УФ-м мэкъу-мэщымкIэ и Министерствэ кIэщакIо зыфэхъугъэ апэрэ лъэпкъ зэнэкъокъоу «Урысыем иIэшIугъакIэхэр» зыфиIорэр зэхащагъ. Къэралыгъом ишъолъырхэм яшхыныгъо зэфэшъхьафхэр мыщ къыщыгъэлъэгъуагъэх, анахь IэшIухэм якъыхэхынкIэ цIыфхэм амакъэ атын амал яIагъ. Непэ ар зэфашIыжьы.

Адыгеим имэкъумэщышIэхэм адыгэ къуаер, щыгъур, шъоур ыкIи лъэкъохьэу «Лэгъонакъэр» зэнэкъокъум къыщагъэлъэгъуагъэх.

Непэрэ мафэм ехъулIэу цIыфхэм анахьэу амакъэ зыфатыгъэр къуаер ары. КъызэрэхагъэщыгъэмкIэ, дунаим щызэлъашIэрэ адыгэ къуаер псауныгъэмкIэ Iэзэгъоу щыт. Мыр Урысыем имызакъоу, IэкIыб къэралыгъохэми ащаIуагъэкIы. Мы илъэсым иапэрэ мэзих республикэм къое тонн мини 9-м ехъу къыщыдагъэкIыгъ. Пандемием емылъытыгъэу, блэкIыгъэ илъэсым мыщ фэдэ иуахътэ егъэпшагъэмэ, ар процент 20-кIэ нахьыб. 2022-рэ илъэсым нэс а пчъагъэр тонн мин 16-м нагъэсынэу агъэнафэ. Мы пшъэ­рылъыр зэшIохыгъэным фэшI къуаем икъыдэгъэкIынкIэ кIуа­чIэу аIэкIэлъхэм, былымышъхьэхэм япчъагъэ республикэм щыхагъахъо.

Джащ фэдэу Ростов ыкIи Астраханскэ хэкухэм, Краснодар краим, Къырым, нэмыкI шъо­лъырхэм ябренд шъхьаIэхэр зэнэкъокъум къыщагъэлъэгъуагъэх.

Iофтхьабзэм изэфэхьысыжьхэр тыгъэгъазэм и 20-м ашIыщт. ЦIыфхэм анахьэу амакъэ зыфатыгъэ шхыныгъохэр къэнэфэщтых. Зэнэкъокъум илъэныкъо пэпчъ текIоныгъэ къыщыдэзыхыгъэ гъомылэпхъэ 22-рэ къыхахыщт. Адыгэ Республикэм къыгъэлъэгъуагъэхэр анахь дэ­гъухэм ахэфэнхэу, апэрэ чIы­пIэр къыдахынэу тыщэгугъы.