Урысые общественнэ движениеу «Народный фронт» зыфиIорэм ишъолъыр отделениеу Адыгэ Республикэм щыIэм игукъэкIыкIэ амыгъэунэфыгъэ дзэкIолIым и Мафэ ипэгъокIэу республикэм ирайонхэм якIэлэеджакIохэр зэфэзыщэщтхэ дзэ-патриот клубэу «ШIэжьыр» зэхащагъ.

Ащ иIофшIэн зыфэгъэзэгъэщтыр — къыткIэ­хъухьэрэ лIэужхэм япат­риотическэ пIуныгъэ ыкIи Хэгъэгур къэзыухъумэзэ фэхыгъэ дзэкIолIхэм яшIэжь гъэпытэгъэныр.

— Хэгъэгу зэошхор зау­хыгъэр илъэс 75-рэ тешIагъ нахь мышIэми, фронтым Iутыгъэхэу зыдэ­хъугъэр амышIэхэрэ дзэ­кIолIхэм ыкIи офицерхэм джы къызнэсыгъэми алъэ­хъух. Ахэм ящыIэныгъэ епхыгъэ къэбар анахь къы­зэрыкIом тэркIи, яIа­хьылхэмкIи мэхьанэ иI. Титарихъ тшIэн, тыгу къэ­кIыжьын, къыткIэхъухьэ­хэрэм къафэтIотэн фае.джа гухэлъыр зыдэтIыгъэу лъыхъон клубыр зэ­хэтщагъ. Мыщ хэт ныбжьы­кIэ цIыкIухэр тарихъым лъыIэсынхэ, зэо зэпэуцужьхэм, дзэкIолIхэм къа­рыкIогъэ къэбар гъэшIэгъонхэр къагъотынхэ алъэ­кIыщт, — къыIуагъ ОНФ-м ишъолъыр отделение хэтэу, Урысыем и Лъыхъон движение ишъолъыр от­деление итхьаматэу Иван Партной. Мы уахътэ ехъулIэу кIэ­­лэцIыкIу нэбгырэ 200 фэдиз клубым иIофшIэн хэтых. Заом илъэхъан Адыгеим ишъолъыр мэхьанэ зиIэ хъугъэ-шIагъэу щыIагъэхэм япхыгъэ къэбархэр ахэм къаугъоищтых.

— Къэбарым улъыхъуныр — пшъэдэкIыжь ыкIи къин зыпылъ IофшIэн, ау гъэшIэгъоны. УхъумэнымкIэ министерствэм икартэ­хэм, ихъарзынэщхэм Iоф адашIэнэу кIэлэцIыкIухэм загъэсэщт, заом хэлэ­жьагъэхэм афэгъэхьыгъэ гъэзет ыкIи интернет тхы­гъэхэр къагъотыщтых. Мэ­хьанэ зиIэхэм ащыщ тинахьыжъхэм адэгущы­Iэнхэр. Зэо мэхъаджэм щыхъугъэхэм ишыхьатыгъэхэм ашIэрэ къэбарыр лъапIэ, — хигъэунэфы­кIыгъ Иван Партной.

ХэушъхьафыкIыгъэ апшъэ­рэ еджапIэхэм якIэ­лэегъаджэхэр ыкIи ястудентхэр япащэхэу кIэлэ­еджакIохэм къаугъоищт материалхэр лъыхъон ор­ганизациехэм аратыщтых.

Клубым иIофшIэн къыдыхэлъытагъэу, журналист сэнэхьатым зыщаушэтын амал ныбжьыкIэ цIыкIухэм яIэщт. Клубым иIоф­шIэн, къэралыгъом итарихъ щыщ мэхьанэ зиIэ хъугъэ-шIагъэхэм афэгъэ­хьыгъэу корреспондентхэр къэтхэщтых. Творческэ лъэныкъоу клубым иIофшIэн хэтыщтхэм ащыщ Хэгъэгу зэошхом щыIэгъэ мэхьанэ зиIэ хъугъэ-шIагъэхэр къизыIотыкIырэ табличкэхэм яшIын.

— Тарихъым ишIэжь, заом илIыхъужъхэм зэра­хьэгъэ лIыблэнагъэр къызэтегъэнэгъэнхэм афэIорышIэрэ проектхэр пхыращыхэзэ, патриотическэ лъэныкъомкIэ Урысые народнэ фронтым IофшIэнышхо зэрехьэ. ныбжьыкIэхэм я Хэгъэгу итарихъ зэрашIэныр ашIогъэшIэ­гъон хъуным клубыр фэ­IорышIэщт, — къыIуагъ ОНФ-м ишъолъыр штаб итхьамэтэгъоу, Къэралыгъо Совет — Хасэм идепутатэу, Урысыем и ЛIы­хъужъэу Цэй Эдуард.

Iэшъынэ Сусан.