ЕджапIэхэм зэращышхэщтхэм ыпкIэ Iэрымылъхьэ шIыкIэкIэ зэратыщтым епхыгъэ проектым ипхырыщын Адыгеим щырагъэжьагъ. УблэпIэ чIыпIэу къыхахыгъэр эколого-биологическэ лицееу N 35-р ары.

— Республикэм щыпсэу­хэрэм яфинанс шIэныгъэ хэгъэхъогъэным мы проектыр фэIорышIэщт ыкIи игъорыгъо­зэ лъагъэкIотэщт, — къыIуагъ Урысые Федерацием и Гупчэ банк и Къыблэ гъэIорышIэпIэ шъхьаIэ Лъэпкъ банкым АР-мкIэ и Къу­тамэ ипащэу Сергей Самойленкэм.

Ащ къызэриIуагъэмкIэ, Адыгеим картэхэр агъэфедэхэзэ Iэрымылъхьэ пкIэ тынэу ашIы­хэрэм япчъагъэ процент 86,4-м нэсыгъ, ар блэкIыгъэ илъэсым егъэпшагъэмэ, проценти 10,2-кIэ нахьыб. Гъэсэныгъэм иучреждениехэм зэращышхэхэрэм ыпкIэ Iэрымылъхьэу атыным шIуагъэу хэлъыр бэ: кIэлэеджакIом ахъщэу ыгъакIорэм лъыплъэн, имылъку къызэтыригъэнэн ылъэ­кIыщт, Iэрылъхьэ ахъщэу ыIыгъыр шIокIодыным ищынагъо щыIэжьыщтэп.

Мы проектыр пхырыщыгъэным икIэщакIор Урысые Федерацием и Гупчэ банк и Къыблэ гъэIорышIэпIэ шъхьаIэ Лъэпкъ банкым АР-мкIэ и Къутамэрэ Адыгэ Республикэм гъэсэны­гъэмрэ шIэныгъэмрэкIэ и Мини­стерствэрэ. Республикэм ишъо­лъыр Iэрымылъхьэ пкIэ тыным иIахь нахьыбэ шIыгъэнымкIэ ыкIи финанс фэIо-фашIэхэр Iэрыфэгъу хъунхэмкIэ гъогу картэм иплан изы Iахь гъэцэкIэгъэным мыр къыдыхэлъытагъ.

Iэшъынэ Сусан.