КъэбарыкIэхэр
Гум «тхьашъуегъэпсэу» къышъуиIощт!
Инсультым пэуцужьыгъэным и Дунэе мафэ къыдыхэлъытэгъэ Iофтхьабзэу «Гум зыщеIэзэхэрэ мазэр» зыфиIорэр шэкIогъур екIыфэ лъагъэкIотагъ.
Мы Iофтхьабзэр къэлэдэсхэм лъэшэу агу рихьыгъ. Гупчэм иIофышIэхэм яшIуагъэкIэ шIоигъоныгъэ зиIэ пстэуми кардиовизорымкIэ агу ауплъэкIун, ялъыдэкIуае къафашын, къащэчырэр зэрагъэшIэн, специалист зэфэшъхьафхэр упчIэжьэгъу ашIынхэ амал яIагъ.
Iофтхьабзэм ишIуагъэкIэ нэбгырэ 300-м ехъу ауплъэкIугъ. Ахэм япроцент 55-м лъыдэкIуаер яIэу къахагъэщыгъ, ящыкIэгъэ Iэзэгъур афатхыгъ. Iофтхьабзэм волонтер-медикхэр чанэу хэлэжьагъэх: гу-лъынтфэ узхэм зэряIэзэщтхэ ыкIи зызэрэфэсакъыжьыщтхэ шIыкIэхэр зэрытхэгъэ тхьапэхэр къекIолIагъэхэм афагощыгъэх.
Джыри мы мазэр екIыфэ сыхьатыр 9-м къыщегъэжьагъэу 15.30-м нэс зыгу язгъэуплъэкIу зышIоигъо пстэури медицинэ профилактикэмкIэ гупчэм рагъэблагъэх. Ар зыдэщыIэр: къ. Мыекъуапэ, ур. Краснооктябрьскэр, 43-рэ. Гум «тхьашъуегъэпсэу» къышъуиIощт!
МашIор агъэкIосагъ
Къалэу Мыекъуапэ иурамэу Адыгейскэм тет щэпIэ чIыпIи 2-мэ машIом зыкъащиштагъэу шэкIогъум и 22-м сыхьатыр 11.20-м мэшIогъэкIуасэхэм макъэ къарагъэIугъ.
Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипресс-къулыкъу къызэритыгъэмкIэ, мэшIошхохэр зыгъэкIосэрэ хэушъхьафыкIыгъэ отрядым хэтхэр псынкIэу ыкIи зэдиштэу зэрэзекIуагъэхэм ишIуагъэкIэ сыхьатыр 11.55-м ехъулIэу тхьамыкIагъор дагъэзыжьыгъ. Квадратнэ метрэ 50 фэдизэу машIом зыкъыштагъ.
Iофтхьабзэм нэбгыри 8 ыкIи хэушъхьафыкIыгъэ техники 2 хэлэжьагъэх.
ГъэIорышIапIэм республикэм щыпсэухэрэм агу къегъэкIыжьы сакъыныгъэ ахэлъэу машIом дэзекIонхэу. Хъугъэ-шIагъэ къэхъумэ телефонхэу 101-мкIэ е 112-мкIэ макъэ къарагъэIунэу.
ИлъэсыкIэм ипэгъокIэу
Зэнэкъокъоу «Арт-елка – 2021» зыфиIорэм хэлажьэ зышIоигъохэм язаявкэхэм яштэн Адыгеим икъэлэ гупчэ щырагъэжьагъ. Мы илъэсым шэкIогъум и 30-м нэс электроннэ почтэу artelka@yandex.ru-м ахэр рагъэхьынхэ алъэкIыщт. Елкэр зэрашIырэр ыкIи хьазыр хъугъэ IофшIагъэм ясурэтхэр ащ рагъэгъусэнхэ фае.
Хабзэ зэрэхъугъэу, материал зэфэшъхьафхэм елкэр ахашIыкIын алъэкIыщт — творческэ гупшысакIэу авторым иIэм зэкIэри елъытыгъ. Зэнэкъокъум хэлэжьэнхэ фитхэр еджапIэм чIэмыхьэгъэ ыкIи ащ щеджэхэрэ кIэлэцIыкIухэр арых.
Коронавирусым ыпкъ къикIыкIэ мы илъэсым а зэнэкъокъур нэмыкI шIыкIэм тетэу рекIокIыщт: апэрэ едзыгъом — IофшIагъэу къырагъэхьыгъэхэм анахь дэгъухэр жюрим къахихыщтых. Ахэр кIэух едзыгъом хэхьанхэшъ, Iудзыгъэ шIыкIэм тетэу къэгъэлъэгъоныр зэхащэщт ыкIи онлайн амалкIэ макъэхэр атыщтых.
2020-рэ илъэсым тыгъэгъазэм и 10-м къыщегъэжьагъэу 2021-рэ илъэсым щылэ мазэм и 8-м нэс Мыекъопэ къэлэ администрацием культурэмкIэ и ГъэIорышIапIэ иофициальнэ нэкIубгъоу instagram @kultura_maykop зыфиIорэм мэкъэ тынэу щыкIощтым зэнэкъокъум текIоныгъэ къыщыдэзыхыщтыр къыгъэлъэгъощт.
СПИД-р къямыузыным фэIорышIэщт
Тыгъэгъазэм и 1-м СПИД-м пэуцужьыгъэным и Дунэе мафэ хагъэунэфыкIы. Ащ ипэгъокIэу мазэм къыкIоцI Iофтхьэбзэ зэфэшъхьафхэр республикэм щызэхащэщтых. Мыр къызэузыхэрэм япчъагъэ нахь макIэ шIыгъэным ахэр фэIорышIэщтых.
1988-рэ илъэсым псауныгъэр къэухъумэгъэнымкIэ Дунэе организацием мы мафэр ыгъэнэфагъ. Илъэс 32-рэ тешIагъ нахь мышIэми, Iэзэгъу зэфэшъхьафхэри къыфагъотыгъэхэми, дунэе мэхьанэ зиIэ узым изыушъомбгъун къыщыкIэрэп.
Псауныгъэр къэухъумэгъэнымкIэ Дунэе организацием (ВОЗ-м) къызэритырэмкIэ, 2019-рэ илъэсым икIэух ехъулIэу дунаим щыпсэурэ миллион 38-м ехъурэмэ ВИЧ-р яIэу агъэунэфыгъ, а зы илъэсым нэбгырэ миллион 1,7-мэ къахагъэщыгъ. Мыр къызежьагъэм къыщегъэжьагъэу дунаим тет нэбгырэ миллион 32-мэ ядунай ахъожьыгъ.
Адыгэ Республикэм ишъолъыр пштэмэ, мы лъэныкъомкIэ Iофым изытет уигъэгумэкIынэу щыт. 2020-рэ илъэсым иапэрэ мэзих мы узыр нэбгырэ 1299-мэ къахагъэщыгъ. ВИЧ-инфекциер зиIэу атхыгъэхэм япроцент 26,9-р лIагъэ (2019-рэ илъэсым — нэбгырэ 15).
ПэшIорыгъэшъ Iофтхьабзэхэр окIофэхэ шIоигъоныгъэ зиIэхэм ыпкIэ хэмылъэу, шъэфэу тест уплъэкIунхэр акIун алъэкIыщт. СПИД-м пэуцужьыгъэнымкIэ Гупчэу ур. Краснооктябрьскэм иунэу N 43-м тетым рагъэблагъэх.
Псауныгъэр цIыфым иIэ пстэуми анахь лъапI. Арышъ, узхэр къыпымыхьанхэм пае нэбгырэ пэпчъ ащ ешIушIэн, фэсакъын фае.
НэкIубгъор къэзыгъэхьазырыгъэр Iэшъынэ Сусан.