Адыгэ Республикэм и ЛIышъхьэу КъумпIыл Муратрэ пшъэдэкIыжьэу ыхьырэмкIэ гъу­нэпкъэ гъэнэфагъэ зиIэ обществэу «Газ­пром межрегионгаз» зыфиIорэм и Гене­ральнэ директорэу Сергей Густовымрэ ты­гъуасэ Санкт-Петербург IофшIэгъу зэIу­кIэгъу щызэдыряIагъ.

Адыгеим гъэстыныпхъэ шхъуан­тIэр къыIэкIэхьаным ипрограммэ игъэцэкIэн, газэу агъэ­федагъэмкIэ щыIэ деби­торскэ чIыфэр нахь макIэ шIыгъэным, газыпкIэр игъом къатыным иIофыгъохэм лъэныкъо­хэр тегущыIагъэх.

ПАО-у «Газпромым» иструктурнэ подразделениехэмрэ республикэм ихэбзэ къулы­къу­хэмрэ шIуагъэ къытэу Iоф зэ­рэзэдашIэрэр, тапэкIи ар лъыгъэкIотэгъэн зэрэфаер Сергей Густовым къыIуагъ.

КъумпIыл Мурат къызэрэхигъэщыгъэу, газ хъызмэтым шъо­­лъырым мэхьанэшхо щы­раты. ПАО-у «Газпромым» зэпхыныгъэ пытэ дыряIэу зэрэдэлажьэхэрэм ишIуагъэкIэ гъэ­стыныпхъэ шхъуантIэр зыIэкIахьэхэрэм япчъагъэ хэпшIыкIэу хэхъуагъ, мы къэгъэлъэгъонымкIэ пэрытныгъэ зыIыгъ шъолъырхэм

Адыгеир ащыщ.

Газпромым ипрограммэ ­игъэцэкIэн къыдыхэлъытагъэу 2016— 2020-рэ илъэсхэм рес­публикэм щызэшIуахыгъэр бэ. Джащ фэдэу газыпкIэр игъом къатынымкIэ, гъэстыныпхъэ шхъуантIэм фытегъэпсыхьэгъэ оборудованиер щынэгъончъэу гъэфедэгъэнымкIэ, нэмыкI лъэ­ныкъохэмкIи шъолъырым Iофы­шхо щагъэцакIэ. Ащ нэмыкIэу, социальнэ программэу «Газпром — детям» зыфиIорэм къыдыхэлъытагъэу спорт площадки 9 Адыгеим щагъэпсыгъ. АщкIэ зишIуагъэ къэкIуагъэр АР-м и ЛIышъхьэу КъумпIыл Муратрэ ПАО-у «Газпром» зы­фиIорэм и Правление и Тхьа­матэу Алексей Миллеррэ зэ­дашIыгъэ зэзэгъыныгъэр ары.

— ТапэкIэ хэхъоныгъэ тшIыным непэ тыдэлажьэ. Ащ дакIоу шъолъырыр лъэгэпIэ инхэм анэсыныр, инвестициехэмкIэ хъопсагъоу щытыныр анахьэу зэпхыгъэр энергети­ческэ инфраструктурэ зэтегъэ­псыхьагъэ щыIэныр ары. Ащ къыхэкIыкIэ непэ пшъэрылъ шъхьаIэу тапашъхьэ щытыр энергокIуачIэхэм ахэгъэхъо­гъэныр ары, ащ хэхьэ газыри. Мы Iофыгъом изэшIохын экономикэм хэхъоныгъэ ышIыным зэрэфэIорышIэщтым дакIоу, цIыфхэм ящыIэкIэ-псэукIэ на­хьышIу шIыгъэным фэIорышIэщт, — къыIуагъ КъумпIыл Мурат.

АР-м и ЛIышъхьэ къызэрэхигъэщыгъэмкIэ, газыр къыз­IэкIэхьэрэ ыкIи зыгъэфедэрэ пстэуми ащ ыпкIэ игъом къатыным анаIэ тырагъэты. МыщкIэ шъолъыр ыкIи муниципальнэ бюджетхэм зи чIыфэ ателъэп.

Мы лъэныкъомкIэ респуб­ликэм хэхъоныгъэ ышIыным фытегъэпсыхьэгъэ Iофтхьабзэ­хэр щыIэныгъэм щыпхырыщыгъэнхэм мэхьанэшхо зэриIэр Адыгеим ипащэ хигъэунэфы­кIыгъ. Ащ фэшI КъумпIыл Муратрэ Алексей Миллеррэ 2020-рэ илъэсым чъэпыогъум и 16-м зэзэгъыныгъэм зэдыкIэтхагъэх. Программэр 2021 — 2025-рэ илъэс­хэм ателъытагъ, инвестициехэр сомэ миллиарди 3-м ехъу. Ащ ишIуагъэкIэ социальнэ мэхьанэ зиIэ проектыбэхэр гъэцэкIагъэхэ хъущт, шъолъырым игазификацие процент 95,97-м кIэхьащт.

Адыгэ Республикэм и ЛIышъхьэ ипресс-къулыкъу