Хэукъоныгъэхэр къыхагъэщыгъэх

УФ-м и Генеральнэ прокуратурэ и ГъэIорышIэпIэ шъхьаIэ Темыр-Кавказ ыкIи Къыблэ федеральнэ шъолъырхэм хэбзэ­гъэуцугъэм къыдилъытэрэ къэралыгъо фэIо-фашIэхэр зэрэщагъэцакIэхэрэр ыуплъэкIугъэх.

Федеральнэ хэбзэгъэуцугъэр гъогогъу 400-м ехъу­рэ аукъуагъэу къыхагъэщыгъ, ахэр дагъэзыжьынхэм пае унэшъо 25-рэ афатхыгъ. Административнэ ыкIи дисциплинарнэ пшъэдэкIыжь 62-мэ арагъэхьыгъ.

Щысэ къэтхьын, Нижне-Волжскэ Ростехнадзорым и ГъэIорышIапIэ предпринимательхэм къэралыгъо фэIо-фашIэхэр мэзи 8-м къыкIоцI афигъэцэкIагъэхэп. УФ-м и Генеральнэ прокурор игуадзэу А. Кикоть иунашъокIэ ГъэIорышIапIэм ипащэ административнэ пшъэдэкIыжь, тазырэу сомэ мини 3 ыкIи мини 10 тыралъхьагъ. Джащ фэдэу хэукъоныгъэхэр дигъэзыжьынхэу фагъэпытагъ.

Коронавирус узыр зэпамыхынымкIэ уплъэкIунхэр къызэтегъэуцогъэнхэ фаеу УФ-м и Правительствэ и Тхьаматэ ышIыгъэ унашъор лъыплъэн къулыкъухэм янахьыбэм агъэцэкIагъэп.

Уголовнэ Iоф къызэIуахыгъ

АР-м хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ игъэIорышIапIэ икъулыкъушIэхэм пшъэ­дэкIыжьэу ыхьырэмкIэ гъунэпкъэ гъэ­нэфагъэ зиIэ обществэм ипащэ ылъэныкъокIэ уголовнэ Iофэу къызэIуахыгъэмкIэ материалхэр икIэрыкIэу къа­угъоигъэх.

ЗэрагъэунэфыгъэмкIэ, коммерцием епхыгъэ организацием ипащэ хэбзэнчъэу зекIуагъэ, АР-м имедицинэ учреждениехэм ащыщ горэм ипащэ къуалъхьэу сомэ миллионрэ мин 700-рэ ритыгъ.

Мыщ фэдэ шIыкIэмкIэ пащэм электроннэ зэнэкъо­къухэр организацием дишIыгъэх. Сомэ миллион 16 зыосэ медицинэ продукциер къызIэкIагъэхьанымкIэ обществэмрэ медицинэ учреждениемрэ зэзэгъыныгъэ зэдашIыгъ.

Урысые Федерацием и Следственнэ комитет иследственнэ ГъэIорышIапIэу Адыгэ Республикэм щыIэм обществэм ипащэ ылъэныкъокIэ уголовнэ Iоф къызэIуихыгъ. Ащ къызэригъэнафэрэмкIэ, пащэм илъэс 15-м нэс хьапс тыралъхьан алъэкIэщт.

НэкIубгъор къэзыгъэхьазырыгъэр КIарэ Фатим.