Хэгъэгум и Къыблэ шъолъыр самбэмкIэ изэнэкъокъу Ермэл­хьаблэ щыкIуагъ.

2001 — 2003-рэ илъэсхэм къэхъугъэ кIалэхэр, пшъашъэхэр яонтэгъугъэхэм ялъы­тыгъэу алырэгъум щызэхащэгъэ зэIукIэгъу­хэм ахэлэжьагъэх.

Краснодар краим, Астрахань, Волгоград, Ростов хэкухэм, Адыгэ Республикэм ябэ-нэкIо 200 фэдиз зэнэкъокъугъ. Адыгеим самбэмкIэ ихэшыпыкIыгъэ командэ медали 7 къыдихыгъ.

Гъомлэшк Анзор, кг 53-рэ, Тыгъужъ ТIахьир, кг 58-рэ, Мерэм Нарт, кг 71-рэ, Анна Лодяновам, кг 65-рэ, Мыгу Миланэ, кг 72-рэ, апэрэ чIыпIэхэр къыдахыгъэх.

Гъогъо Азэмат, кг 58-рэ, Хьакъуй Амир, кг 71-рэ, ящэнэрэ чIыпIэхэр къахьыгъэх.

Тренер-кIэлэегъаджэхэу Делэкъо Адамэ, Гъомлэшк Алый, Хьакурынэ Дамир, Хьабэхъу Адамэ, Акъущ Бислъан, Адзынэ Алый, Мерэм Саидэ, Беданыкъо Байзэт бэнакIохэм япащэх.

ХагъэунэфыкIырэ чIыпIэхэр къыдэзы­хыгъэхэр Урысыем иныбжьыкIэхэм якIэух зэнэкъокъоу 2021-рэ илъэсым, мэзаем Ханты-Мансийскэ щыкIощтым хэлэжьэщтых.

— Адыгеим иныбжьыкIэхэр анахь дэгъоу бэнагъэхэм ащыщых, — къытиIуагъ рес­пуб­ликэм самбэмкIэ иеджапIэ ипащэу, спортымкIэ дунэе класс зиIэ мастерэу Делэкъо Адамэ. — Гъомлэшк Анзор, Тыгъужъ ТIа­хьир, Хьакъуй Амир хэгъэгум изэнэкъокъу­хэм, дунаим иныбжьыкIэхэм язэIукIэгъухэм ахэлажьэх. ТиныбжьыкIэхэм яIэпэIэсэныгъэ зэрэхагъэхъощтым тренерхэр пылъых.

Ермэлхьаблэ щыкIогъэ зэнэкъокъум Адыге­им щыщхэу Хъот Юнысрэ ГуIэтыжь Хъалидэрэ зэхэщэн Iофыгъохэм чанэу ахэ­лэжьагъэх. НэбгыритIури судьяу щытыгъэх, япшъэрылъхэр дэгъоу агъэцэкIагъэх.