Адыгеим шIэжьыр щагъэлъэпIэщт
2014-рэ илъэсым къыщегъэжьагъэу мы мафэр Урысыем щыхагъэунэфыкIы. Тикъэралыгъо ыкIи ащ игъунапкъэхэм ашIокIэу ащыкIогъэ зэо зэпэуцужьхэм ащыфэхыгъэ урысые ыкIи советскэ зэолIхэм яшIэжь ар епхыгъ. 2014-рэ илъэсым ичъэпыогъу мазэ мы мафэм ихэгъэунэфыкIын епхыгъэ унашъо УФ-м и Къэралыгъо Думэ ыштагъ.
ШIэжь мафэм къыдыхэлъытагъэу патриотическэ Iофтхьэбзэ зэфэшъхьафхэр Адыгеим щызэхащэх. Муниципальнэ образованиехэм къызэращаIуагъэмкIэ, зэо зэфэшъхьафхэм ахэлэжьэгъэ ветеранхэр, общественнэ организациехэм ялIыкIохэр къызэрагъэблэгъэщтхэ шIэжьым исыхьатхэр еджапIэхэм ащыкIощтых. Iофтхьабзэм изэхэщакIохэм зэрэхагъэунэфыкIыгъэмкIэ, ныбжьыкIэхэм яхэгъэгу шIу алъэгъунымкIэ, якъэралыгъо рыгушхонхэмкIэ, Урысыем иблэкIыгъэ дзэ-тарихъ шIагъо лъытэныгъэ фашIынымкIэ, дзэ ыкIи граждан пшъэдэкIыжьэу яIэр нахь куоу зэхашIыкIынымкIэ, ЛIыхъужъхэм яшIэжь къызэтегъэнэгъэнымкIэ мыщ фэдэ сыхьатхэм мэхьанэшхо яI.
ШIэжьым иурок амыгъэунэфыгъэ дзэкIолIым и Мафэ фэгъэхьыгъэ къэбарыр кIэлэеджакIохэм къащыфаIотэщт. Тыгъэгъазэм и 3-р – ошIэ-дэмышIэу къыхахыгъэп. Мы мафэм, 1966-рэ илъэсым, Москва пэмычыжьэу нэмыцыдзэхэр зэрэзэхагъэтэкъуагъэхэр илъэс 25-рэ зэрэхъурэр зыщыхагъэунэфыкIыгъэм, амыгъэунэфыгъэ дзэкIолIым ихьадэ сапэ Московскэ Кремлым идэпкъ лъапсэ щагъэтIылъыгъ. ЗиIахьыл гупсэ зыщыфэхыгъэр е зыщагъэтIылъыгъэр зымышIэхэрэм шъхьащэ зыщафашIырэ чIыпIэу мы саугъэтыр хъугъэ. Амыгъэунэфыгъэ дзэкIолIым и Мафэ Хэгъэгу зэошхом щыфэхыгъэхэм яшIэжь изакъоп агъэлъапIэрэр, нэмыкI заохэм ыкIи зэпэуцужьхэм ахэкIодагъэхэу зикъэбар амышIэхэрэри ары.
«Аужырэ дзэкIолIым ихьадэ амыгъэтIылъыжьэу, заор ухыгъэ хъущтэп» — къыIуагъ зэлъашIэрэ урыс полководцэу Александр Суворовым. Лъыхъон Iофтхьабзэхэм чанэу ахэлажьэхэрэр мы гущыIэхэм арэгъуазэх, — къыхагъэщыгъ Iофтхьабзэм изэхэщакIохэм
Лъыхъон IофшIэным икIэуххэр республикэм щынафэх. Шъугу къэдгъэкIыжьын, 2018-рэ илъэсым Хэгъэгу зэошхор заухыгъэм илъэс 73-рэ тешIагъэу советскэ къухьэлъэтэ-разведчикым исыгъэ экипажыр зыщыкIодыгъэ чIыпIэр къагъотыжьын алъэкIыгъ. Джыри бэмышIэу Тэхъутэмыкъое районым зыщыщ амышIэрэ дзэкIолIым икъупшъхьэхэр лъыхъуакIохэм къыщычIахыгъэх. Къыхэгъэщыгъэн фае мы шIэжь мафэр къэсынкIэ къэнагъэ щымыIэу ар къызэрагъотыгъэр. Тыгъэгъазэм и 3-м советскэ дзэкIолIыр икIэрыкIэу агъэтIылъыжьыщт.
Iэшъынэ Сусан.