Адыгэ Республикэм и ЛIышъхьэу КъумпIыл Мурат автоном мыкоммерческэ организациеу «Диалог» зыфиIорэм игенеральнэ пащэу Алексей Гореславскэм тыгъуасэ зэIукIэгъу дыриIагъ.

Iофтхьабзэм хэлэжьагъэх Адыгеим и Премьер-министрэу Геннадий Митрофановыр, АР-м и ЛIышъхьэрэ республикэм иминистрэхэм я Кабинетрэ я Администрацие ипащэ игуадзэхэу Къонэ Зауррэ ЛIынэ Муратрэ, Къыблэ федеральнэ шъолъырым хахьэхэрэм Iоф адэшIэгъэнымкIэ ГъэIорышIапIэм ипащэу Максим Гордеевыр, АдыгеимкIэ шъолъырхэм ягъэIорышIэнкIэ гупчэм ипащэу Къоджэшъэо Казбек.

ЗэIукIэгъум илъэхъан Адыгеим и ЛIышъхьэрэ мыкоммерческэ организациеу «Диалогым» игенеральнэ пащэрэ ыпшъэкIэ зигугъу къэтшIыгъэ гупчэр республикэм къыщызэIухыгъэным иапэрэ едзыгъо гъэпсыгъэ зэрэхъущтым тегущыIагъэх. КъызэраIуагъэмкIэ, Урысыем и Президентэу Владимир Путиным и ипшъэрылъкIэ мыщ фэдэ структурэхэр шъолъырхэм къащызэIуахыщтых.

— Гупчэхэм ягъэпсын Федеральнэ гупчэр икIэщакIоу щыт, арышъ мы структурэм иIофшIэн зэрэзэхищэрэм шIогъэшхо къыхьынэу, ащ амалэу къы­тыхэрэмкIэ тицIыфхэм тадэгущыIэн тлъэкIынэу тыщэгугъы. Мы IофшIэныр ыпэкIэ тэр-тэрэу дгъэцакIэщтыгъ, ащ фэшI социальнэ хъытыур дгъэфедэщтыгъ, — къыIуагъ КъумпIыл Мурат.

Мы проектыр зэпхыгъэр Урысыем цифрэ шIыкIэм хэхъоныгъэ ышIыным и Министерств ары, ар гъэцэкIагъэ зэрэхъу­рэм лъыплъэщт мыкоммерческэ организациеу «Диалогыр». Пшъэрылъ шъхьа­Iэу мыщ фэдэ гупчэхэм яIэщтыр псауныгъэр къэухъумэгъэным, гъэсэныгъэм, социальнэ ухъумэным, псэупIэ-коммунальнэ хъызмэтым, нэмыкI лъэныкъо­хэм япхыгъэу закъыфэзыгъэзэрэ цIыфхэм ятхылъхэр обработкэ шIыгъэнхэр, нэужым а Iофыгъохэр зэхафынхэу ащ афэгъэзэгъэ гъэцэкIэкIо хэбзэ къулыкъухэм аIэкIагъэхьащтых.

Алексей Гореславскэм къызэриIуагъэм­кIэ, гупчэм игъэпсынкIэ апэрэ едзы­гъор Адыгеим зэрифэшъуашэу щызэшIуахыгъ, тапэкIэ проектым игъэцэкIэн шIуагъэ къытынэу къафэлъэIуагъ.