КIэлэцIыкIухэм шъуафэсакъ!

КIэлэцIыкIум и Дунэе мафэ епхыгъэу Къэралыгъо автоинспекцием икъулыкъушIэхэр Мыекъопэ районым икIэлэцIыкIу IыгъыпIэхэм ащыщ щыIагъэх. СабыйхэмкIэ гурыIогъошIоу гъогум узэрэщызекIощт шIыкIэхэр ахэм къафаIотагъэх.

ЛъэсрыкIо цIыкIухэм урамым ыкIи гъогум къыщяжэрэ щынагъохэр икъоу къагурыIохэрэп.

Iофтхьабзэм нахь пасэу зыфагъэхьазырыгъ. КIэлэцIыкIу IыгъыпIэм чIэсхэм янэ-ятэхэр ыкIи кIэлэпIухэр зэдеIэжьыхэзэ хэушъхьафыкIыгъэ плакатэу «Сохрани детскую жизнь» зыфиIорэр ашIыгъ. Ар кIэлэцIыкIухэм аIыгъэу, инспекторхэр апэ итхэу гъогум къытехьэхи, щынэгъончъагъэм къыфэджагъэх. ГъогурыкIоным ишапхъэхэр амыукъонхэу, лъэсрыкIохэр благъэкIынхэу, сакъыныгъэ къызхагъэфэнэу водительхэм зафагъэзагъ.

Водительхэм гъогурыкIоным ишапхъэхэр агъэцэкIэнхэу зэрэщытыр нахь къагурыIонымкIэ мыщ фэдэ Iоф­тхьабзэхэм яшIуагъэ къэкIонэу инспекторхэр щэгугъых.

Волонтерхэр къыфэджагъэх

Бжыхьэ- кIымэфэ лъэхъаным пасэу мэзахэ къы­зэрэхъурэм къыхэкIэу лъэсрыкIохэм нэфынэр къэзытырэ пкъыгъохэр нахьыбэрэ агъэфедэнхэм Къэралыгъо автоинспекторхэм волонтерхэр ягъусэхэу къыфэ­джагъэх.

ГъогурыкIоным хэлажьэхэрэм нэфынэр къэзытырэ пкъыгъохэр агъэфедэнхэу зэрэщытым епхыгъэ пэшIорыгъэшъ зэдэгущыIэгъухэр инспекторхэмрэ волонтерхэмрэ республикэм икъэлэ гупчэ иурамхэм щадашIыгъэх.

Iофтхьабзэр окIофэ автомобильхэр зыщызекIорэ гъогум сакъыныгъэ къазыщыхэмыфэкIэ, ащ тхьамыкIагъо къыкIэлъыкIон зэрилъэкIыщтыр агу къагъэ­кIыжьыгъ. Сыдигъуи гуфаплъэу ыкIи гъогу зыпырыкIыным ишапхъэхэр амыукъонхэу зафагъэзагъ.

Ащ имызакъоу, пчыхьэшъхьэ уахътэм лъэсрыкIохэр гъогум нахь къыщылъэгъонхэм фэшI нэфынэр къэзытырэ хэушъхьафыкIыгъэ пкъыгъохэр агъэфедэнхэу Iофтхьабзэм изэхэщакIохэм цIыфхэм араIуагъ. Ащ ишIуагъэкIэ гъогу хъугъэ-шIагъэхэр нахь макIэ хъунхэм яцыхьэ телъ.

Рэзэныгъэ гущыIэхэр

Мыекъопэ районымкIэ цIыфхэр зезыщэрэ автобусым иводитель Къэралыгъо автоинспекторхэр IэпыIэгъу къызэрэфэхъугъэ­хэмкIэ рэзэныгъэ тхыгъэ къафигъэхьыгъ.

Адыгеим игъогу-патруль къулыкъу иIофышIэхэу старшэ лейтенантэу Тэмыкъое Къэплъанрэ лейтенантэу Сергей Изотовымрэ мафэм къулыкъур ахьызэ, автобусэу цIыфхэр зезыщэщтыгъэр кэнаум дэфагъэу къа­лъэгъугъ.

Полицейскэхэм мэкъэгъэIур хагъани, хъугъэ-шIа­гъэр къызыщыхъугъэм псынкIэу нэсыгъэх. Водителыр ыкIи ащ дисыгъэхэр зэрэмыфыкъуагъэхэм инспекторхэм зыщагъэгъозагъ. Нэужым а чIыпIэм гъогурыкIоныр щынэгъончъэу щагъэпси, транспортым икъыдэхыжьын къулыкъушIэхэр фежьагъэх.

Осыр зэратхъурэ автомобилымкIэ ар гъогум къытырагъэуцожьыгъ.

Водителым къызэриIуагъэмкIэ, гъогур зэрэцIэнлъа­гъом ар къыхэкIыгъ ыкIи инспекторхэр IэпыIэгъу къызэрэфэхъугъэхэмкIэ лъэшэу афэраз.

Водительхэм кIымэфэ гъогум нахь сакъыныгъэ къызщыхагъэфэнэу ыкIи псынкIэу мызекIонхэу зэрэщытыр полицейскэхэм агу къагъэкIыжьы.

Уимылъэныкъо утехьаныр щынагъо

Адыгеим игъогухэм къатехъухьэрэ хъу­гъэ-шIагъэхэр нахьыбэрэмкIэ къызыхэкIырэ ушъхьагъухэм зэу ащыщ апэ къикIырэ машинэм ылъэныкъо зэрэтехьэхэрэр. Ар щынэгъошхоу зэрэщытыр къизыIотыкIырэ Iофтхьабзэ бэмышIэу инспекторхэм ра­гъэкIокIыгъ.

ГущыIэхэу «машинэм удэхыным» ыкIи «ыпэ уишъы­ным» ямэхьанэ водителыбэхэм зэхагъэкIуакIэ. Ахэм япроцент 22-р зэрэщынагъор ашIэзэ, мафэ къэс ямылъэныкъо гъогу техьэх.

Мы хэукъоныгъэр къэмыгъэхъугъэным фэIорышIэрэ пэшIорыгъэшъ Iофтхьабзэ Мыекъопэ районым пхырыкIырэ федеральнэ гъогум Къэралыгъо инспекторхэм щызэхащагъ.

Зефэныр зикIасэхэм упчIэ шъхьаIэу «Уицыхьэ телъа машинэм узэрэдэхыщтым?» зыфиIорэр аратыгъ. А зекIуакIэр анахь щынагъохэм ащыщ ыкIи ар скорость лъэшым епхыгъ.

ГъогурыкIоным хэлажьэхэрэм сакъыныгъэрэ гу­лъытэрэ къызхагъэфэнхэу, шъхьэкIафэ зэфыряIэнэу, ежьхэми ыкIи машинэм къадисхэми ящыIэныгъэ фэсакъынхэу полицейскэхэр къяджагъэх.

Ешъуагъэхэр къыхагъэщыгъэх

Адыгеим и Къэралыгъо автоинспекторхэм общественностым ыкIи къэбар жъугъэм иамалхэм ялIыкIохэр ягъусэхэу ешъуагъэу автомобилыр зезыфэхэрэм якъыхэгъэщын фэIорышIэрэ Iофтхьабзэр рагъэкIокIыгъ.

Ащ изэхэщэн наряд купи 10, къулыкъушIэ 70-рэ фэдиз хэлэжьагъ. ПэшIорыгъэшъ Iофтхьабзэу «Нетрезвый водитель» зыфиIорэм къырагъэблэгъагъэх АР-м хэгъэгу кIоцI IофхэмкIэ и Министерствэ и Общественнэ совет хэт Джыгунэ ФатIимэт, къэлэ отделым и Общественнэ совет илIыкIоу Олег Бужинскэр.

Джащ фэдэу, къоджэ псэупIэхэм япащэхэр, народнэ депутатхэм я Совет хэтхэр, Урысые общественнэ организациеу «НыбжьыкIэ гвардием», автомобилистхэм я Урысые обществэ ялIыкIохэр ащ хэлэжьагъэх.

Рейдыр зэрэщыIэщтым икъэбар амал зэфэшъхьафхэмкIэ цIыфхэм арагъэIугъ: Къэралыгъо автоинспекцием исайт, «Говорит Майкоп», «Дорожное радио», «Ретро FM», «Русское радио», «Европа Плюс Майкоп».

Iофтхьабзэр окIофэ гъогурыкIоным ишапхъэхэр гъогогъу 45-рэ аукъуагъэу инспекторхэм агъэунэ­фыгъ: зефэнымкIэ фитыныгъэр зэримыIэжьымкIэ, водителыр зыдэщыс бгъум иапч узэрэхэмыплъышъурэр — укъо­ныгъэ 19; щынэгъончъэ бгырыпхыр амыгъэфедагъэу, «ЕзыгъэжьэгъэкIэ водитель» тамыгъэр атемытхагъэу, административнэ тазырыр игъом амытыгъэу, нэмыкI­хэри.

НэкIубгъор къэзыгъэхьазырыгъэр Iэшъынэ Сусан.