Псэолъэ «Iушхэр» агъэуцух
«Россети Кубань» и Адыгэ шъолъыр къутамэ цифрэ шIыкIакIэхэр ыгъэфедэзэ электричествэр къэзылъытэрэ системэр егъэкIэжьы.
2020-рэ илъэсыр къызихьагъэм къыщыублагъэу энергетикхэм ащ фэдэ системэу 1746-рэ трансформаторхэм ащагъэпсыгъ, электричествэу гъэфедагъэ хъугъэр къэзылъытэу псэолъэ 61-рэ вольт инхэр къэзытырэ подстанциехэм ащагъэуцугъ, счетчик «Iушхэр» унэгъо 9000-мэ афыпашIагъэх.
Системэм игъэкIэжьын епхыгъэ IофшIэнхэр Краснодар краим и Апшеронскэ, Шытхьэлэ, Адыгеим и Джэджэ, Мыекъопэ, Красногвардейскэ, Кощхьэблэ ыкIи Шэуджэн районхэр ары зыщызэшIуахыщтхэр. «Россети» ипрограммэу «Цифровая трансформация 2030» зыфиIорэм ар къыщыдэлъытагъ. Счетчик «Iушхэм» ягъэуцун Шытхьэлэ, Джэджэ, Красногвардейскэ ыкIи Шэуджэн районхэм ащаухыгъ. Мы уахътэм Мыекъуапэрэ Мыекъопэ районымрэ ащагъэпсых, Кощхьэблэ ыкIи Апшеронскэ районхэм нахь кIасэу ащыфежьэщтых.
ПсэолъакIэхэр ыпкIэ хэмылъэу агъэуцух. Ахэр унагъом электричествэу ыгъэфедагъэр зыфэдизыр къалъытэным, нэужым ар пэIудзыгъэ шIыкIэм тетэу, электроэнергиер къэзытырэ компанием фагъэкIоным тегъэпсыхьагъэх. Ащ «къафигъэхьыгъэм» къыпкъырыкIыхэзэ унагъом ытыщтыр къалъытэщт, квитанциер агъэхьазырыщт. Ащ фэдэ счетчик зыфагъэуцугъэр электроэнергиер къезытырэ организацием екIолIэн ищыкIэгъэжьыщтэп.
Ащ имызакъоуи, унагъом электричествэм ыуасэу ытырэр нахь макIэ хъуными псэолъэ «Iушхэр» тегъэпсыхьагъэх. ГущыIэм пае, электронергиер бэу зищыкIэгъэ псэуалъэхэм агъэстыгъэр тариф нахь цIыкIумкIэ къэзылъытэрэ программэм тебгъэуцон плъэкIыщт. Iоф зэрашIэрэм лъыплъэным, къэкъутэхэмэ ягъэцэкIэжьын компаниер ары фэгъэзагъэр.
СчетчикыкIэхэр электричествэм икIуапIэхэр зыпышIэгъэ пкъэоу унэхэм алъапсэ итхэм ахэтыщтых. Ащ дакIоу, псэупIэм екIолIэрэ кIуапIэр лъэхъаным къыздихьыгъэ шIыкIэхэм адиштэу шIыгъэ гъучIычхэмкIэ афызэблахъу. Ахэр нахь щынэгъончъэх.
— Электроэнергиеу гъэфедагъэ хъугъэр къэзылъытэрэ системэр гъэкIэжьыгъэ хъумэ электричествэр хэбзэнчъэу зыпарэми «ытыгъужьышъущтэп», цIыфхэм ар зэраIэкIахьэрэри нахьышIу хъущт. Мы IофшIэныр тапэкIи лъыдгъэкIотэн гухэлъ тиI, — къыIуагъ «Россети Кубань» и Адыгэ шъолъыр къутамэ ипащэу Рустам Магдеевым.