МашIом къыздихьырэ тхьамыкIагъохэр къэмыхъунхэм зынаIэ тезыгъэ­тырэ къулыкъухэм япшъэрылъхэм зэу ащыщ машIом зыкъымыштэнымкIэ шапхъэхэу Урысые Федерацием ихэбзэгъэуцугъэ щыгъэнэфагъэхэр цIыфхэмрэ организациехэмрэ зэрагъэцакIэрэр ауплъэкIунэу, мыщ­кIэ хэукъоныгъэ зышIхэрэр къыхагъэщынэу ыкIи ахэм ягъогупэ пабзы­кIынэу. ЦIыфхэр чэщрэ жъугъэу зыдэщыIэ псэуалъэхэм ахэм анахьэу анаIэ атырагъэты.

МэшIогъэкIуасэхэм зэрагъэу­нэфыгъэмкIэ, нахьыбэрэмкIэ машIом зыкъызыщиштэрэр унэ­хэр ары. Ау автотранспортми, къыдэгъэкIын мэхьанэ зиIэ псэуалъэхэми, сатыушIыпIэхэми, административнэ унэхэми макIэп ащ фэдэ тхьамыкIагъо­хэр къызэряхъулIэрэр.

НахьыбэрэмкIэ тхьамыкIагъор зыпкъ къикIырэр электрооборудованием игъэфедэнкIэ шапхъэхэр зэраукъохэрэр, цIыф­хэр зэрэмысакъхэрэр ары.

2020-рэ илъэсым шэкIогъум и 15-м машIом къыздихьыгъэ тхьамыкIагъом зы нэбгырэ хэ­кIодагъ. МашIом къалэу Мые­къуапэрэ Мыекъопэ районымрэ закъыщимыштэным лъыплъэрэ къулыкъум цIыфхэм агу къегъэ­кIыжьы шапхъэу щыIэхэр къыдалъытэн зэрэфаер. Ахэм машIо амышIынэу, яхапIэхэм къа­пэIулъ чIыпIэхэм игъом уцхэр ащаупкIэнэу араIо, машIом зы­къымыштэнымкIэ шапхъэхэр зыу­къо­хэрэм административ- нэ пшъэ­дэкIыжь зэрарагъэхьыщтыр агу къагъэкIыжьы.

МашIом зыкъыштагъэу зы­шъулъэгъукIэ, псынкIэу телефон­хэу 01-мкIэ е 101-мкIэ макъэ яжъугъэIу. IэпыIэгъур къэсыфэ цIыфхэм ягъэкощынкIэ ыкIи машIом игъэкIосэжьынкIэ шъу­фэлъэкIыщтыр зэкIэ шъушIэ.

З. А. Бэрэтар. Къалэу Мыекъуапэрэ Мые­къопэ районымрэ мэшIо­гъэкIосэнымкIэ якъэралыгъо инспектор.