2021-рэ илъэсымкIэ ыкIи 2022 — 2023-рэ илъэсхэм ячэзыу пIалъэкIэ федеральнэ бюджетыр ящэнэрэ хэплъэгъумкIэ Урысые Федерацием и Къэралыгъо Думэ шэкIогъум и 26-м ыштагъ. Ащ тетэу социальнэ ыкIи нэмыкI псэуалъэхэм ягъэкIэ­жьынкIэ, яшIынкIэ, ягъэцэкIэ­жьынкIэ Адыгэ Республикэм мылъкушхо къыфыхагъэ­кIыщт.

Адыгеим и ЛIышъхьэу КъумпIыл Мурат къызэрэхигъэщы­гъэмкIэ, 2021-рэ илъэсым федеральнэ гупчэр IэпыIэгъу къа­фэхъузэ, мэхьанэшхо зиIэ проект заулэ республикэм щагъэцэкIэщт. Ахэм ащыщ кIэлэцIыкIу IыгъыпIэхэм чIыпIа­кIэхэр къащызэIухыгъэнхэр, Лъэпкъ музеим, псыIыгъыпIэ­хэм, автомобиль гъогухэм ягъэ­кIэжьын лъыгъэкIотэгъэныр, къуаджэхэм спорткомплекс­хэмрэ нэмыкI социальнэ псэуа­лъэхэмрэ ащыгъэпсыгъэнхэр.

Адыгеим ыцIэкIэ депутатэу, Къэралыгъо Думэм бюджетымкIэ и Комитетрэ Урысые политикэ партиеу «Единэ Россиемрэ» ахэтэу Владислав Резник къызэриIуагъэмкIэ, Красногвардейскэ районымкIэ псэупIэхэу Садовэм, Белэм, Хьатикъуае, Шэуджэн районымкIэ къутырэу Тихоновым адэт кIэлэцIыкIу IыгъыпIэхэм зягъэушъомбгъу­гъэным пае республикэм сомэ миллион 200,1-рэ къыIэкIэхьащт, Мыекъуапэ имикрорайонэу Вос­ходым игурыт еджапIэ къыпы­шIыхьэгъэным фэшI сомэ миллион 319,1-рэ къыхагъэкIыщт.

Адыгэ Республикэм и ­Лъэпкъ музей игъэкIэжьын пае къи­хьащт илъэсым сомэ миллиони 122,7-рэ къатIупщыщт, селоу Красногвардейскэмрэ поселкэу Каменномостскэмрэ спорткомплекситIу адэшIыхьэгъэным фэшI сомэ миллиони 113-м ехъу къыхагъэкIыщт. Тэхъутэмыкъое районымкIэ поселкэу Прикубанскэм культурэм и Унэу дэтым игъэцэкIэжьын пае сомэ миллиони 6,4-рэ къатIупщыщт.

Автомобиль гъогухэмрэ псы­IыгъыпIэхэмрэ ягъэкIэжьын епхыгъэ Iофыгъохэм лъэшэу анаIэ атырагъэтыгъ. ГущыIэм пае, Джэджэ, Кощхьэблэ, Красногвардейскэ районхэм гъо­гуиплI ащыгъэпсыгъэным пае миллион 63,4-рэ къатIупщыгъ. Къихьащт илъэсым Шапсыгъэ псыIыгъыпIэм игъэкIэжьын пае сомэ миллион 20, Краснодар псыIыгъыпIэм изэтегъэпсыхьан пае сомэ миллион 323,5-рэ къыхагъэкIынэу ащ къыщыдэ­лъытагъ.

«Мылъкур зэрагъэфедэрэм Адыгэ Республикэм ипащэхэми, идепутатхэми пхъашэу гъунэ лъафыщт», — къыIуагъ Адыге­им и ЛIышъхьэ.

Шъугу къэтэгъэкIыжьы къи­хьащт илъэсымкIэ федеральнэ бюджетым Адыгеим пае мылъкушхо къызэрэщыдалъытагъэр. Республикэм ипащэхэмрэ Урысые Федерацием и Правительствэрэ лъэныкъуищ зыхэхьэрэ комиссием зэрэхэлэжьагъэхэм, комиссиемрэ Къэралыгъо Думэм ибюджет Комитетрэ ахэтэу, Адыгеим ыцIэкIэ депутатэу, Урысые политикэ партиеу «Единэ Россием» хэтэу Владислав Резник яшIуагъэкIэ гъэ­тэрэзыжьынхэр къахалъхьагъэх ыкIи ахэм адырагъэштагъ.

Депутатым зэрэхигъэунэфыкIыгъэмкIэ, мылъкур шъолъыр­хэм зэраIэкIахьэрэм парла­ментариехэм гъунэ лъафыщт. Ащ епхыгъэу Къэралыгъо Думэм унашъо щаштагъ феде­ральнэ инвестиционнэ про­граммэм хэхьэрэ псэуалъэхэм япроект-сметэ документацие 2021-рэ илъэсым мэлылъфэ­гъум и 1-м нэс зымыгъэхьа­зырхэрэм пшъэдэкIыжь зэрарагъэхьыщтым епхыгъэ Iофыгъом Правительствэр хэплъэнэу.

«2021-рэ илъэсым мэлылъфэгъум и 1-м нахь мыгужъоу документхэр зэкIэ къагъэхьазырынхэ фае. Арымырмэ, псэо­лъабэмэ яшIынкIэ ыкIи ягъэ­кIэжьынкIэ планхэр амыгъэцэ­кIэнхэ алъэкIыщт», — къыIуагъ Владислав Резник.

Адыгэ Республикэм и ЛIышъхьэ ипресс-къулыкъу