Макъэ арамыгъэIоу чIыгур зэрагъэфедагъэм пае тазыр зэраIахыгъэр хабзэм димыштэу Урысые Федерацием и Конституционнэ Хьыкум ылъытагъ.

Урысыем и Конституционнэ Хьыкум Урысые Федерацием административнэ хэбзэукъоныгъэхэмкIэ и Кодекс ия 8.8-рэ статья иа 1-рэ Iахь Урысые Федерацием и Конституцие димыштэу ыгъэ­нэфагъ.

М. Г. Анциновам итхьаусыхэ тхылъкIэ Конституционнэ Хьыкумым чъэпыогъум и 16-м иIэгъэ зэхэсыгъом Урысые Федерацием административнэ хэбзэукъоныгъэхэмкIэ и Кодекс ия 8.8-рэ статья иа 1-рэ Iахь Конституцием зэрэдиштэрэр ыуплъэкIугъ.

ПсэупIэхэм ячIыгухэм ахэхьэрэ чIыгу IахьитIоу мы бзылъфыгъэм иунэе мылъку хахьэхэрэр зыфытегъэпсыхьагъэхэр унэе унэ ащышIыгъэныр ары. Зыфытегъэпсыхьэгъэ гухэлъым нэмыкIэу а чIыгу Iахьхэм къохэр, пчэнхэр, чэтхэр, псычэтхэр зэращиIыгъыгъэхэм пае М. Г. Анциновам тазырэу сомэ мини 10 рагъэтыгъ.

Урысыем ихэбзэгъэуцугъэ зызыщегъэгъуазэм Конституционнэ Хьыкумым нафэ къыфэхъугъ чIыгу Iахьыр зэригъэ­федэщт шIыкIэхэр чIыгу Iахьыр зыем ежь-ежьырэу къыхихынэу фитыныгъэ зэриIэр, чIыгум игъэфедэнкIэ ыкIи псэуалъэхэр муниципальнэ образованием щыгъэпсыгъэнхэмкIэ шапхъэхэм ахэр къащыдэлъытагъэ зыхъукIэ. ЧIыгу Iахьыр зыем гухэлъэу иIэхэмкIэ хэбзэ къулыкъухэм макъэ аригъэIун фаеу Урысые Федерацием чIыгухэмкIэ и Кодекси, Урысые Федерацием къэлэгъэпсынымкIэ и Кодекси арытэп.

Хьыкумым 2020-рэ илъэсым чъэпыогъум и 16-м ышIыгъэ унашъоу N 42-р зытетым ит «правэм ылъэныкъокIэ мы Iофыгъом нэфэгъэ икъу зэрэхэмылъыр, административнэ хэбзэукъоныгъэхэр ашIынхэмкIэ ар лъапсэ зэрэхъурэр, конституционнэ фитыныгъэхэмрэ шъхьафитыныгъэмрэ якъэухъумэнкIэ гарантиехэр нахь тIасхъэ зэришIырэр», щыкIагъэхэр дэгъэзыжьыгъэнхэмкIэ ищыкIэгъэ амалхэр федеральнэ хэбзэгъэуцум зэрэзэрихьан фаер.

Урысые Федерацием административнэ хэбзэукъоныгъэхэмкIэ и Кодекс ия 8.8-рэ статья иа 1-рэ Iахь къыпкъырыкI­хэзэ, М. Г. Анциновам иIофкIэ унашъоу аштагъэхэм ахэплъэжьыгъэн фаеу Конституционнэ Хьыкумым ылъытагъ.