Адыгэ Республикэм иминистрэхэм я Кабинет тыгъуасэ зэхэсыгъоу иIагъэм лъэпкъ проектэу «Псауныгъэр къэухъумэгъэныр» зыфиIорэр зэрагъэцакIэрэм, социальнэ мэхьанэ зиIэ гъомылапхъэхэм ауасэ гъунэ зэрэлъафын фаем анаIэ щытырагъэтыгъ. Адыгэ Республикэм и ЛIышъхьэу КъумпIыл Мурат пшъэрылъ къызэрэфишIыгъэм тетэу республикэм и Премьер-министрэу Геннадий Митрофановым зэхэсыгъор зэрищагъ.

2020-рэ илъэсым имэзибгъу лъэпкъ проектэу «Псауныгъэр къэухъумэгъэныр» зыфиIорэм къыдыхэлъытэгъэ Iофтхьабзэхэр зэрагъэцэкIагъэхэм афэгъэхьыгъэу Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къыIотагъ. Ащ агу къызэригъэкIыжьыгъэмкIэ, шъолъыр проекти 7 республикэм щыпхыращы. Ахэм ягъэцэкIэн пае мыгъэ сомэ миллион 829,5-рэ къыхагъэкIыгъ.

Мэрэтыкъо Рустем къызэрэхигъэщыгъэмкIэ, проектым къыдыхэлъытэгъэ Iофтхьэбзэ заулэ зэрахьэ. Мыгъэ сан­авиацием Iоф ышIэу ыублагъ, вертолетыр 8-рэ къызфагъэфедагъ. Гу-лъынтфэ уз зиIэхэм яIэзэгъэным пае сомэ миллион 72,1-рэ къыхагъэкIыгъ, а мылъкумкIэ оборудование 97-рэ къащэфыгъ. Гу-лъын­тфэ уз зиIэхэм Iэзэгъу уцхэр аIэкIэгъэхьэгъэным сомэ миллион 49-рэ пэIуагъэхьагъ. Адэбз уз зиIэхэм яIэзэгъэным пае проектым диштэу сомэ миллион 705-рэ къыхагъэкIыгъ. Джащ фэдэу кIэлэцIыкIу поликлиникэхэм апае сомэ миллион 47,6-рэ зыосэ оборудование 38-рэ къащэфыгъ.

Лъэпкъ проектым диштэу пэублэ медикэ-санитар IэпыIэгъу языгъэгъотырэ лъэныкъом изегъэушъомбгъун анаIэ тырагъэтыгъ. Ащ пае фельдшер-мамыку IэзэпIэ 23-мэ ягъэпсын лъагъэкIотагъ. Проектэу «Новая модель медорганизаций, оказывающих первичную медико- санитарную помощь» зыфиIорэм шъо­лъырым иорганизацие 38-р къыхырагъэу­бытагъ. Ау зэпахырэ узым зызэриушъом­бгъугъэм къыхэкIэу медицинэ IэпыIэгъу ягъэгъотыгъэнымкIэ Iофхэм зэхъокIыныгъэхэр афэхъугъэх. Планхэм къащыдэлъытэгъэ медицинэ уплъэкIунхэр джыдэдэм къызэтырагъэуцуагъэх, зэпа­хырэ узхэмкIэ Iофхэм язытет зыпкъ зиуцожьыкIэ ахэр лъагъэкIотэщтых.

Коронавирусым зыкъызэриштагъэм епхыгъэу шэпхъэ гъэнэфагъэхэм зыщатехьэгъэхэ лъэхъаным проектым къыщы­дэлъытэгъэ Iофтхьабзэхэр нахь икъоу гъэцэкIэгъэнхэм пае амалэу, кIуачIэу щы­Iэр зэкIэ зэгъэуIугъэн зэрэфаер Геннадий Митрофановым къыхигъэщыгъ. Псэуалъэхэм яшIынкIэ, оборудованием икъэщэфынкIэ зэзэгъыныгъэ пшъэрылъхэр игъом гъэцэкIэгъэнхэм пае подрядчикхэм зэдэлэжьэныгъэу адыряIэр гъэ­пытэгъэн зэрэфаеми шъхьафэу игугъу къышIыгъ.

Социальнэ мэхьанэ зиIэ товархэм ауасэ зыкъемыгъэIэтыгъэнымкIэ джыдэдэм республикэм иIофхэм язытет зэхэсыгъом щыхэплъагъэх. Ащ фэгъэ­хьыгъэу Адыгэ Республикэм экономикэ хэхъоныгъэмрэ сатыумрэкIэ иминистрэу Шэуджэн Заур доклад къышIыгъ. Ащ къызэрэхигъэщыгъэмкIэ, уасэхэр къызэтеIэжэгъэнхэмкIэ ермэлыкъхэр амалышIоу щытых. Ау зэпахырэ узым зызэриушъомбгъугъэм ыпкъ къикIыкIэ джыдэдэм сатыушIыпIэ 16-р ары ныIэп къызфагъэфедэн алъэкIырэр. ГущыIэм пае, Мыекъуапэрэ Тэхъутэмыкъое районымрэ ермэлыкъ шIыпIи 3 зырыз яI, ау джыдэдэм агъэфедэрэр зыр ары. Кощхьэблэ районым чIыпIитIумэ ермэлыкъхэр ащызэхищэу ыублагъ. Красногвардейскэ, Мыекъопэ, Шэуджэн районхэм рахъухьэгъагъэм нахьи нахьыбэу ермэлыкъхэр зэхащэх. Мыгъэрэ илъэсым пыкIыгъэ мэзи 10-м къыкIоцI республикэм ермэлыкъ 771-рэ щызэхащагъ, рахъухьэщтыгъэр 715-рэ. Ермэлыкъхэм ахэлажьэхэрэм азыныкъо нахьыбэмэ ежьхэм къахьыжьыгъэ, къа­гъэкIыгъэ, къыдагъэкIыгъэ продукциер ары ащэрэр. Ермэлыкъхэм анэмыкIэу республикэм мыстационар сатыуми зыщырагъэушъомбгъу. Ахэм яшIуагъэкIэ гъомылапхъэхэм ауасэ къызэтыраIэжэн алъэкIы. Тучанхэм анахьи гъомылэпхъэ лъэпкъ шъхьаIэхэмкIэ уасэхэр ахэм щанахь цIыкIух. Ермэлыкъ закъохэм ащащэрэ товар лъэпкъхэри щыIэх.

2020-рэ илъэсым ишэкIогъурэ гъэрекIо джащ фэдэ илъэхъанрэ уасэу щыIагъэ­хэр Адыгеястатым зызэрегъапшэхэм зэфэхьысыжьэу ышIыгъэр мыщ фэд: зыуасэ нахьыбэу хэхъуагъэр гречкэр, шъоущыгъур, мыIэрысэр, пхъыр, тыгъэгъэзэ дагъэр ары. Тучанхэм анахьи мы товар лъэпкъхэм ауасэ ермэлыкъхэм ащынахь цIыкIу. Урысыер зэрэщытэу зыпштэкIэ, зигугъу къэтшIыгъэ товархэм ауасэ хэпшIыкIэу тыди щыхэхъуагъ. Адрэ гъомылэпхъэ лъэпкъхэмкIэ уасэхэр инфляцием ыпэкIэ зэрэщытыгъэм фэдэу къэнэжьыгъэх е нахь къеIыхыгъэх. Шэуджэн Заур зэрэхигъэунэфыкIыгъэмкIэ, цIыфхэм гъомылапхъэхэр аIэкIэгъэ­хьэгъэнхэмкIэ, уасэхэмкIэ республикэм Iофхэр зыпкъ щитых.

Джащ фэдэу зэхэсыгъом муниципалитет заулэмэ игъо щафалъэгъугъ Роспотребнадзорым Адыгэ Респуб­ликэмкIэ и ГъэIорышIапIэ шапхъэу къыгъэуцугъэхэм атетэу ермэлыкъхэр зэхащэхэу аублэжьынэу, ахэм цIыфхэр нахьыбэу къахагъэлэжьэнхэу, социальнэ мэхьанэ зиIэ гъомылапхъэхэм ауасэ зыкъемыгъэIэтыгъэным епхыгъэ Iофыгъохэм пхъашэу гъунэ алъафынэу, ащ пае монополием пэшIуекIорэ Федеральнэ къулыкъумрэ Урысыем промышленнэ сатыумкIэ и Министерствэрэ зэдэлэжьэныгъэу дыряIэр нахь агъэлъэшынэу.

Адыгэ Республикэм и ЛIышъхьэ ипресс-къулыкъу