Адыгеим и ЛIышъхьэу КъумпIыл Мурат республикэм икIэлэеджэкIуищэу Урысые зэнэкъокъоу «Большая перемена» зыфиIорэм щатекIуагъэхэмрэ ахэм якIэлэегъаджэхэмрэ тыгъуасэ аIукIагъ.

Iофтхьабзэм хэлэжьагъэх Адыгэ Республикэм гъэсэны­гъэмрэ шIэныгъэмрэкIэ ими­нистрэу КIэрэщэ Анзаур, мы Министерствэм игъэIорышIапIэу кIэлэцIыкIухэмрэ ныбжьыкIэхэмрэ япIункIэ къэралыгъо политикэр пхырызыщырэм ипащэу Нэгъэрэкъо Алый, Урысые общественнэ-къэралыгъо кIэлэцIыкIу-ныбжьыкIэ организациеу «КIэлэеджакIохэм я Урысые движение» и Адыгэ шъолъыр къутамэ итхьаматэу Наталья Щербина.

Урысые зэнэкъокъур зэхэ­зыщагъэхэр АНО-у «Россия — страна возможностей», проектэу «Проектория» зыфи­Iохэрэр, кIэлэеджакIохэм я Урысые движение, федеральнэ къэралыгъо бюджет учреж­дениеу «Роспатриотцентр» зы­фиIорэр ары. Зэнэкъокъум изэхэщэнкIэ IэпыIэгъу къафэ­хъугъэх Урысые Федерацием гъэсэныгъэмкIэ и Министерствэ, Урысые Федерацием наукэмрэ апшъэрэ гъэсэныгъэм­рэкIэ и Министерствэ, ныбжьыкIэхэм яIофхэмкIэ Федеральнэ агентствэр.

КIэлэеджэкIо миллион фэдиз Iофтхьабзэм хэлэжьагъ. Адыгеим щыщ кIэлэеджэкIо мини 3,8-м ехъумэ заявкэ къа­тыгъагъ. Республикэм икIэлэ­еджэкIуищ зэнэкъокъум щате­кIуагъ.

Мыекъуапэ игурыт еджапIэу N 28-м щеджэрэ Дарья Бе­ляевамрэ хьисапымкIэ кIэлэ­егъаджэу Алексей Асеевымрэ лъэныкъоу «Твори!» зыфиIорэм щатекIуагъэх. Дарья ахъщэ шIу­хьафтынэу сомэ мин 200 къыфагъэшъошагъ.

Джэджэ районымкIэ гурыт еджапIэу N 10-м щеджэрэ Арина Колесниковамрэ ОБЖ-мрэ физкультурэмрэкIэ кIэлэегъа­джэу Виктор Колесниковымрэ лъэныкъоу «Будь здоров!» зыфиIорэм щатекIуагъэх. Аринэ ахъщэ шIухьафтынэу сомэ мил­лион къыфагъэшъошагъ, апшъэ­рэ еджапIэм чIахьэ зыхъукIэ ащ ипортфолио балли 5 фыхагъэхъощт.

Къалэу Мыекъуапэ илицееу N 35-м щеджэрэ Александр Коростовымрэ хьисапымкIэ кIэлэегъаджэу Татьяна Шепталенкэмрэ лъэныкъоу «Познавай Россию!» зыфиIорэм щатекIуагъэх. Александр ахъщэ шIухьафтынэу сомэ миллион къыфагъэшъошагъ, апшъэрэ еджа­пIэм чIахьэ зыхъукIэ ащ ипортфолио балли 5 фыхагъэ­хъощт.

Адыгеим и ЛIышъхьэ текIоны­гъэ къыдэзыхыгъэ кIэлэеджа­кIохэмрэ ахэм якIэлэегъаджэ­хэмрэ къафэгушIуагъ.

«ТапэкIэ текIоныгъэу шъу­шIыщтхэм мыр яублапIэу щыт. Урысыем икIэлэеджэкIо анахь дэгъухэм шъуахалъытагъ. А пстэур зишIуагъэр зэчыишIоу шъузэрэщытыр, шъуикIэлэ­егъа­джэхэм шъузэрядэIурэр ары. Iофышхо зэрэзэшIуахырэм пае шъуикIэлэегъаджэхэм тхьашъуе­гъэпсэу ясэIо. ШъуикIэлэегъа­джэхэри, шъуянэ-шъуятэхэри, тэри гъэхъагъэу шъушIыгъэхэм лъэшэу тарэгушхо. Шъо зэчыи­шIоу шъущыт, еджэнымкIи спор­тымкIи гъэхъэгъэшIухэр шъу­шIыгъэх, волонтер IофшIэнми чанэу шъухэлажьэ. ТачIыпIэ къиуцощтхэр — хэгъэгуми, рес­публикэми япатриот шъыпкъэ хъущтхэр къызэрэткIэхъухьэ­хэрэр непэ нэрылъэгъу къытфэхъугъ», — къыIуагъ КъумпIыл Мурат.

КIэлэеджакIохэм текIоныгъэр къыдахынымкIэ зишIуагъэ къэкIуагъэхэр зэIукIэгъум къыщаIотагъ. КIэлэеджакIохэм къы­зэраIуагъэмкIэ, ахэм япроект- хэр зытегъэпсыхьагъэхэр цIыфым лъэныкъо пстэумкIи хэ­хъо­ныгъэ егъэшIыгъэнымрэ со­циальнэ лъэныкъор гъэпытэгъэнымрэ ары. Тыкъэзыуцу­хьэрэ дунаир къэухъумэгъэнымкIэ, Адыгеим къыщыкIырэ уцхэр къызфагъэфедэхэзэ, шъоущыгъу уз зиIэхэм яIэзэгъэнымкIэ, кластерым изегъэушъом­бгъун­кIэ, ныбжьыкIэхэм щэIагъэ ахэ­лъынымкIэ гупшысэ гъэшIэгъонхэр ахэм къыраIотыкIыгъэх.

Зэнэкъокъум ифиналэу чъэпыогъум и 31-м къыщегъэжьагъэу шэкIогъум и 5-м нэс дунэе кIэлэцIыкIу гупчэу «Артек» щы­кIуагъэр ахэм агу къы­зэри­нэжьыгъэр къаIотагъ. Хэгъэгум и Президент кIэлэеджа­кIохэм шIуфэс къарихыгъ. Вла­димир Путиным зэрэхи­гъэу­нэфыкIы­гъэмкIэ, кIэлэеджа­кIохэм я Уры­сые зэнэкъокъоу «Большая перемена» зыфиIорэр Урысыем иеджэкIо минишъэ пчъагъэмэ яшIэныгъэрэ ясэнаущыгъэрэ къызыщагъэ­лъэгъон алъэкIыщт чIыпIэхэм зэу ащыщ.

ЗэIукIэгъум хэлэжьагъэхэм Адыгеим и ЛIышъхьэ, Адыгэ Республикэм гъэсэныгъэмрэ шIэныгъэмрэкIэ и Министерствэ, кIэлэегъаджэхэм тхьашъуегъэ­псэу раIуагъ республикэм ис ныбжьыкIэ зэчыишIухэм ренэу анаIэ зэратырагъэтырэм, Iэпы­Iэгъу зэрафэхъухэрэм афэшI. КIэлэцIыкIу технопаркэу «Кванториум», республикэ естест­веннэ-хьисап еджапIэр, волонтер движениер, юнармейцэхэм ядвижение, кIэлэеджакIохэм я Урысые движение ащкIэ амалышIоу зэрэщытхэр къаIуагъ.

КъумпIыл Мурат текIоныгъэр къыдэзыхыгъэхэм яеджэнкIэ джыри гъэхъэгъакIэхэр ашIынэу, республикэм яшъыпкъэу фэлэжьэнхэу афэлъэIуагъ. IэпэIэсэныгъэшхо зыхэлъ врачхэр, спортсменхэр, тренерхэр, информационнэ технологиехэмкIэ специалистхэр Адыгеим ищыкIагъэх. А лъэныкъохэм джыдэдэм республикэм зыщара­гъэушъомбгъу, ищыкIэгъэ инфраструктурэр агъэпсы.

Адыгеим и ЛIышъхьэ зэрэхигъэунэфыкIыгъэмкIэ, республи­кэм ихэбзэ къулыкъухэм Iэпэ­Iэсэныгъэ зыхэлъ ныбжьыкIэ специалистхэр ящыкIагъэх. Гу­рыт, сэнэхьат гъэсэныгъэр языгъэгъотырэ лъэныкъом Iоф­хэр нахьышIоу щызэхэщэгъэнхэм анаIэ тырагъэтыщт. КъумпIыл Мурат Адыгэ Республикэм гъэсэныгъэмрэ шIэныгъэм­рэкIэ иминистрэ пшъэрылъ фи­шIыгъ нэмыкI шъолъырхэм опытэу яIэр республикэм щигъэ­федэнэу, лъэпкъ проектэу «Гъэ­сэныгъ» зыфиIорэм, федеральнэ программэхэмрэ про­ект­хэмрэ къатырэ амалхэр икъоу къызфигъэфедэнхэу, урысые кIэлэцIыкIу гупчэхэу «Артек», «Орленок», «Сириус», «Смена» зыфиIохэрэм зэдэлэ­жьэныгъэу адыриIэр ыгъэлъэшынэу.

«ТапэкIэ шъоры тачIыпIэ къиуцощтхэр. Шъощ фэдэ кIэлэ­еджэкIо чанхэм, зэчыишIухэм шъуиамалхэм зыкъызэIуяжъугъэхынымкIэ непэ тфэлъэкIыщтыр зэкIэ тэшIэ. КIэлэеджакIо пэпчъ амалэу, шIэныгъэу иIэр икъоу иреспубликэ гупсэ къыщызфигъэфедэ тшIоигъу. Шъуи­щыIэныгъэ тапэкIэ республикэ гупсэм ешъупхынэу тыфай. КIэу къежьэрэ пстэуми защыжъугъэ­гъуаз, сыдигъуи нахьыбэ зэрэшъушIэщтым шъупылъ», — хигъэунэфыкIыгъ КъумпIыл Мурат.

ЗэIукIэгъум икIэух зэнэкъо­къум щатекIуагъэхэм тынхэр ара­тыжьыгъэх. Адыгеим и ЛIы­шъхьэ Урысые зэнэкъокъоу «Боль­шая перемена» зыфиIорэм щатекIуагъэхэм нэпэеплъ шIухьафтынхэмрэ ахъщэмрэ аритыжьыгъэх.

Адыгэ Республикэм и ЛIышъхьэ ипресс-къулыкъу