Партийнэ проектэу «Урысыем икъуаджэхэр» зыфиIорэм иобщест­вен­нэ совет изэхэсыгъоу бэмышIэу щыIагъэм партием и Тхьаматэу Дмит­рий Медведевым къызэрэщиIуагъэмкIэ, «Единэ Россиемрэ» Уры­сые Федерацием иминистрэхэм я Кабинетрэ программэу «Къуаджэхэм хэхъоныгъэ ягъэшIыгъэныр» зыфиIорэм мылъку къызэрэфы­хагъэкIыщтым епхыгъэ Iофыгъохэм 2021-рэ илъэсым игъэтхапэ къафагъэзэжьыщт.

Зэхэсыгъом хэлэжьагъэх Урысые Федерацием мэкъу-­мэщымкIэ иминистрэу Дмитрий Патрушевыр, Урысыем фи­нансхэмкIэ иминистрэу Антон Силуановыр, шъолъырхэм япащэхэр.

Къэралыгъо программэу «Къуаджэхэм хэхъоныгъэ ягъэ­шIыгъэныр» зыфиIорэм игъэцэкIэн зыфежьагъэхэр мыгъ ары. Документым игъэхьазырын партиери хэлэжьагъ. Дмит­рий Медведевым къызэри­IуагъэмкIэ, илъэсыр имыкIызэ къуаджэхэм ипотекэ чIыфэ мин 30 фэдиз аратыщт, къуа­джэхэм язэтегъэпсыхьанкIэ про-ект мини 4 фэдиз агъэцэ­кIэщт, газрыкIопIэ километрэ 800-м ехъу, автомобиль гъогу километрэ 600-м ехъу агъэ­псыщт.

Мы программэм пае 2021-рэ илъэсымкIэ бюджетым ипроект диштэу сомэ миллиард 31-рэ къыхагъэкIыщт. НэмыкI стратегическэ проектхэми къуа­джэхэм хэхъоныгъэ языгъэ­шIыщт Iофтхьабзэхэр къащы­дэлъытагъэх.

«Гурыт еджапIэхэм, кIэлэ­цIыкIу IыгъыпIэхэм, культурэмкIэ унэхэм, спорт псэуалъэхэм яшIыни, зэращэрэ мо­бильнэ медицинэ комплексхэм яIэкIэгъэхьани, програм­мэхэу «Земскэ кIэлэегъадж», «Земскэ доктор» зыфиIохэрэм ащыгъэнэфэгъэ ахъщэр яты­гъэнри ыкIи нэмыкIхэри ахэм ахэхьэх», — къыIуагъ Дмитрий Медведевым.

Партием и Тхьаматэ зэхэсыгъом хэлажьэхэрэм агу къы­зэригъэкIыжьыгъэмкIэ, къуаджэ­хэм IэпыIэгъу афэхъугъэным тегъэпсыхьэгъэ гъэтэрэзыжьынхэр «Единэ Россием» ятIонэрэ хэплъэгъумкIэ ыштагъэх. Къуаджэхэм гурыт еджапIэхэр, кIэлэцIыкIу IыгъыпIэхэр, культурэм иунэхэр, спорт псэуалъэхэр ыкIи нэ­мыкIхэр ащыгъэпсыгъэнхэм пае 2021-рэ илъэсым сомэ миллиард 210-рэ фэдиз къы­хагъэкIыщт.

«Единэ Россием» и Генеральнэ совет исекретарэу Анд­рей Турчак зэрилъытэрэмкIэ, къоджэдэсхэмрэ къэлэ­дэсхэмрэ ящыIэкIэ-псэукIэ зыкъегъэIэтыгъэнымкIэ зэфэдэ амалхэр ягъэгъотыгъэнхэр пар­тием ипшъэрылъ шъхьаIэхэм зэу ащыщ. ГущыIэм пае, нэ­бгыри 100-м нахь макIэ зыдэс псэупIэхэм апае сомэ миллиарди 2 фэдиз зытефэщт агъэкощырэ медицинэ комплекс 304-рэ къэщэфыгъэн фаеу бюджетым ипроект щыгъэнэ­фагъ.

Бюджетым ипроект ятIонэрэу зыхэплъэщтхэм ехъулIэу къуаджэм исоциокультурнэ инфраструктурэ зегъэушъомбгъугъэным фэгъэхьыгъэ гъэтэрэзыжьынхэр партием ыштэщтых. «А мылъкум ишIуагъэкIэ культурэмкIэ унэ 300-м ехъу агъэ­псын, къоджэ еджэпIэ 907-мэ спортым щыпылъынхэу амал арагъэгъотын, къоджэдэсхэм яфэIо-фашIэхэр зыгъэцэкIэщт автоклуби 100-м ехъу аIэкIагъэ­хьан алъэкIыщт», — хигъэунэфыкIыгъ Андрей Турчак.

Зэхэсыгъом ащ къызэрэ­щиIуагъэмкIэ, социокультурнэ комплексхэр къуаджэхэм ащыгъэпсыгъэнхэмкIэ заявкэхэр къихьащт илъэсым «Единэ Рос­сием», Урысые Федерацием псэолъэшIынымкIэ и Минис­терствэ, Урысыем мэкъу-мэщымкIэ и Министерствэ аугъои­хэу аублэщт. ГущыIэр зыфэ­гъэ­хьыгъэр учреждение заулэ — администрациер, гурыт еджапIэр, кIэлэцIыкIу IыгъыпIэр, фельдшер-мамыку IэзапIэр, культурэм и Унэ, тхылъеджапIэр, почтэр, терминалхэр зы­чIэтыщт унэхэр гъэпсыгъэнхэр ары.

«Экономикэм ылъапсэу зэ­рэщытым епхыгъэу мэкъу-мэщым Адыгеим мэхьанэшхо щы­раты, — къыIуагъ Адыгэ Республикэм и Къэралыгъо Совет — Хасэм и Тхьаматэ игуадзэу, федеральнэ партийнэ проектэу «Урысыем икъуа­джэхэр» зыфиIорэм икоорди­наторэу, партием и Тхьаматэу Д. А. Медведевым ишъолъыр общественнэ приемнэ ипащэу Шъао Аскэр. — Республикэ парламентым идепутатхэри, Адыгэ Республикэм и Къэ­ра­лыгъо Совет — Хасэм и Тхьаматэу, «Единэ Россием» ифрак­цие ипащэу Владимир Нарожнэри мы гъэмафэ хъызмэтшIэпIэ заулэмэ тащыIагъ, губгъохэр зэралэжьырэр, пхъэшъхьэ-мы­шъхьэ чъыгхэм зэрадэлажьэ­хэрэр зэдгъэлъэгъугъ. Зэпахырэ узым зызэриушъомбгъугъэм емылъытыгъэу чIыгулэжьхэм гъэхъагъэхэр зэрашIыгъэм тигъэгушIуагъ. Мыгъэ пстэумкIи бжыхьэсэ тонн мин 553-рэ тиреспубликэ щыIуахыжьыгъ. Ащ фэдэ лэжьыгъэ бэгъуагъэ Адыгеим къыхьыжьэу зыкIи къыхэкIыгъэп. Адыгеим и ЛIы­шъхьэу, партием ишъолъыр къутамэ и Секретарэу КъумпIыл Мурат якIэщакIоу 2011-рэ илъэ­сым къыщегъэжьагъэу чъыгхэтэлэжьыным республикэм зыщырагъэушъомбгъу. Мэкъу-мэщым щылажьэхэрэми, респуб­ликэм ипащэхэми сэнэшъхьэлэжьыным лъэшэу анаIэ тырагъэты. 2021-рэ илъэсым къыщегъэжьагъэу мы отраслэр Адыгеим и АПК илъэныкъохэу апэрэ чэзыоу хэхъоныгъэ зэрагъэшIыщтхэм ахагъэ­хьащт.

Республикэм исхэм азыныкъом ехъур къуаджэхэм зэра­дэсыр къыдалъытэзэ, Адыгеим ипарламентариехэм къуаджэхэм зыкъягъэIэтыгъэным анаIэ тырагъэты. Къэралыгъо программэу «Къуаджэхэм хэхъоныгъэ ягъэшIыгъэныр» зыфи­Iорэм диштэу республикэм непэ Iофтхьэбзи 6 щызэрахьэ. Джащ фэдэу партийнэ проектхэм ягъэцэкIэни Адыгеим мэхьанэшхо щыраты. Культурэм иунэхэр агъэцэкIэжьых, гурыт еджапIэхэр агъэпсых, къоджэ еджапIэхэм ахэт спортзалхэр, гъогухэр агъэцэкIэжьых, къуа­джэхэр нахь зэтырагъэпсыхьэх. Къуаджэм дэгъоу щыпсэунхэмкIэ, Iоф щашIэнымкIэ афэлъэ­кIыщтыр зэкIэ ашIэ».