Телефоныр бгъэфедэзэ

Зэрэдунаеу зэлъызыкIугъэ вирусым мы мафэхэм етIупщыгъэу зеушъомбгъу. Илыягъэу цIыфхэр зэхэмыхьанхэм фэшI мобильнэ приложениер агъэ­федэн амал зэрэщыIэр УФ-м Пен­сиехэмкIэ ифонд и Къутамэу АР-м щыIэм джыри зэ шъугу къегъэкIыжьы.

Мы приложениемкIэ унэе счетым, ны мылъкум язытет, пенсиеу е нэмыкI ахъщэ тынэу агъэнэфа­гъэр зыфэдизыр зэбгъэшIэнхэ плъэкIыщт. Джащ фэдэу ПенсиехэмкIэ фондым упчIэу фыуиIэр фэбгъэзэн уфит, тхылъ горэ уищыкIагъэми, цIыфхэр езгъэблагъэрэ къулыкъум Iоф зэришIэрэ графикым зыщыб­гъэгъуазэ пшIоигъоми, IэпыIэгъу къыпфэхъущт.

Фондым иприложение зэрэбгъэфедэщтым ыпкIэ птын ищыкIагъэп, Android ыкIи iOS зыфиIорэ платформэхэм ащыбгъэпсын плъэкIыщт. Ащ уихьаным пае тамыгъиплI хъурэ кодыр иптхэнышъ авто­ризацие пшIын фае. Нэужыми а кодыр иптхэзэ приложениер бгъэфедэщт.

Тыгъэгъазэм и 31-м пIалъэр екIы

Федеральнэ хэбзэгъэуцугъэу «О на­циональной платежной системе» зыфиIорэм къызэрэщыдэ­лъы­та­гъэм­кIэ, пенсиеу къыфакIорэр бан­кым зыIэкIигъахьэхэрэм къи­хьащт 2021-рэ илъэсым щылэ ма­зэм и 1-м къыщыублагъэу картэу «МИР» зы­фиIорэр ары яахъщэ къы­зэрыхьащтыр.

Мы картэм Урысыер техьажьынэу зыригъэжьагъэр 2017-рэ илъэсыр ары. Пенсиер е нэмыкI со­циальнэ ахъщэ тынэу къыфакIорэр нэмыкI картэхэмкIэ (MasterCard, Visa, нэмыкIхэр) къызIэкIахьэхэрэм «МИР»-м техьажьынхэу тызыхэхьэгъэ мазэм и 31-м нэс пIалъэу яI.

Почтэм е нэмыкI организациеу пенсиехэр аIэкIэз­гъахьэхэрэм къызфихьыхэрэм мы шапхъэр анэсырэп.

Картэр бгъэпсыным пае банкым зыфэбгъэзэн фае. Ар зэрэзэблэпхъурэм имызакъоу, банкым иреквизитэу ахъщэр къызэрыхьэхэрэри зэхъокIыгъэ зыхъукIэ, ПенсиехэмкIэ фондыр ащ щыбгъэгъозэныр шIокI зимыIэ Iоф. Ащ пае лъэIу тхылъыр «унэе каби­нетым» е къэралыгъо фэIо-фашIэхэм япортал ащыптын плъэкIыщт. ПенсиехэмкIэ фондым икъулыкъоу цIыфхэм Iоф адэзышIэрэм е МФЦ-м уякIуалIэми пIахыщт, ау ахэм пэшIорыгъэшъэу зябгъэтхын фае.

Нахьыпэрэм фэдэу, пенсиер къызэрэIэкIэхьащт шIыкIэр шъхьадж зэрэфаеу къыхихыни, къыхихыгъэр зэблихъужьыни фит. Ащ ищыкIэгъэ лъэIу тхылъыри фондым ичIыпIэ къулыкъоу зыпэблагъэм е МФЦ-м ащитын фит, интернетыр ыгъэфедэми хъущт.

УФ-м ПенсиехэмкIэ ифонд и Къутамэу

АР-м щыIэм ипресс-къулыкъу