Европэм футболымкIэ ичемпионхэм я Кубок къыдэхыгъэным фэгъэхьыгъэ зэнэкъокъум «Краснодар» Краснодар хэлажьэ.

Тыгъэгъазэм и 2-м Краснодар щыкIогъэ ешIэгъур командэм итарихъ шIукIэ къыхэнэжьыщт. Францием икомандэу «Ренн» зыфиIорэм 1:0-у «Краснодар» текIуагъ.

— Апэрэ текIоныгъэр сыдигъокIи гушIуагъо, — къыIуагъ «Краснодар» итренер шъхьаIэу Мурад Мусаевым. – ТиешIа­кIохэм лъэшэу тафэраз.

ЗэIукIэгъур къызэрыкIоу щытыгъэп. ТекIоныгъэр зышIуахьырэр зэнэкъокъум зэрэхэзырэр командэхэм ашIэщтыгъ. «Краснодар» «Ренным» зэрэтекIуагъэм дакIоу, ешIакIэу къыгъэлъэгъуагъэмкIэ тигъэгушIуагъ.

Маркус Берг ешIапIэм игупчэ итэу ухъумакIохэм ябэнызэ Iэгуаор къызыфигъэфедагъ. ЫпэкIэ зелъым ухъумакIор ыблыпкъ къетхъуагъэми, къызэринэкIыгъ, хъагъэм Iэгуаор дидзагъ — 1:0.

КъэлэпчъэIутэу Матвей Сафоновыр, командэм икапитанэу Александр Мартынович, фэшъхьафхэри къэлапчъэм дэжь цыхьэшIэгъоу щешIагъэх. ЗэIукIэгъур дахэу кIуагъэ. Зэнэкъокъур зыщаухыщт уахътэм ешIапIэм къихьагъэхэ Ари, Камболовым яIэпэIэсэныгъэкIэ къагъэлъэгъуагъ «Краснодар» зэнэкъокъум тапэкIи чанэу хэлэжьэн зэрилъэкIыщтыр.

Тыгъэгъазэм и 8-м «Краснодар» Англием щыIукIэщт дунаим щыцIэрыIоу «Челси» зыфиIорэм. Ащ кIэухэу фэхъущтым емылъы­тыгъэу купым ящэнэрэ чIыпIэр краим икомандэ къыщыдихыгъ, Европэм изэнэкъокъу щылъыкIотэщт. «Краснодар» нахьыбэрэ тигъэгушIонэу фэтэIо. Командэм иешIэгъухэм Адыгеим щыщ нэбгырабэ яплъы, дунэе футболыр Краснодар къызэрэнэсыгъэм егъэгушIох.