А 1 — 4-рэ классхэм якIэлэеджакIохэр гъогум щынэгъончъэу щы­зе­кIон­хэмкIэ шIэныгъэу аIэкIэлъхэр уплъэкIугъэнхэм фэшI «Гъогур щынэгъончъэныр» зыфиIорэ онлайн-олимпиадэ зэхащагъ. Ар шэкIогъум и 30-м къыщегъэжьагъэу тыгъэгъазэм и 11-м нэс гъэсэныгъэ защарагъэгъотырэ платформэу Учи.ру зыфиIорэм щыкIощт.

Iофтхьабзэм икIэщакIох коммерцием емыпхыгъэ организациеу «Национальные приоритеты» зыфиIорэр, Урысыем и МВД гъогурыкIоныр щынэгъончъэнымкIэ и Къэралыгъо ГъэIоры­шIапIэ, Урысыем транспортымкIэ и Министерствэ ыкIи Рос­автодромыр.

Гъогум епхыгъэ лъэпкъ проектым игъэцэкIэн хахьэу илъэситIум къыкIоцI кIэлэцIыкIухэм гъэсэныгъэ защарагъэгъотырэ еджапIэхэм якIолIэрэ шъолъыр гъогухэм яIахь 1400-рэ фэдиз агъэцэкIэжьыгъ. Ахэм кIэу нэфрыгъуазэхэр, гъогу тамыгъэхэр атырагъэуцуагъэх, лъэс зэпырыкIыпIэхэр агъэнэфагъэх.

Проектым игъэцэкIэнкIэ Адыгэ Республикэм илъэситIум къыкIоцI автомобиль гъогу 50 агъэцэкIэжьыгъ, ахэм ащыщэу 18-р гъэсэныгъэм иучреждениехэм гъунэгъоу якIуалIэх. Джащ фэдэу нэфрыгъуазэхэр агъэуцугъэх ыкIи «кнопкэ» зыхэт хэушъхьафыкIыгъэ зэпырыкIыпIэр агъэпсыгъ. Мыекъуа­пэ ирайон цIыкIоу «Черемушкэм» иеджапIэхэм якIуалIэу нэфрыгъозэ пкъыгъуи 3 ащагъэ­уцугъ.

ЕджапIэхэм ыкIи кIэлэцIыкIу IыгъыпIэхэм якIолIэрэ гъогухэр щынэгъончъэ хъугъэх нахь мышIэми, ахэм къащыхъурэ хъугъэ-шIагъэхэр нахь макIэ шIыгъэнхэм фэшI пэшIорыгъэшъ Iофтхьабзэхэм язэхэщэн мэхьанэшхо иI. Илъэс къэс транспортым ипчъагъэ хэхъо, къэралыгъом игъогухэм заушъомбгъу, арышъ кIэлэцIыкIухэр щынэгъон­чъэу зекIонхэр Къэралыгъо автоинспекцием икъулыкъушIэ­хэм ямызакъоу кIэлэегъаджэ­хэмкIи, ны-тыхэмкIи Iофыгъо шъхьаIэу щыт.

— Культурэ хэлъэу гъогум щызекIоным ицIыкIугъом щегъэ­жьагъэу кIэлэцIыкIур фэбгъэсэн фае, — еIо УФ-м и Правительствэ и Тхьаматэ игуадзэу, лъэпкъ проектэу «Щынэгъончъэ ыкIи шэпхъэшIу­хэм адиштэрэ автомобиль гъогухэр» зыфи­Iорэм икураторэу Марат Хуснуллиным. — Гъогур зэрэзэпыпчын, кушъхьэфа­чъэм ыкIи самокатым тесхэм гъогурыкIоным ишапхъэхэр зэрагъэцэкIэнхэ фаер ны-тыхэм ямызакъоу кIэлэегъа­джэхэми агурагъэIонхэу щыт. Мы аужырэ илъэси 6-м кIэлэцIыкIухэр зыхэфэгъэхэ гъогу хъугъэ-шIагъэхэм япчъа­гъэ нахь макIэ хъугъэми, тэ пшъэ­рылъэу тиIэр пэшIорыгъэшъ Iофтхьабзэхэм яшIуагъэкIэ ахэм япчъагъэ джыри нахь къегъэ­Iыхыгъэныр ары.

Онлайн-олимпиадэр къэралыгъом ишъолъыр 85-мэ ащыкIощт. УблэпIэ классым исхэу шIоигъо­ныгъэ зиIэхэр мыщ хэлэжьэнхэ алъэкIыщт. Тест шIыкIэм тетэу Iофтхьабзэр рекIокIыщт. Ащ хэлэжьагъэхэм зэкIэми дипломхэр, сертификатхэр ыкIи рэзэныгъэ тхылъхэр аратыщтых.