Ным и МафэкIэ Урысые гвардием и ГъэIорышIапIэу АР-м щыIэм ихэушъхьафыкIыгъэ подразделениеу ОМОН-м иIофышIэхэр зисэнэхьат пшъэрылъхэр зыгъэцакIэзэ фэхыгъэ къулыкъушIэхэм янэхэм афэгушIуагъэх.

КъулыкъушIэхэр апэу зыдэ­кIуагъэхэр Макаренко Иринэ дэжь – Урысыем и ЛIыхъужъэу полицием ипрапорщикэу Артем Гармаш ян. Артем 2012-рэ илъэсым Iоныгъом и 15-м Рес­публикэу Дагъыстан и Цунтинскэ район щыкIогъэ хэушъхьафыкIыгъэ зэпэуцужьым щыхэкIодагъ.

Джащ фэдэу, мэфэкIымкIэ фэгушIуагъэх Любовь Кравцовам – полицием ипрапорщикэу Вячеслав Кравцовым янэ. Дагъыстан и Цунтинскэ район щыкIогъэ хэушъхьафыкIыгъэ зэпэуцужьым мыщи ыпсэ щитыгъ. ЛIыхъужъныгъэм иорден щымыIэжьым ратыгъ.

— ЗэрэтфэлъэкIырэмкIэ IэпыIэгъу ты­шъуфэхъущт. Сыди­гъуи шъукъытщыгу­гъын зэрэшъулъэкIыщтыр зыщышъумыгъэгъупш. Псауныгъэ пытэ шъуиIэнэу, шъуиуна­гъо­хэм шIурэ гупсэфыныгъэрэ арылъынхэу тышъуфэлъаIо, — ныхэм зафигъэзагъ ОМОН-м ипсихологэу Ирина Горбуновам.

ЯкIалэхэр яIофшIэгъухэм ащымыгъупшэхэу мэфэкI лъапIэмкIэ къазэрэфэгушIуагъэхэр бзылъфыгъэхэм ягуапэ хъугъэ, «тхьашъуегъэпсэу» араIуагъ.