Урысые народнэ фронтым ишъолъыр къутамэу Адыгеим щыIэм игу­къэкIкIэ лъыхъон дзэ-патриотическэ клубэу «Патриот» зыфиIорэр республикэм щызэхащагъ. Ащ районхэм ащеджэрэ кIэлэеджакIохэр зэрипхыщтых.

— Хэгъэгу зэошхор зау­хы­гъэр илъэс 75-рэ хъугъэ, ау джы къызнэсыгъэм зыдэщыIэ амышIэу ащ щыфэхыгъэ дзэ­кIолIхэм алъэхъух. Титарихъыр тшIэн, ар къыткIэхъухьэрэ лIэ­ужхэм афэтIотэн фае. Клубым хэт ныбжьыкIэхэм тарихъым нэIуасэ зыфашIын, дзэкIолIхэм, зэо лъэхъаным афэгъэ­хьыгъэ къэбархэм защагъэгъо­зэн алъэкIыщт. Ау пстэуми анахь шъхьаIэр — Хэгъэгум иухъумакIохэм яшIэжь къэухъу­мэгъэным яIахьышIу хашIыхьан амал зэряIэщтыр ары, — къы­Iуагъ «Урысые лъыхъон движением» ипащэу, ОНФ-м иактивистэу Иван Партной.

Непэ клубым кIэлэеджэкIо 200-м ехъу хэт. Хэгъэгу зэо­шхом илъэхъан Адыгеим къыщыхъугъэ къэбархэм якъэу­гъоин ахэр дэлэжьэщтых.

— Патриотическэ лъэныкъом епхыгъэ IофшIэнышхо егъэцакIэ Урысые народнэ фрон­тым. Проектэу щыIэныгъэм щы­пхырищыхэрэм яшIуагъэкIэ та­рихъыр ныбжьыкIэхэм ащыгъу­пшэщтэп, заом и ЛIыхъужъхэм ацIэ агъэлъэпIэщт, — къыIуагъ ОНФ-м икъутамэу Адыгеим щы­Iэм итхьамэтэгъоу, АР-м и Къэралыгъо Совет — Хасэм идепутатэу Цэй Эдуард.

Абрэдж Сэтэнай.