Урысые политикэ партиеу «Единэ Россиер» зызэхащагъэр илъэс 19 зэрэхъу­рэм ехъулIэу Адыгеим и ЛIышъхьэу, Адыгэ шъолъыр партийнэ организацием и Секретарэу КъумпIыл Мурат партием и Тхьаматэу Дмитрий Медведевым ишъолъыр общественнэ приемнэ зыгъэгумэкIырэ IофыгъохэмкIэ цIыфхэм щадэгущыIагъ. Iофтхьабзэр видеоконференцие шIыкIэм тетэу кIуагъэ.

Хьафизэхэм атегъэпсыхьэгъэ Адыгэ республикэ тхылъеджапIэм ипащэу Ирина Корниенкэм республикэм и ЛIышъхьэ лъэIукIэ зыкъыфигъэзагъ. Дэеу зылъэгъухэрэм компьютеркIэ тхыгъэхэр тырадзэнхэ, ахэм ядэIужьынхэ, ежь-ежьырэу литературэм Iоф дашIэн языгъэлъэ­кIыщт IофшIэпIэ чIыпIитIу зэрящыкIа­гъэр ащ пащэм риIуагъ. КъумпIыл Мурат къызэригъэгугъа­гъэмкIэ, мы охътэ благъэм учреждением ищыкIэгъэ оборудованиер къыфащэ­фыщт.

«IэпыIэгъу тышъуфэхъунэу сыдигъуи тыхьазыр. ТехникэмкIэ кIэу къежьэхэрэм гъунэ алъышъуф шъуи­IофшIэнкIэ шъуищыкIагъэхэр игъом къэтщэфынхэм пае», — къыIуагъ КъумпIыл Мурат.

Кощхьэблэ районым щыщ унагъоу сабыибэ зэрысым (сэкъатныгъэ зиIэ зы сабый ащ щапIу) Адыгеим и ЛIышъхьэ зыкъыфигъэзагъ. Былым пIашъэхэр ахъухэзэ унэе IэпыIэгъу хъызмэтым зырагъэушъомбгъунымкIэ къэралыгъо социальнэ IэпыIэгъу а унагъор къыкIэлъэIугъ.

Адыгеим и ЛIышъхьэ районми, къо­джэ администрациеми япащэхэм пшъэ­рылъ афишIыгъ сэкъатныгъэ зиIэ сабыим ипсауныгъэ зэтегъэуцожьыгъэнымкIэ унагъом ренэу IэпыIэгъу фэхъунхэу. Адыгэ Республикэм псауныгъэр къэухъу­мэгъэнымкIэ иминистри пшъэрылъ гъэнэ­фагъэ фишIыгъ. Унагъом илъэIу къыфагъэцэкIагъ, мы охътэ благъэм былымышъхьэхэр зэращэфын алъэкIыщт мылъку ахэм къаIэкIэхьащт.

Къуаджэу Джэджэхьаблэ игупчэ парк лъэс гъогу щыгъэпсыгъэным иIофыгъокIэ республикэм и ЛIышъхьэ зыкъыфагъэзагъ. КъумпIыл Мурат джэуап зэраритыжьыгъэмкIэ, 2021-рэ илъэсым джырэ уахътэм диштэу къалэхэмрэ къуаджэ­хэмрэ зэтегъэпсыхьэгъэнхэм ателъытэгъэ программэм мы псэуалъэр къыхиубытагъ. Республикэм ипащэ джащ фэдэу къызэриIуагъэмкIэ, къуаджэм изэтегъэ­псыхьанрэ иукъэбзынрэ къоджэдэсхэр нахь чанэу къыхагъэлэжьэнхэ фае.

Адыгеим и ЛIышъхьэ къэбар жъугъэм иамалхэм ялIыкIохэм адэгущыIэзэ, партиеу «Единэ Россиер» непэ къэралы­гъом пхырищырэ курсыр къэзыгъэнэфэрэ анахь политикэ кIочIэшхоу зэрэщытыр къы­Iуагъ.

Шъугу къэтэгъэкIыжьы Урысые политикэ партиеу «Единэ Россиер» зызэхащэгъэ мафэм ехъулIэу партийнэ приемнэхэм цIыфхэр зэрэщырагъэблэгъэщтхэр.