Зэпахырэ узэу дунаир зэлъызыкIугъэр тикъэралыгъо къызихьагъэм къыщегъэжьагъэу зыныбжь илъэс 60-м ехъугъэхэм ар къяолIэныр нахь щынагъоу зэрэщытыр Роспотребнадзорым етIупщыгъэу къеIо. Ахэм яиммунитеткIэ ащ фэдэ вирусыр зэрэкъиным къыхэкIэу, тхьабыл плъыр-стыр узыр (пневмония) е нэмыкI уз хьылъэ къафихьын ылъэкIыщт.

Коронавирусыр къызэузыгъэ цIыфым благъэу уекIуалIэмэ, гущыIэм пае, къэ­псыгъэмэ е къэпскагъэмэ, инфекциер къыпыпхынкIэ щынагъо. Ащ фэшI, нахьыжъхэр цIыфыбэ зыщызэхахьэрэ чIыпIэхэм нахь макIэу ащыIэхэмэ, общественнэ транспортыр нахь макIэу агъэфедэмэ нахьышIу. ЩапIэхэр, фэIо-фэшIэ зэфэшъхьафхэр зыщагъэцэкIэрэ гупчэхэр, нэмыкI организациехэр нахь макIэу къакIухьанхэ фае. Гъомылапхъэу нэмыкIэу ящыкIагъэр къащэфыщтмэ, коммунальнэ фэIо-фашIэхэм апкIэ атыщтмэ яIахьыл-гупсэхэр е социальнэ IофышIэхэр къадеIэнхэ алъэкIыщт.

Нахьыбэрэ аIэхэр атхьакIынхэ фае, къэбзэныгъэм мэхьэнэшхо иI. Урамым укъытекIыжьыгъэмэ, общественнэ чIыпIэ горэм ущыIагъэу унэм укъихьажьыгъэмэ, сабынкIэ птхьакIыныр шIокI зимыIэ Iоф. ПIэхэр шIойхэу унэгу уеIэжьы хъущтэп, вирусыр уипкъышъол хэбгъэхьанкIэ щынагъо. ПIэ птхьакIынэу амал щымыIэмэ, инфекциер зыукIырэ уц зыхэлъ салфеткэ зыдэпIыгъэу ащкIэ пIэхэри, пкъыгъоу пIыгъыхэри плъэкIынхэ фае.

ЗыгорэкIэ укъэсымэджагъэмэ, пэтхъу-Iутхъум имызакъоу, нэмыкI горэм укъыгъэгумэкIыгъэми, ор-орэу поликлиникэм умыкIоу, врачым укъеджэмэ нахьышIу. ШъуиIахьыл-гупсэхэм ащыщ IэкIыб къэрал къэкIыжьыгъэу пэтхъу-Iутхъур къеузыгъэмэ, благъэу шъуемы­кIуалI.

ЗэкIэми шъусакъ, псауныгъэ шъуиIэнэу тышъуфэлъаIо!