Медицинэ IофышIэхэм IэпыIэгъу афэхъух
Адыгэ Республикэм и ЛIышъхьэу КъумпIыл Мурат пшъэрылъ зэрафишIыгъэм тетэу республикэм ихэбзэ къулыкъухэм ятранспорт коронавирусыр къызпыхьагъэхэм яIэзэрэ медицинэ IофышIэхэм къызфагъэфедэн алъэкIыщт.
Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, коронавирусымрэ ОРВИ-мрэ къызэуталIэхэрэм япчъагъэ зыкъызэриIэтырэм епхыгъэу медицинэ IофышIэхэм агъэцэкIэн фэе Iофхэм хэпшIыкIэу къахэхъо. ОРВИ-м ыгъэгумэкIыхэрэм къазыщадекIокIырэ гупчэм мафэ къэс нэбгыри 100 фэдиз къеуалIэ. КовидымкIэ медицинэ бригади 9-мэ Мыекъуапэ Iоф щашIэ. Сымэджэ хьылъэхэм апае санитарнэ авиациер къызфагъэфедэу аублагъ.
Медицинэ бригадэхэм тэрэзэу Iоф ашIэным пае поликлиникэхэм машини 100-м нэс арапхыгъ. Поликлиникэхэм Iофэу атегъэуагъэр къафэгъэпсынкIэгъэнымкIэ амалэу щыIэхэр зэкIэ зэрахьанхэу, республикэм ихэбзэ къулыкъухэм, имуниципалитетхэм яавтотранспорт псауныгъэм икъэухъумэнкIэ къызфагъэфедэнэу Адыгеим и ЛIышъхьэ пшъэрылъ афишIыгъ.
ГущыIэм пае, Адыгэ Республикэм псауныгъэр къэухъумэгъэнымкIэ и Министерствэрэ муниципальнэ образованиехэм ащыIэ медицинэ организациехэмрэ язаявкэхэмкIэ хабзэм иреспубликэ, имуниципальнэ къулыкъухэм ятранспорт аратыщт. АщкIэ медикхэр IофшIапIэм, сымаджэм дэжь нагъэсынхэ, коронавирусыр къызэутэлIагъэхэм, сэкъатыныгъэ, хэужъыныхьэгъэ уз зиIэхэм Iэзэгъу уцхэр аIэкIагъэхьанхэ алъэкIыщт.
Урысые Iофтхьабзэу «ЗэкIэми тызэгъусэу» зыфиIорэм диштэу гуфакIохэр мы Iофым къыхэлажьэхэу аублагъ. Урысые народнэ фронтым ишъолъыр къутамэ кIэщакIо зэрэфэхъу-гъэм тетэу «Врачыр здакIорэм нэгъэс» зыфиIорэ Iофтхьабзэр республикэм щызэрахьэ. Унэе автотранспорт зиIэ гуфакIохэм поликлиникэхэм яадминистрациехэм язаявкэхэмкIэ медицинэ IофышIэхэр сымаджэхэм адэжь ащэх, Iэзэгъу уцхэр алъагъэIэсых.
Адыгеим и ЛIышъхьэ пшъэрылъ къыгъэуцугъ волонтер движениемкIэ амалэу щыIэхэр икъоу къызфагъэфедэнхэу, коронавирусым пэуцужьхэрэр гъэлъэпIэгъэнхэу, яIоф кIэгъэгушIугъэнхэу.
«Зэпахырэ узым зыкъызыщиштагъэм щегъэжьагъэу медицинэ учреждениехэм амалэу яIэхэм зыкъягъэIэтыгъэнымкIэ Iофышхо зэшIуахыгъ. ЦIыфхэм ящыIэныгъэрэ япсауныгъэрэ якъэухъумэнкIэ гугъу нахь ехьыхэрэр медицинэ IофышIэ-хэр ары. Ахэм ащыщыбэмэ яамалхэр гъунэм нэсыгъэу бэшIагъэу Iоф ашIэ. Непэ коронавирусымрэ ОРВИ-мрэ лъэшэу зыкъызыщаштэгъэ лъэхъаным ткIуачIэ зэдгъэуIун, медицинэ IофышIэхэм яIоф нахь къафэдгъэпсынкIэнымкIэ тфэлъэкIыщтыр зэкIэ тшIэн фае», — хигъэунэфыкIыгъ Адыгеим ипащэ.
Адыгэ Республикэм и ЛIышъхьэ ипресс-къулыкъу