Адыгэ республикэ клиническэ сымэджэщым хэт диализ отделением Iоф зишIэрэ апэрэ илъэсыр охътэ къиным тефагъ нахь мышIэми, ащ емылъытыгъэу учреждениер зэфашIыгъэп. Республикэм ит диализ къутамэхэм ащыщэу мы зыр ары коронавирус къызэутэкIыгъэ цIыф­хэм медицинэ IэпыIэгъу языгъэгъотырэр. Адыгэкъалэ ыкIи Шытхьалэ адэт диализ гупчэ­хэм, инфекционнэ госпитальхэм къаращыгъэхэм республикэ сымэджэщым идиализ къутамэ щяIазэх. Сымаджэхэм корона­вирус къызэутэкIыгъэхэри ахэтых. Ахэм ящыкIэгъэ медицинэ IэпыIэгъур къаратэу, covid зэрямыIэжьыр къэзыушыхьатырэ уплъэ­кIуныр зашIыхэ уж, ежьхэр зэпхыгъэхэ диализ гупчэхэм агъэзэжьы. Врач­хэм ящынэгъончъагъэ къаухъумэным фэшI хэушъхьафыкIыгъэ щыгъын­хэр ащыгъынхэ фае. — Диализ афашIызэ ащ фэдэ щыгъынхэр сыхьат 600-м ехъурэ тиврачхэм ащыгъыгъэу къэтлъытагъ, — къыщаIуагъ Адыгэ рес­публикэ клиническэ сы­мэ­джэщым хэт диализ къу­тамэм. Абрэдж Сэтэнай.