АР-м и Къэралыгъо Совет — Хасэм бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб экономикэ зэпхыныгъэхэмкIэ икомитет къихьащт 2021-рэ илъэс бюджетым ыкIи 2022 — 2023-мкIэ агъэ­нэфагъэхэм афэгъэхьыгъэ законопроектым зыщытегущыIэгъэхэ зэхэсыгъо видеоконференцие шIыкIэм тетэу иIагъ. Парламентым и Тхьаматэ игуадзэу, комитетым ипащэу Iэщэ Мухьамэд ар зэрищагъ.

Зэхэсыгъом Парламентым и Тхьаматэу Владимир Нарожнэр, АР-м финансхэмкIэ иминистрэ игуадзэу Екатерина Косиненкэр, шIокI зимыIэ медицинэ страхованиемкIэ Адыгэ Республикэм и ЧIыпIэ фонд ипащэу Людмила Ялинар, АР-м и УплъэкIо­кIо-лъытэкIо палатэ ипащэу Павел Стаценкэр, нэмыкIхэр хэлэжьагъэх.

Депутатхэр хэплъэнхэу тхы­лъыр къыхэзылъхьагъэр АР-м и ЛIышъхьэу КъумпIыл Мурат. Ащ лъэныкъо шъхьаIэу щыгъэ­нэфэгъэщтхэм республикэм иведомствэ зэфэшъхьафхэм, етIанэ ЛIышъхьэм зэхащэгъэ зэхэсыгъохэм щатегущыIагъэх. ШэкIогъу мазэу икIыгъэм финанс тхылъ шъхьаIэм изаконопроект фэгъэхьыгъэу «публичнэ едэIунхэр» рагъэкIокIыгъэх.

Iэщэ Мухьамэд зэхэсыгъор къызэIуихызэ, федеральнэ ыкIи республикэ хэбзэгъэуцуным ишапхъэхэм адиштэу, анахь шъхьаIэу зэшIохыгъэн фаехэр къыдэлъытагъэхэу ар гъэпсыгъэ зэрэхъугъэм къыкIигъэтхъыгъ.

ФинансхэмкIэ министрэм игуадзэу Екатерина Косиненкэм хэбзэIахьэу ыкIи мыхэбзэIахьэу бюджетым къыхэхъощтхэмкIэ прогнозхэр къышIыгъэх, муниципальнэ образованиехэм яIахьэу афагъэкIощтым, социаль­нэ Iофхэм, псауныгъэм икъэу­хъу­мэн, гъэсэныгъэм, культурэм, гъогу хъызмэтым, нэ­мыкI­хэм алъэныкъокIэ хахъо­хэмрэ хъарджхэмрэ зыфэдизыщтхэм къатегущыIагъ.

Зэпахырэ узэу зызыушъомбгъурэм ыпкъ къикIыкIэ экономикэм щыкIагъэхэр зэрэфэхъу­гъэхэр, бизнес цIыкIум ыкIи гурытым ащылажьэхэрэм федеральнэ ыкIи шъолъыр IэпыIэгъоу аратыгъэр къыдалъытэхэзэ, хэбзэIахьхэмкIэ ыкIи мы­хэбзэIахьхэмкIэ прогнозхэр 2019-м зытетыгъэхэм лъэшэу шIокIыгъэхэп. 2021-рэ илъэс бюджетыр пстэумкIи сомэ миллиард 24-рэ миллион 620,2-рэ хъунэу пэшIорыгъэшъэу агъэнэфагъ. Хъардж­хэр мызыгъэгум нахьыбэщтых. Сомэ миллиард 25-рэ миллиони 145,8-у къалъы­тагъ. Сомэ миллион 525,6-м щыкIэнхэу мэхъу.

Зэхэсыгъом хэлажьэхэрэм мызыгъэгум бюджетыр къинэу гъэпсыгъэ зэрэхъугъэр къыхагъэ­щыгъ. Зы лъэныкъомкIэ, пшъэ­рылъэу ыпэкIэ гъэуцугъэ хъугъэхэр пхырыщыгъэнхэ фае, адрэ лъэныкъомкIэ, коронавирусыкIэм къиныгъоу къыздихьыгъэхэр дэгъэзыжьыгъэнхэр, тапэкIэ ащ фэдэу зэрар къымыхьыным фытегъэпсыхьэгъэ IофшIэнхэр зэшIохыгъэнхэр шIокI зимыIэ Iофэу щыт. Ащ пае къэмынэу социальнэ мэхьа­нэ зиIэ лъэныкъохэр нахь къы­хагъэщыгъэх.

2021-рэ илъэс бюджетым ыкIи 2022 — 2023-мкIэ агъэнэфагъэ­хэм афэгъэхьыгъэ законопроектыр АР-м и Къэралыгъо Со­вет — Хасэм изэхэсыгъо къыхалъхьанэу ыкIи апэрэ еджэгъумкIэ аштэнэу игъоу афалъэгъунэу Комитетым хэтхэм зэдаштагъ.

Нэужым шIокI зимыIэ медицинэ страхованиемкIэ Адыгэ Республикэм и ЧIыпIэ фонд 2021-рэ илъэсымкIэ ибюджет ыкIи ащ къыкIэлъыкIощт илъэситIумкIэ агъэнэфагъэхэм афэгъэхьыгъэ хэбзэгъэуцугъэм ипроект тегущыIагъэх. Ащ щыкIагъэ фэхъущтэп, хахъохэмкIи, хъарджхэмкIи сомэ миллиарди 5-рэ миллион 751-рэ зэрэхъущтыр.

Законопроектым АР-м и УплъэкIокIо-лъытэкIо палатэ ыкIи Къэралыгъо Советым —Хасэм и Аппарат иправовой ГъэIорышIапIэ хэплъагъэх, зыдырамыгъэштэн къыхагъэкIы­гъэп. Ари Парламентым апэрэ еджэгъумкIэ ыштэнэу предложение къыхалъхьанэу рахъу­хьагъ.

Тызыхэт 2020-рэ илъэсым ибюджет мэзибгъум гъэцэкIагъэ зэрэхъугъэм фэгъэхьыгъэ докладми Комитетым хэтхэр едэ­Iугъэх. Депутатхэу Iэщэ Мухьа­мэдрэ Шэуджэн Сэфэррэ икIэщакIохэу, Къэралыгъо Советым — Хасэм и Регламент ия 87-рэ статья зэхъокIыныгъэ­хэр фэшIыгъэнхэм фэгъэхьыгъэ унашъом ипроект тегущыIагъэх.

ХЪУТ Нэфсэт.