Коронавирусыр къызэолIагъэхэм зыщяIазэхэрэ госпиталэу поселкэу Инэм щагъэ­псыгъэм иприемнэ отделение ипащэу Бэгъушъэ Руслъан непэ Iофхэм язытет къы­тегущыIагъ.

АР-м псауныгъэр къэухъумэгъэнымкIэ и Министерствэ къызэритыгъэмкIэ, ар нахьыпэкIэ Инэм сымэ­джэщым инэмыкI отделение ипащэщтыгъ. Ащ лъэныкъо зэфэшъхьафхэр, хирургиер, терапиер, бзылъ­фыгъэхэм зыщяIазэхэрэр, сабыйхэр къызщыхъурэр хахьэщтыгъэх. Зэпахырэ узэу дунаир зэлъызыкIугъэр мыщ къызэсым сымэджэщыр зэфашIи, нэбгыри 100-мэ ателъытагъэу госпиталь щашIыгъ. Iоф щызышIэхэрэри режимыкIэм техьанхэ фаеу хъугъэ.

Шапхъэу ащ къыщыдэлъытагъэхэм ащыщхэм джы къызнэсыгъэм ясэгъуае къыфэхъоу еIо Руслъан. ГущыIэм пае, сымаджэхэм адэжь о узщыфаем учIэхьан плъэкIынэу зэ­рэщымытыр къыфэкъин. Ахэм уахэ­хьаным ыпэкIэ вирусым ущызыухъу­мэрэ щыгъынхэр зыщыплъэнхэ фае.

— Узыр къызежьакIэм нахьи джы IофшIэныр нахьыбэ хъугъэ, — ыIуагъ ащ. – Коронавирусыр къызэолIагъэхэм узщахэтырэ уахътэр сыхьатих, ау врачхэм ащ щаухырэп. Мы узым ахэр чэщи-мафи зэпымыоу ебэных пIоми хъущт. IофшIэгъу уахътэр гъэ­нэфа­гъэп, IофшIапIэм зыщыбгъэпсэфын фаеу мэхъу.

Руслъан цIыфхэм ахэмыхьэу, ядэжь мыкIожьэу IофшIапIэм зычIэсыр мэзитIуми ехъугъ. Иунагъуи ащ фэдизым ылъэгъугъэп, зигъэпсэфынэу охътэ кIэкIэу къыхэкIырэм телефонкIэ адэгущыIэ ныIэп.

— Ащ фэдэ IофшIакIэм нэмыкI хэкIыпIэ зэрэщымыIэр, аущтэу ренэу зэрэщымытыщтыр, гъунэ зэрэ­фэхъущтыр сигупсэхэм къагурэIо, — еIо ащ.