Урысые Федерацием и Конституционнэ Хьыкум зэрилъытагъэмкIэ, федэу яIэм тыралъхьэрэ хэбзэIахьым щыщ къызфызэкIагъэкIожьынэу щымытхэми хьакъулахь къулыкъум зыфагъэзэн алъэкIыщт, ау хабзэр амыукъоным хьакъулахь къулыкъум иIофышIэхэми гъунэ лъафын фае.

Михаил Литвиновым Конституционнэ Хьыкумым зыкъыфигъэзагъ. Дзэ ипотекэкIэ фэтэр ащ къызещэфым хэбзэIахьэу ытыгъэм щыщ къыфызэкIэгъэкIожьыгъэным зыщыкIэлъэIурэ тхылъ хьакъулахь къулыкъум IэкIигъэхьагъ. Хъулъфыгъэм темыфэу сомэ мин 250-м ехъум къыфырагъэгъэзэжьыгъ. Зэрэхэукъуагъэхэр къызагурэIожьым гъэпцIэн, зэкъодзэн Iоф зэрихьагъэкIэ Литвиновыр агъэмысагъ.

Конституционнэ Хьыкумым 2020-рэ илъэсым бэдзэогъум и 22-м ышIыгъэ унашъоу N 38-р зытетым зэритымкIэ, «хьакъу­лахь къулыкъум ащ фэдэ фитыныгъэ яIэу ыпэкIэ ылъыти, етIанэ ар щигъэзыежьыгъэ зыхъукIэ», хэбзэIахьэу ытыгъэм щыщ къыфызэкIагъэкIожьынэу унэ къэзыщэфыгъэм хэукъоныгъэ хэлъэу зызэрафигъазэрэмкIэ пшъэдэкIыжь рагъэхьыныр «Зэкъодзэн, гъэпцIэн Iоф» зыфиIорэ статьям къыдилъытэрэп.

Джащ фэдэу хьыкумым зэрэхигъэунэфыкIыгъэмкIэ, цIыфхэм ямызакъоу, хьакъулахь къулыкъухэри хэбзэIахьыр зытырэм ащ фэдэ фитыныгъэ иIэ-имыIэмкIэ хэукъонхэ алъэкIыщт. Федеральнэ хьакъулахь къулыкъум хэукъоныгъэ зэришIыгъэм къикIырэп ахэр агъэпцIагъэхэу: хэбзэIахьыр зытырэм идокументхэр тэрэзыгъэх, IэнатIэ зыIыгъхэм унэшъо мытэрэз аригъэштэнэу ар пыхьэгъагъэп.

Хьыкумым зэрилъытагъэмкIэ, Уголовнэ кодексым ия 159-рэ статья ия 3-рэ Iахь Урысыем и Конституцие пэшIуекIорэп. ХэбзэIахьым щыщ къыфызэкIагъэкIожьынэу федеральнэ хэбзэIахь къулыкъум лъэпсэнчъэу зызэрэфигъазагъэм пае хэбзэIахьыр зытыгъэм уголовнэ пшъэдэкIыжь рагъэхьынэу щытэп.

Литвиновым иIофкIэ унашъоу аштагъэм хэплъэжьынхэу Конституционнэ Хьыкумым ыухэсыгъ.

Адыгэ Республикэм и Конституционнэ Хьыкум исекретариат