IофшIэн къызыфэзгъотыжьхэрэм, зиIоф ежь-ежьырэу зэпызыгъа­фэ­хэ­рэм ястатусрэ яфитыныгъэхэмрэ къызыщытхыхьагъэр хьакъулахь хэ­бзэгъэуцугъэ закъор ары.

Хьакъулахьыр нахь макIэу атыным фэшI IофшIэн къязытыхэрэм ар бэрэ къызфагъэфедэ. Джары ахэм атегъэ­псыхьэгъэ федеральнэ законопроект шъхьаф штэгъэн фаеу «Единэ Россием» и Тхьаматэу Дмитрий Медведевым зыкIи­лъытэрэр.

«IофшIэн язытыхэрэмкIэ ар федэу щыт: подоходнэ хьакъулахьыр атынэу, мыбюджет социальнэ фондхэм ахъщэ агъэ­кIонэу, социальнэ гарантиехэр афагъэцэкIэнхэу ищыкIагъэп. Нахь лэжьэпкIэшхом кIагъэгушIурэ лэжьакIохэр IофшIэн къязытыхэрэм загъорэ къытырагъанэх», — къыIуагъ Дмитрий Медведевым.

Партием и Тхьаматэ зэрэхигъэунэфыкIыгъэмкIэ, зэпэIу­дзыгъэ шIыкIэм тетэу джыдэдэм Iоф зашIэрэ лъэхъаным хэбзэукъоныгъэхэр амышIынхэм, IофышIэхэмрэ ежь-ежьырэу зиIоф зэпызыгъэфэжьы­хэрэмрэ яфитыныгъэхэр къэу­хъу­мэгъэнхэм афэшI закон шъхьаф къыдэгъэкIыгъэн фае.

«IофшIэн къызыфэзгъотыжьхэрэм фитыныгъэу, гарантиеу яIэхэм яхьылIэгъэ федеральнэ законопроект къэгъэхьазырыгъэн фае. ЗиIоф ежь-ежьырэу зэпызыгъафэхэрэр, дистанционнэ IофышIэхэр, нэмыкI Iо­фышIэхэу пкIэкIэ агъэлажьэ­хэрэр ащ щызэтеутыгъэнхэ фае», — хигъэунэфыкIыгъ Дмит­рий Медведевым.

«Единэ Россием» ифракциеу Къэралыгъо Думэм щыIэм ипащэ иапэрэ гуадзэу Андрей Исаевым къызэриIуагъэмкIэ, мы лъэныкъомкIэ партием шIагъэ горэхэр иIэх, илъэсыр имыкIызэ ахэр къахалъхьан ямурад.

«Непэ, зэпахырэ узым лъэшэу зызыщиушъомбгъугъэ лъэ­хъаным, IофшIэн къызфэзгъотыжьхэрэм афэгъэхьыгъэ законопроектыр ищыкIэгъэ шъыпкъэу щыт, — къыIуагъ шъолъыр исполкомым ипащэу, Мые­къуапэ икъэлэ Совет идепутатэу АфэшIэгъо Рэмэзан. — Зэпахырэ узыр зыуцужькIи мы законым имэхьанэ къеIыхыщтэп. ЗиIоф- ежь-ежьырэу зэпызыгъафэхэрэм яфитыныгъэхэр зыщыгъэ­нэфагъэр хьакъулахь хэбзэгъэу­цугъэ закъор ары. Ахэм ясоциальнэ гарантиехэмрэ ястрахованиерэ закон горэми щыкIэгъэпытыхьажьыгъэхэп.

2020-рэ илъэсым бэдзэогъум и 1-м къыщегъэжьагъэу Адыгеим хьакъулахь шэпхъакIэхэм щатехьагъэх. Илъэсым къыкIоцI сомэ миллиони 2,4-м нахьыбэ федэ къэзымыхьыжьхэу ежь­-ежьырэу лажьэхэрэмкIэ, фэIо-фашIэхэр зыгъэцакIэхэрэмкIэ ар Iэрыфэгъоу щыт.

ЗиIоф ежь-ежьырэу зэпызыгъафэхэрэм япчъагъэ илъэс къэс нахь хэхъощт. Шъхьэихыгъэу, хэбзэ шапхъэхэм атетэу ахэм Iоф ашIэнымкIэ пэрыохъоу щыIэхэр дэгъэзыжьыгъэнхэ, законопроект шъхьаф зэхэгъэуцогъэн фае».