Тибзылъфыгъэ лъапIэхэр!

Ным и Мафэ фэшI тыгу къыддеIэу тышъуфэгушIо!

Дунаим анахь цIыф шъхьаIэу тетым — щыIэныгъэ язытырэ ным шIулъэгъушхоу фыряIэр мы мэфэкI шIагъом хэолъагъо.

ШIум, гукIэгъум, шIулъэгъум, цIыфыгъэшхом, зэ­фагъэм язехьакIо ным ищытхъу пIоныр сыдигъуи тефэ. Сабыим апэрэ лъэбэкъухэр ыдзэу зыригъажьэрэм къыщыублагъэу шэн-зэхэтыкIэхэм, зэфагъэ хэлъыным афэзыгъасэрэр, ихэгъэгу шIу езыгъэлъэгъурэр, щыIэныгъэ гъогоу зэрыкIощтыр къыхихынымкIэ IэпыIэгъу къыфэхъурэр, унэгъо кIоцIым рэхьатыныгъэ илъыным фэгумэкIырэр ныр ары. Ащ ишIулъэгъу ушэтынхэр зэпытегъэчых, нахь пытэ, нахь хьалэл тешIы.

Адыгеим ис бзылъфыгъэхэу кIэлэцIыкIухэм япIункIэ щэIэгъэшхо къызыхэзыгъафэхэрэм, республикэми, хэгъэгуми янеущырэ мафэ нахь дэхэным зиIахьышхо хэзышIыхьэхэрэм лъэшэу тызэрафэразэр мы мафэм ятэIо.

Тибзылъфыгъэ лъапIэхэр, псауныгъэ пытэ, щыIэкIэшIу шъуиIэнэу, шъунасыпышIонэу, шъуиджэныкъо машIо мыкIосэнэу, шъуиунагъохэм гушIуагъорэ зэгуры­Iоныгъэрэ ренэу арылъынэу, шъуигупсэхэмрэ къы­шъупэблэгъэ цIыфхэмрэ ягуфэбэныгъэ шъущымыкIэнэу шъуфэтэIо!

Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ шъо­лъыр къутамэ и Секретарэу КъумпIыл Мурат Адыгэ Республикэм и Къэралыгъо Совет —Хасэм и Тхьаматэу Владимир Нарожный