Мыекъопэ къэлэ клиникэ сымэджэщым иперинатальнэ гупчэ агъэкIэжьыгъ. Джыдэдэм ар къызэIуахыжьыным фагъэхьазыры. Адыгэ Республикэм и ЛIышъхьэу КъумпIыл Мурат гупчэм Iофэу щашIагъэхэм нэIуасэ зафишIыгъ, сабыйхэр къызщыхъурэ сымэджэщым щылажьэхэрэм адэгущыIагъ.

Iофтхьабзэм хэлэжьагъэх Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэ игуадзэу Къонэ Заур, Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем, Адыгэ Республикэм псауныгъэр къэухъумэгъэнымкIэ икъэралыгъо бюджет учреждениеу «Мые­къопэ къэлэ клиникэ сымэджэщым» иврач шъхьаIэу Владимир Лобода, подряднэ организациеу ООО-у «Марк-Сервис» зыфиIорэм ипащэу Цуекъо Мурат, медицинэ организацием иIофышIэхэр.

Псауныгъэм икъэухъумэнкIэ, демографием ылъэныкъокIэ Iофхэр нахьышIу шIыгъэнхэмкIэ перинатальнэ гупчэм мэхьанэшхо зэриIэр республикэм и ЛIышъхьэ къыхигъэщыгъ. ТапэкIэ унашъо зэраштэгъагъэм тетэу перинатальнэ гупчэм зэ­хъокIыныгъэшхохэр фэшIы­гъэх. А пшъэрылъыр агъэцэкIэн языгъэлъэкIыгъэр Урысые Федерацием икъэралыгъо программэу «Псауныгъэр къэухъумэгъэ­ныр» зыфиIорэм хэхьэрэ программэ гуадзэу «Нымрэ кIэлэцIыкIумрэ япсауныгъэ къэухъу­мэгъэныр» зыфиIорэм диштэу федеральнэ гупчэм ахъщэ IэпыIэгъоу къаритыгъэр ары. А гухэлъхэм апае федеральнэ, республикэ бюджетхэм сомэ миллион 215-рэ фэдиз къахагъэкIыгъ, сомэ миллион 30 фэ­диз зыосэ медицинэ оборудованиер къащэфыгъ.

Сабыйхэр къызыщыхъурэ сымэджэщым зэхъокIыныгъэшхо­хэр фэхъугъэх, я 5-рэ къатыр ащ тырашIыхьагъ, унэ пчъагъэ къыпашIыхьагъ. Квадрат метрэ 1121-кIэ ащ нахь зиушъом­бгъугъ. Сабый къэхъугъакIэхэм реанимациемкIэ ыкIи терапием­кIэ яотделение, пэсащэу къэхъу­рэ кIэлэцIыкIухэу дагъо зиIэхэм яотделение щыIэхэ хъугъэ. Ахэм анэмыкIэу перинатальнэ гупчэм приемнэ отделение къыпашIы­хьагъ, сабый къызыфэхъурэ унагъохэм защыфэгушIощтхэ чIыпIэ шъхьафи агъэнэфагъ.

Зэпахырэ уз къызэутэлIагъэ­кIэ зэгуцафэхэрэр зычIагъэгъолъ­хьэрэ бокситIу ащ хэт. Сабый­хэр къызыщыхъурэ залхэр, опе­рационнэхэр, палатэхэр, кабинетхэр джырэ шапхъэхэм адиштэрэ оборудованиекIэ зэте­гъэпсыхьагъэх. Джащ фэдэу гупчэм мебелэу, сантехникэу чIэтыр зэкIэ зэблахъугъ, медицинэ оборудованиякIэ къащэфыгъ.

Адыгеим и ЛIышъхьэ перинатальнэ гупчэр къыплъыхьагъ. А 1-рэ къатым лъэрымыхьэхэм яотделениерэ перинатальнэ гупчэм иадминистрациерэ чIэтых. Я 2-рэ къатым сабыйхэр къызыщыхъурэ зали 7, операционнэ блокищ, анестезиологиемкIэ отделениер тетых. Я 3-рэ, я 4-рэ къатхэр сабый къызыпыфэгъэ бзылъфыгъэхэмрэ са­бый къэхъугъакIэхэмрэ атегъэпсыхьагъэх. Я 5-рэ къатыр сабый къэхъугъакIэхэм реанимациемкIэ ыкIи терапиемкIэ яотделение, пэсащэу къэхъурэ сабыйхэу дагъо зиIэхэм яотделение афэгъэзагъ. Джащ фэдэу акушерствэмрэ гинекологиемрэкIэ кафедрэм паий унэхэр ащ хэтых.

Владимир Лобода къызэриIуа­гъэмкIэ, мы охътэ благъэм пе­ринатальнэ гупчэм Iоф ышIэу ыублэщт. Адыгеим имуниципалитет зэфэшъхьафхэм анэмыкIэу, Краснодар краим ирайонхэу къытпэблагъэхэми ащыпсэурэ бзылъфыгъэхэу сабый къы­зыфэхъунэу щытхэм яфэIо-фашIэхэр мыщ щагъэцэкIэщтых. Лъэрымыхьэхэмрэ сабый къызыфэхъугъэкIэ ныхэмрэ медицинэ IэпыIэгъу дэгъу респуб­ликэм щягъэгъотыгъэнымкIэ лъэпкъ проектэу «Демография» зыфиIорэм къыдыхэлъытэгъэ Iофтхьабзэхэр шIуагъэ къытэу зэрэзэрахьэхэрэр статистическэ пчъагъэхэм къаушыхьаты. Зэрэ Урысыеу зыпштэкIэ, респуб­ликэм сабыеу щылIэрэр нахь макIэ, къыщыхъурэр нахьыбэ хъугъэ. ГущыIэм пае, 2020-рэ илъэсым иапэрэ мэзибгъу къы­кIоцI сабый 3218-рэ республи­кэм къыщыхъугъ. ГъэрекIо джащ фэдэ илъэхъан егъэпшагъэмэ, ар сабыи 189-кIэ нахьыб.

«Коронавирусым зимыу­шъом­­бгъуным кIочIэ, амал шIукIае мыгъэ зэрэпэIудгъэ­хьагъэм емы­лъытыгъэу псауныгъэм икъэ­ухъумэнкIэ Iоф­тхьабзэу итхъухьагъэхэм ягъэцэкIэни лъытэгъэкIуатэ. Социальнэ лъэныкъом тызэ­рэдэлажьэрэм ипэгъокIэу цIыфхэм ягъашIэ зыкъиIэтын, демографием ылъэныкъокIэ Iофхэр нахьышIу хъунхэ фае. Перинатальнэ гупчэм амалэу щызэрагъэуIугъэхэм яшIуагъэ­кIэ сабыйхэр нахьыбэу къэ­хъунхэу, хьадэгъур къызылъы­Iэсыхэрэр нахь макIэ хъунэу тэгугъэ», — къыхигъэщыгъ Адыгеим ипащэ.

Адыгэ Республикэм и ЛIышъхьэ ипресс-къулыкъу