2020-рэ илъэсым шэкIогъум и 25-м, пчыхьэм сыхьатыр 10-хэм адэжь, Урысыем хэгъэгу кIоцI IофхэмкIэ и Министерствэ иотделэу Адыгэкъалэ щыIэм гъогурыкIоныр щынэгъончъэнымкIэ и Къэралыгъо инспекцие иIофышIэхэм къулыкъур ахьызэ, ВАЗ-2107-р зезыфэрэ водителым гъогурыкIоным ишапхъэхэр ыукъохэу гу лъатагъ. Инспекторхэм ар къафэмыуцоу, ичъэн ригъэхъугъ.

АР-м хэгъэгу кIоцI IофхэмкIэ и Министерствэ къызэри­тыгъэмкIэ, шапхъэхэр зыукъогъэ водителыр къагъэуцунэу пчъагъэрэ полицейскэхэр фе­жьагъэх, ау ар къядэIугъэп. Ыпэ­кIэ къикIырэ автомобильхэр зэрыкIорэ лъэныкъом пчъа­гъэрэ техьэзэ, гъогурыкIоным хэлажьэхэрэм япсауныгъэ ыкIи ящыIэныгъэ щынагъо къафихьыгъ.

Къафэмыуцугъэ автомобилым къулыкъушIэхэр зылъе­жьэхэм, макъэ зыгъэIурэ пкъы­гъомкIэ раIуагъ IашэкIэ зэрэлъыощтхэр.

Полицием фэгъэхьыгъэ федеральнэ хэбзэгъэуцугъэм къы­зэрэщиIорэм тетэу къулыкъу­шIэм Iашэр ыгъэфедагъ. Нэужым машинэр къагъэуцун ыкIи водителыр къаубытын алъэкIыгъ.

Автомобилыр къызаплъыхьэм, Адыгэкъалэ щыщ зыныбжь имыкъугъэ пшъэшъэ­жъыеу уIагъэ зытелъыр къы­рагъотагъ. Полицием икъулы­къушIэхэм апэрэ медицинэ IэпыIэгъур ащ рагъэгъотыгъ ыкIи сымэджэщым нагъэсыгъ.

ВАЗ-2107-м кIэрысыгъэр агъэунэфыгъ, ащ илъэс 20 ыныбжь, Теуцожь районым щэпсэу. кIэлэ ныбжьыкIэм машинэр зэрифэнымкIэ фитыныгъэ иIэп, ешъуагъэу рулым Iусэу ыпэкIи къаубыты­гъагъ.

Мы хъугъэ-шIагъэм епхыгъэу уголовнэ Iоф къызэIуахыгъ, уплъэкIунхэр макIох.