Урысые Федерацием и Правительствэ ыухэсыгъ коронавирусым пэуцужьырэ медицинэ IофышIэхэу Адыгэ Республикэм исхэм апае джыри сомэ мин 25852,4-рэ къыхэгъэкIыгъэнэу.

Правительствэм унашъор зи­штагъэр Адыгэ Республикэм ыцIэкIэ Къэралыгъо Думэм идепутатэу, Урысые политикэ партиеу «Единэ Россием» хэтэу Владислав Резник IэпыIэгъу къафэхъузэ, Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие къызыды­регъэштэ нэуж ары. Мылъкур Урысые Федерацием иIэпэчIэгъэнэ фонд къыхагъэкIыщт.

Депутатым зэрэхигъэунэфыкIыгъэмкIэ, медицинэ ыкIи нэмыкI организациехэм яIофы­шIэхэу COVID-19-р къызэутэлIагъэхэм яIазэхэрэм 2020-рэ илъэсым ахъщэ тедзэ ятыгъэным телъытагъэу Адыгэ Рес­публикэм дотациехэр къыфы­хагъэкIыщтых.

Урысые Федерацием и Федеральнэ ЗэIукIэ бюджет мылъкур атегощэгъэнымкIэ ико­миссие сомэ мин 23708,2-рэ джыри Адыгеим къыфыхэгъэкIыгъэным ехьылIагъэу Урысые Федерацием и Правительствэ предложениеу къыхьыгъэм къы­дыригъэштагъ. Урысые Феде­рацием и Правительствэ ышIыгъэ унашъохэм адиштэу медицинэ ыкIи нэмыкI IофышIэхэу 2020-рэ илъэсым IофшIэн къин зыгъэцэкIагъэхэм яотпускхэм, ахэм амыгъэфедэгъэ отпускхэм апае компенсациехэр ятыгъэнхэм а мылъкур апэIуагъэ­хьащт. Охътэ благъэм Правительствэм ищыкIэгъэ унашъохэр ыштэщтых. Шъугу къэтэгъэкIы­жьы а гухэлъхэм апае Адыгеим бэдзэогъум сомэ миллиони 8,4-рэ къызэрэфыхагъэкIыгъагъэр.

Владислав Резник зэрэхи­гъэу­нэфыкIыгъэмкIэ, Урысые Фе­дерацием и Президент къафишIыгъэ пшъэрылъхэр агъэцакIэхэзэ, Федеральнэ ЗэIукIэм бюджет мылъкур атегощэгъэнымкIэ икомиссиерэ Урысые Федерацием и Правительствэ-рэ ахэм финанс IэпыIэгъу ятыгъэным епхыгъэ Iофыр зэрэ­лъагъэкIуатэрэр.

Урысые Федерацием и Президентэу Владимир Путиным къафишIыгъэ пшъэрылъхэр зэрагъэцакIэхэрэм, республикэм къыфыхагъэкIыгъэ мылъкур зэ­рагъэфедэрэм Адыгэ Респуб­ликэм и ЛIышъхьэу КъумпIыл Мурат лъэшэу гъунэ алъефы.

Шъугу къэтэгъэкIыжьы Адыге­им ипащэ бэмышIэу пшъэрылъ зэрафишIыгъэм тетэу медицинэ IофышIэхэу коронавирусыр къы­зэутэлIагъэхэм яIазэхэрэм хэ­бзэ къулыкъухэм ятранспорт къызфагъэфедэнэу амал яIэ зэрэхъугъэр. Джащ фэдэу Адыге­им и ЛIышъхьэ пшъэрылъ къыгъэуцугъ волонтер движениемкIэ амалэу щыIэхэр икъоу къызфагъэфедэнхэу, корона­вирусым пэуцужьрэ пстэури яIофшIэн кIэгъэгушIугъэнхэу.

Адыгэ Республикэм и ЛIышъхьэ ипресс-къулыкъу