Къихьащт илъэсым агъэцэкIэщтых
Социальнэ ыкIи нэмыкI мэхьанэ зиIэ псэуалъэхэр шIыгъэнхэм, гъэцэкIэжьыгъэнхэм ыкIи зэтегъэпсыхьэгъэнхэм Адыгеим мэхьанэшхо щыраты.
Мыщ фытегъэпсыхьэгъэ программэхэр зэрифэшъуашэу агъэцакIэх, проектхэр щыIэныгъэм щыпхыращых. Республикэмрэ федеральнэ гупчэмрэ зэгурыIоныгъэ азыфагу илъэу Iоф зэрэзэдашIэрэм зэфэхьысыжь дэгъухэр фэхъух.
Къихьащт илъэсымкIэ ыкIи ащ къыкIэлъыкIорэ илъэситIум ячэзыу пIалъэкIэ федеральнэ бюджетыр аужырэ хэплъэгъумкIэ УФ-м и Къэралыгъо Думэ мы мафэхэм ыштагъ. Псэуалъэхэм яшIын, ягъэцэкIэжьын ыкIи ягъэкIэжьын пэIухьащт мылъку Адыгеим къыфыхэгъэкIыгъэныр федеральнэ бюджетым къыдыхэлъытагъ.
АР-м и ЛIышъхьэу КъумпIыл Мурат къызэриIуагъэмкIэ, федеральнэ гупчэм иIэпыIэгъу ишIуагъэкIэ мэхьанэшхо зиIэ проект заулэ 2021-рэ илъэсым шъолъырым щагъэцэкIэщт. Мыщ дэжьым анахь шъхьаIэу щытыщтых кIэлэцIыкIу IыгъыпIэхэм чIыпIэ тедзэхэр къащызэIухыгъэнхэр, автомобиль гъогухэм, социальнэ псэуалъэхэм яшIын лъыгъэкIотэгъэныр, нэмыкIхэри.
Урысыем и Къэралыгъо Думэ идепутатэу, партиеу «Единэ Россием» хэтэу Владислав Резник къызэрэхигъэщыгъэмкIэ, Красногвардейскэ районымкIэ псэупIэхэу Садовэм, Белэм ыкIи Хьатикъуае, Шэуджэн районымкIэ къутырэу Тихоновым адэт кIэлэцIыкIу IыгъыпIэхэм чIыпIэ тедзэхэр ащагъэпсыщтых, ащ сомэ миллион 200,1-рэ пэIуагъэхьащт. Мыекъуапэ игурыт еджапIэхэм ащыщым псэуалъэ къыпышIыхьэгъэным фэшI сомэ миллион 319-м ехъу агъэфедэщт.
Анахьэу анаIэ зытырагъэтыщт лъэныкъохэм ащыщ гъогухэм ягъэцэкIэжьын. ГущыIэм пае, Джэджэ, Кощхьэблэ ыкIи Красногвардейскэ районхэм апхырыкIырэ гъогуиплIым язэтегъэпсыхьан сомэ миллион 63,4-рэ тефэщт. Мылъкур зыпэIуагъэхьащт нэмыкI лъэныкъуабэ агъэнэфагъ.
— Ахъщэр зэрагъэфедэрэм пытагъэ хэлъэу лъыплъэщтых республикэм ипащэхэмрэ депутатхэмрэ, — къыIуагъ КъумпIыл Мурат.