Административнэ хэукъоныгъэхэр ыкIи бзэджэшIагъэхэр зэрамыхьанхэм зыщытегущыIэгъэхэ егъэджэн Iофтхьабзэ Адыгеим иполицие икъулыкъушIэхэм Мыекъопэ индустриальнэ техникумым щызэхащагъ.

Урысыем хэгъэгу кIоцI IофхэмкIэ и Министерствэ зыныбжь имыкъугъэхэм яIофхэмкIэ Мыекъопэ отделым истаршэ инспекторэу Анастасия Колесниковам студентхэм къафиIотагъ наркотикхэм, тутыным ыкIи шъон пытэхэм язэрарэу къакIорэр.

Анахьэу административнэ ыкIи уголовнэ пшъэдэкIыжьхэм афэгъэхьыгъэ лекцием студентхэр ашIогъэшIэгъонэу едэIугъэх. А. Колесниковам игъэкIотыгъэу студентхэм къафиIотагъ бзэджэшIагъэ къадызэрамыхьаным фэшI общественнэ чIыпIэхэм узэращызекIон фаер, щынэгъончъэным ишапхъэхэр зыфэдэхэр. Общественнэ чIыпIэхэм тутын ыкIи шъон пытэхэр ащызгъэфедэхэрэм Урысыем административнэ хэбзэукъоныгъэхэмкIэ и Кодекс истатья къызэригъэнафэу пшъэдэкIыжьэу ахьын алъэкIыщтхэм студентхэр къакIэупчIагъэх.

Полицием имайор анахьэу студентхэм анаIэ тыраригъэ­дзагъ зекIокIэ дэйхэм алъэныкъокIэ Iэтахъохэм ямызакъоу, ахэм янэ-ятэхэми уголовнэ пшъэдэкIыжь ахьын зэралъэкIыщтыр.

Нэужым студентхэм яупчIэхэр министерствэм илIыкIо фагъэзагъэх. Мы Iофтхьабзэм ишIуагъэ къызэрэкIуагъэм щэч хэлъэп, сыда пIомэ хабзэр амыукъонымкIэ шапхъэу щыIэхэм, фитыныгъэу яIэхэм студентхэр щыгъуазэ хъугъэх, яшIэныгъэ­хэм ахагъэхъуагъ.