Проектэу «Через знания к здоровью» зыфиIорэм къыдыхэлъытагъэу къэбарлъыгъэIэс Iофтхьабзэ Адыгеим имедицинэ IофышIэхэм я Ассоциацие зэхищагъ.

Зэпахырэ уз щынагъоу коронавирусым зызэрэщаухъу­мэщт шIыкIэхэр игъэкIотыгъэу Мые­къопэ районым гъэсэны­гъэмкIэ игупчэ икIэлэеджакIохэм къафаIотагъэх. Ассоциа­цием иIэпы­Iэгъугъ муковис­цидозыр къы­зэузырэ нахьыжъхэу ыкIи кIэлэцIыкIухэу сэкъатныгъэ зиIэхэм янэ-ятэхэм я Адыгэ шъолъыр общественнэ организациеу «На­дежда» зыфиIорэр.

Iофтхьабзэм хэлэжьагъэх медицинэ IофышIэхэм я Ассоциацие, АР-м и Общественнэ палатэ псауныгъэр къэухъумэгъэнымкIэ комиссием ятхьаматэу, проектым ипащэу Ва­лерий Ковалевыр, АР-м IофшIэнымкIэ ыкIи социальнэ хэ­хъоныгъэмкIэ и Министерствэ иIо­фышIэу Хъурэнэ Аслъан, Мыекъопэ район сымэджэщым иврач шъхьаIэу Алла Чернышевар, волонтерхэр.

— Мы уахътэ анахь гумэкIыгъоу щыIэныгъэм къыхэуцуагъэ­хэр коронавирусым зызэриу­шъомбгъурэр ары, — къеIуатэ Валерий Ковалевым. — Ар къызэузыхэрэм япчъагъэ лъэшэу хэхъо, ащ дакIоу, зэрэзэфыримыкъужьыхэрэм къыхэ­кIы­кIэ медикхэм яIофшIэн хьы­лъэ хъугъэ, IэпыIэгъу игъом ара­гъэ­гъотын алъэкIырэп. Ащ тыде­гупшыси, сымаджэхэрэм япчъа­гъэ нахь макIэ зышIынэу тлъы­тагъэр уз щынагъом икъэбар, ащ узэрэпэшIуекIощт шIыкIэхэр кIэлэцIыкIухэм алъыдгъэIэсы­хэмэ ны-тыхэм афаIотэ­жьыныр ары.

Проектэу «Через знания к здоровью» зыфиIорэм социальнэ мэхьанэ иIэу щыт ыкIи рес­публикэ бюджетым къикIыгъэу ахъщэ IэпыIэгъу ыгъотыгъ. Ащ игъэцэкIэн едзыгъуитIоу зэтеутыгъ. Апэрэр — COVID-19-р профилактикэ шIыгъэнымкIэ анахь IофшIэгъэ дэгъу къэ­зыгъэхьазырыщтыр. Ащ епхыгъэ зэнэкъокъур МГТУ-м ыкIи Мыекъопэ медицинэ колледжым ястудентхэм азыфагу Iоныгъом щыкIуагъ. Анахь IофшIэгъэ дэгъур специалистхэм къыхахыгъ. Джы ар кIэлэеджакIохэм ви­деоролик шIыгъэу къафагъэлъа­гъо — ар ятIонэрэ едзыгъу.

— Къэдгъэхьазырыгъэ презентацием коронавирусыр зыщыщыр, ащ узэрэпэуцужьыщтыр, тэрэзэу Iэхэр зэрэптхьа­кIынхэ фаер, нэмыкIхэри къыреIотыкIых, — къыIуагъ волонтерэу, МГТУ-м имедицинэ институт ия 2-рэ курс щеджэрэ Ксения Пиковам. — А зэпстэури цIыфхэм ашIэ фэд шъхьаем, икъоу ыкIи тэрэзэу агъэцакIэ­хэрэп. Вирусыр зэрэщыIэр бэ­хэм ашIошъ хъурэп, ар — къау­гупшысыгъэп, ар пытэу къытхэт. Коронавирусым зимыу­шъомбгъуным непэ тыкъыфэ­джэщт.

— Коронавирусым узэрэ­пэуцужьыщт шIыкIэ-амалхэр къизыIотыкIырэ видеороликым нэ­мыкIэу буклет мини 114-рэ дгъэхьазырыгъэх, — къеIуатэ Валерий Ковалевым. — Ащ пэIухьэгъэ сомэ мин 600-р АР-м псауныгъэр къэухъумэ­гъэнымкIэ и Министерствэ къы­тIупщыгъ. Джащ фэдэу, IофшIэнымкIэ ыкIи социальнэ хэ­хъоныгъэмкIэ министерствэм имылъкукIэ кIышъом намыгъэсырэ термометрэу къэтщэфыгъэхэр еджапIэхэм зырызэу афэдгощыщтых.

НыбжьыкIэхэр ашIогъэшIэ­гъонэу видеороликым еплъы­гъэх, волонтер-медикхэм къа­Iотагъэхэм ядэIугъэх, зыгъэгу­мэкIырэ упчIэхэм яджэуапхэр агъотыгъэх.

ШъушIэным пае, проектэу «Через знания к здоровью» зыфиIорэр 2020-рэ илъэсым Iоныгъом и 1-м къыщегъэжьагъэу тыгъэгъазэм и 10-м нэс Мыекъопэ районым щыпхы­ращы. Коронавирусым лъэшэу зызэриушъомбгъурэм къыхэ­кIыкIэ джы ар нэмыкI район­хэми щалъагъэкIотэнэу рахъу­хьагъ. Зэпахырэ узым зыщаухъумэнымкIэ хэшIыкIэу фыряIэм зыкъегъэIэтыгъэныр, цIыфхэм япсауныгъэ къызэ­тегъэнэгъэным, волонтерхэм ясатыр кIэлэеджакIохэр хэщэгъэнхэм мы проектыр фэIорышIэ ыкIи нэбгырэ мини 10 фэдизмэ ясоциальнэ Iофыгъохэр къызэлъырагъэубытынэу ра­хъухьэ.

Iэшъынэ Сусан.