхэм реанимобильхэр къафащэфыгъэх.

Автомобиль тхьакIыпIэхэр Самарэрэ Москварэ ащызиIэхэм язэгъыгъэхэу медицинэ Iо­фышIэхэр зезыщэрэ автомобильхэр ыпкIэ хэмылъэу дезинфекцие ашIых. Ащ фэдэ во­ди­тельхэм шъолъыр заулэмэ гъэ­сты­ныпхъэ картэхэр къа­щараты.

Волонтерхэм сымаджэхэу яунэхэм арысхэм Iэзэгъу уцхэр афащэх. Вирусхэм апэшIуе­кIорэ Iэзэгъу уцхэр ращэфынхэу Правительствэм бэмышIэу шъолъырхэм мылъку къафыхигъэкIыгъ. ГуфакIохэм амбулаторнэу зэIазэхэрэм уцхэр афа­щэх. «Единэ Россием» иво­лонтер гупчэхэу Хабаровскэ, Санкт-Петербург, Чувашием, Курскэ хэкум ыкIи нэмыкI шъо­лъырхэм ащыIэхэр ащ фэдэ сымаджэхэм мафэ къэс Iэпы­Iэгъу афэхъух.

«Единэ Россием» иволонтер гупчэхэм цIыф зэфэшъхьафыбэмэ непэ уащыIукIэн плъэ­кIыщт. Зы унагъо исхэри ахэм къахэфэх. ГущыIэм пае, Вологодскэ хэкум ит гурыт еджапIэхэм ащыщ горэм щылэжьэрэ Наталья Аруевамрэ илъэс 12 зыныбжь ащ икIалэу Арсенийрэ гъомылапхъэхэр нэжъ-Iужъхэм афахьых.

Свердловскэ, Костромской, Воронежскэ, Московскэ хэку­хэм, Татарстан ыкIи нэмыкI шъо­лъырхэм арыт апшъэрэ еджа­пIэхэу медицинэ гъэсэныгъэ зыщарагъэгъотхэрэм ястудентхэм колл-гупчэхэм Iоф аща­шIэ, медицинэ IофышIэхэм зэрэзэIэзэжьыщтхэ шIыкIэу афагъэнэфагъэхэр псынкIэу сы­маджэхэм аIэкIагъахьэх.

«Единэ Россием» иволонтер гупчэхэм къяпхыгъэхэм гъомылапхъэхэр зэрылъ Iалъмэкъхэр сымэджэщхэм ащагощых. Липецкэ, Новосибирскэ хэкухэм яковиднэ госпитальхэм аIутхэм щэджэгъуашхэ арагъэшIы. Свердловскэ хэкум ит ре­абилитационнэ клиникэ горэм Iутхэри агъашхэх. Ямало-­Ненецкэ автоном коимкIэ посел­кэу Тазовскэм врачхэм апае тхьацухэкI шхыныгъо зэ­фэшъ­хьафхэр щагъажъэх.

Пандемием зэрэпэуцужьхэ­рэм нэмыкIэу ос-ощх зэхэтэу къещхыгъэм тхьамыкIагъоу къыз­дихьыгъэхэм ядэгъэзыжьыни гуфакIохэр хэлажьэх. Владивосток ипсэупIэхэу электроэнергие зимыIэу къэнагъэхэм адэсхэм ахэр IэпыIэгъу афэхъух. Яунэ щыпщэрыхьанхэу газ баллонхэр цIыфхэм аратых. ГуфакIохэм чъыгэу икIыкIыгъэ­хэр Iуахыжьых, цIыфхэм псырэ гъомылапхъэхэмрэ афащэх.

Зэпахырэ узым лъэшэу зыкъызыщиштэгъэ чIыпIэхэм ащы­псэурэ врачхэр партиемрэ ми­нистрэхэм я Кабинетрэ ягу­къэкIыкIэ пкIэ хэмылъэу такси­кIэ зэращэщтых. «Единэ Россием» хэтхэм апкъ къикIыкIэ Новосибирскэ, Иркутскэ, Ярославскэ, Ростов хэкухэм, Красноярскэ краим ащ фэдэ таксихэр ащагъэфедэх.

«Партиер зэрэзэхащагъэм епхыгъэ зичэзыу мэфэкIыр хэд­гъэунэфыкIы зыхъукIэ Iофэу тшIагъэхэр зэфэтэхьысыжьых. Ау мыгъэкIэ анахь пшъэрылъ шъхьаIэу тиIагъэр цIыфым ипсау­ныгъэ къызэтегъэнэжьыгъэныр ары, — къыIуагъ Адыгэ шъо­лъыр гъэцэкIэкIо комитетым ипащэу, Мыекъуапэ идепутатэу АфэшIэгъо Рэмэзан. — Пан­демием илъэхъан депутатхэм, партием, НыбжьыкIэ Гвардием ахэтхэм волонтер гупчэхэм за­рапхыгъэх. Iэзэгъу уцхэмрэ гъомылапхъэхэмрэ аIэкIэзыгъэ­хьэрэ, шIушIэн Iофтхьабзэхэм ахэлэжьэрэ, медицинэ Iофы­шIэхэм IэпыIэгъу афэхъурэ гуфакIо пэпчъ лъэшэу тыфэраз».