Нэбгырэ 1100-м ателъытэгъэ еджапIэу Адыгеим икъэлэ шъхьаIэ щырагъэжьагъэм ишIын илъэсыр имыкIызэ аухын фаеу щыт.

Гъэсэныгъэм иучреждениякIэ АР-м и ЛIы­шъхьэу КъумпIыл Мурат иIэпыIэгъукIэ лъэпкъ проектэу «Гъэсэныгъэм» ипхырыщын пае атIуп­щыгъэ шъолъыр проектэу «Современная школа» зыфиIорэм ишIуагъэкIэ агъэуцу.

Мыекъуапэ псэупIэ­-коммунальнэ хъызмэтымкIэ ыкIи къалэм изэтегъэпсыхьанкIэ и Гъэ­IорышIапIэ къызэрэщаIуа­гъэмкIэ, инженернэ псэуа­лъэу ыкIоцIыкIэ щыIэн фаехэр ашIыгъахэх, ыкIыбкIэ гъэзагъэхэр ращалIэх. Джащ фэдэу щагум дэ­тыщт спорт площадкэр аухы, футбол ешIапIэу ащ хэтыр хьазыр, псэуалъэ­хэр агъэуцух.

Урамхэу Васильевым, Гоголым ыкIи Кобл Якъубэ ацIэ зыхьыхэрэм яIа­хьэу еджапIэм къызэлъиу­бытыхэрэм гъогухэр ащагъэкIэжьыгъэх. Ахэм лъэс­рыкIо гъогухэр ащагъэ­псы­гъэх, тамыгъэхэр, «Т7» зыфиIорэ шапхъэм­кIэ шIыгъэ гъозэрыплъэ­хэр, нэмыкIэу ищыкIагъэ­хэр ащагъэуцугъэх. Еджа­пIэм пэмычыжьэу об­щественнэ транспортыр къыз­щы­у­цущтхэри къыда­лъыта-гъэх.

ГъэIорышIапIэм къы­зэритыгъэмкIэ, урамхэу Остапенкэм ыцIэ зыхьырэмрэ «12 Марта» зыфиIорэмрэ гъогухэр аща­шIынхэу рагъэжьагъ.

— Мы районым зеу­шъомбгъу, арышъ, лъэхъа­ным диштэу инфраструктурэ ищыкIагъ, — къы­Iуагъ Мыекъуапэ имэрэу Андрей Гетмановым. — ГъогукIэхэм еджапIэм екIолIэгъошIу къашIыщт. ЕтIани мыщ дэжьым фэтэрыбэу зэхэт унэхэр ща­гъэуцух, Лъэпкъ хъарзынэщыри щыт. Гъэсэ­ныгъэм иучреждениякIэу ашIыгъэр тIупщыгъэным ыпэкIэ гъогушIын IофшIэнхэр зэкIэ тыухынхэу АР-м и ЛIышъхьэ къытфигъэпытагъ. Ахэр игъом зэрэзэшIотхыщтхэм имызакъоу, шапхъэхэм адиштэу тшIынхэр типшъэрылъ шъхьа­Iэхэм ащыщ.

Сурэтхэр Мыекъопэ къэлэ администрацием исайт къихыгъэх.