Программэр аштагъ
2020-рэ илъэсым шэкIогъум и 19-м шъолъыр программэу «УрыпсэунымкIэ ахъщэ анахь макIэ къызIэкIахьэхэрэм япчъагъэ нахь макIэ шIыгъэныр» зыфиIоу 2020 — 2030-рэ илъэсхэм ателъытагъэр Адыгэ Республикэм иминистрэхэм я Кабинет ыштагъ.
Программэм пшъэрылъ шъхьаIэу иIэр 2030-рэ илъэсым ехъулIэу тхьамыкIэу псэухэрэм япчъагъэ фэдитIукIэ нахь макIэ шIыгъэныр ары.
Ащ пае Iофыгъо зэфэшъхьафхэр зэшIуахынхэу агъэнафэ. Ащ къыдыхэлъытагъэх цIыфхэм яхахъохэр нахьыбэ шIыгъэныр, лэжьапкIэр къэIэтыгъэныр, социальнэ IэпыIэгъу зищыкIагъэхэм яшIуагъэ арагъэкIыныр, предпринимательствэм хэхъоныгъэхэр ышIынхэр, нэмыкIхэри.
2019-рэ илъэсым изэфэхьысыжьхэм къызэрагъэлъэгъуагъэмкIэ, урыпсэунымкIэ ахъщэ анахь макIэм къыщыкIэу къызIэкIахьэхэрэм япчъагъэ процент 12,6-рэ мэхъу. 2030-рэ илъэсым ехъулIэу ар проценти 6,5-м шIокIы хъущтэп.
Шъолъыр программэм къыдыхэлъытэгъэ Iофтхьабзэхэм ягъэцэкIэнрэ республикэм иэкономикэ хэхъоныгъэу ышIыхэмрэ Адыгеим щыпсэурэ цIыф-хэм ящыIэкIэ-псэукIэ нахьышIу хъуным зэрэфэIорышIэщтхэр къыщаIуагъ Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ.
(Тикорр.).