2021-рэ илъэсымкIэ ыкIи 2022 — 2023-рэ илъэсхэм ячэзыу пIалъэ­кIэ федеральнэ бюджетым ипроект ятIонэрэ хэплъэгъумкIэ Урысые Федерацием и Къэралыгъо Думэ шэкIогъум и 24-м щаштагъ.

Джащ фэдэу федеральнэ бюджетым итрансфертхэр шъо­лъырхэм зэратырагощэщтри аухэсыгъ. 2021-рэ илъэсым федеральнэ бюджетым имылъкоу сомэ миллиард 19 фэдиз Адыгэ Республикэм къыIукIэщт. Ахэр дотацие, субвенцие, субсидие зэфэшъхьафхэу социальнэ пшъэрылъхэр агъэцэкIэн­хэмкIэ шъолъырхэр зыфыщыкIэрэ мылъкур къизыгъэкъу­жьыщтхэр ары.

Адыгеим и ЛIышъхьэу КъумпIыл Мурат зэрэхигъэунэфы­кIыгъэмкIэ, 2021-рэ илъэсымкIэ ыкIи 2022 — 2023-рэ илъэсхэм ячэзыу пIалъэкIэ Адыгэ Рес­публикэм иреспубликэ бюджет ипроект изэхэгъэуцон ыкIэм фэкIо. Ар зэхагъэуцо зэхъум анахьэу анаIэ зытырагъэтыгъэр социальнэ лъэныкъор ары. Федеральнэ гупчэм иIэпыIэгъу шъолъырымкIэ мэхьанэшхо иI.

Шъугу къэтэгъэкIыжьы, бюджетым ипроект дэлэжьэжьыхэ зэхъум, Къэралыгъо Думэм бюд­жетымкIэ и Комитетрэ Правительствэмрэ зэрэзэгурыIуагъэхэм ишIуагъэкIэ федеральнэ IэпыIэгъоу республикэм къы­IукIэщтым сомэ миллиарди 8 къызэрэхэхъуагъэр, сомэ миллиард 19 фэдиз ар зэрэхъущтыр.

Гъэтэрэзыжьынхэу къахалъхьагъэхэм къадырагъэштэнымкIэ зишIуагъэ къэкIуагъэр респуб­ликэм ипащэхэмрэ Урысые Фе­дерацием и Правительствэрэ лъэныкъуищ зыхэхьэрэ комиссием зэрэхэлэжьагъэхэр, комис­сием, Къэралыгъо Думэм ибюд­жет Комитет ахэтэу, Адыгеим ыцIэкIэ депутатэу, Урысые по­литикэ партиеу «Единэ Россием» хэтэу Владислав Резник Iэпы­Iэгъу къазэрафэхъугъэр ары.

Ащ зэрэхигъэунэфыкIыгъэмкIэ, республикэм къыфыхагъэ­кIыщт трансфертхэр субсидие, дотацие, субвенцие лъэпкъи 130-м ехъумэ атырагощагъ. Фе­деральнэ IэпыIэгъур социальнэ лъэныкъом, гъэсэныгъэм, псауныгъэм икъэухъумэн, культурэм, спортым хэхъоныгъэ ягъэшIыгъэным фэIорышIэщт. Республикэм иэкономикэ, имэкъу-мэщ, икъуаджэхэм хэхъоныгъэ ягъэшIыгъэным, джырэ шапхъэхэм адиштэу къалэхэр зэтегъэпсыхьэгъэнхэм, зекIо кластерхэм ягъэпсын, нэмыкI Iофыгъохэу Адыгеим исхэмкIэ мэхьанэшхо зиIэхэм язэшIохын а мылъкур апэIуагъэхьащт.

Адыгэ Республикэм и ЛIышъхьэ ипресс-къулыкъу