Урысые политическэ партиеу «Единая Россия» зыфиIо­рэм и Генсовет исекретарэу Андрей Турчак видеоконференцие шIыкIэм тетэу шъолъыр къутамэхэм джырэблагъэ адыриIэгъэ зэIукIэгъум къызэрэщиIуагъэмкIэ, медицинэм иIофышIэхэм социальнэ фэгъэкIотэнхэр яIэхэу таксикIэ зекIонхэ алъэкIынэу шIыгъэным кIэщакIо фэхъугъэх.

— Врачхэр цIыфхэм адеIэх, арышъ, ежьхэми IэпыIэгъу яттын фае, — ыIуагъ ащ.

Ащ ыпэкIэ, шэкIогъум и 18-м, УФ-м и Президентэу Владимир Путиным Правительствэм дишIыгъэ зэхэсыгъом зэпахырэ узым дунаир зыщызэлъикIугъэм илъэхъан цIыфхэм медицинэ Iэпы­Iэгъу ятыгъэным ылъэныкъокIэ шъо­лъыр­хэм Iофыгъоу къафыкъокIыхэрэр дэгъэзыжьыгъэнхэр шIокI зимыIэу зэ­рэщытыр къыщиIуагъ. Iофыгъохэм язэшIохын охътабэ тырагъэкIуадэ, хэукъо­ныгъэхэр хашIыхьэхэ зэрэмыхъущтым къыкIигъэтхъыгъ, пшъэрылъ гъэнэфагъэ­хэр къышIыгъэх. Ахэм ащыщхэм ягъэцэкIэн «Единэ Россием» зыфигъэзагъ.

Ащ и Генсовет исекретарь къызэриIуагъэмкIэ, УФ-м и Правительствэ, министерствэхэр, сотовэ операторышхохэр, бизнесым пылъхэр упчIэжьэгъу ашIызэ хэкIыпIэхэр къыхахыгъэх. Ащ тетэу коронавирусыр къызэолIагъэхэм зыщяIазэхэрэ госпитальхэм ыкIи волонтерхэм ягупчэхэм цIыфхэм ыпкIэ хэмылъэу атеонхэ амал яIэнэу УФ-м цифрэмкIэ, зэпхыныгъэмкIэ ыкIи коммуникацие жъугъэмкIэ и Министерствэрэ операторхэмрэ зэзэгъыныгъэхэр адашIыгъэх. Госпитальхэмрэ гупчэхэмрэ ятелефонхэм яспискэ изэхэгъэуцон рагъэжьагъ.

Джащ фэдэу телефонэу «112-мкIэ» оперативнэ къулыкъухэм зэкIэми укъы­зэряджэрэм исистемэ субъект 30-мэ ащагъэпсыным пае ахъщэ афэтIупщыгъэнэу партием предложение къыхьыгъ. 2021-рэ илъэсым ыкIэм нэс ар зэкIэмэ яIэн фае.

Шъугу къэдгъэкIыжьын, «Единэ Росси­ем» шъолъыр 85-мэ волонтерхэм ягуп­чэхэр ащигъэпсыгъэх. Апэрэр 2020-рэ илъэсым гъэтхапэм и 19-м къалэу Калу­гэ къыщызэIуихыгъ. Ащ къыщегъэ­жьагъэу гъомылапхъэхэр, Iэзэгъу уцхэр, вирусым ущызыухъумэрэ пкъыгъохэр зыIэкIагъэ­хьагъэхэр нэбгырэ минишъэ пчъагъэ мэхъу. Ащ имызакъоу, сомэ миллион 500-м ехъу взносэу е шIушIэ IэпыIэгъоу партием къыугъоии, коронавирусым анахьэу иягъэ зэригъэкIыгъэ субъектхэм IэпыIэгъу аритыгъ. А ахъщэм­кIэ медицинэм иIофышIэхэр вирусым щызыухъу­мэщт шъошэ мини 10-м ехъу, реанимобили 10 къащэфыгъ, сымэджэщхэм автомобиль псынкIэ 200 афатIупщыгъ.

— Нэжъ-Iужъхэм ыкIи ипсауныгъэ изытеткIэ зекIоныр къызфэкъинхэм IэпыIэгъу афэхъугъэным пае волонтер штабэу Адыгеим щагъэпсыгъэм иIоф­шIэн, зэпстэумэ афэдэу, гъэтхэпэ мазэм ригъэжьагъ, — къыIуагъ Урысые общественнэ организациеу «Единэ Россием иныбжьыкIэ гвардие» и Адыгэ шъолъыр къутамэ ипащэу, партием ипроектэу «Тинахьыжъхэр» зыфиIорэм АдыгеимкIэ икоординаторэу Бэрзэдж Асыет. — Зы мафи ащ иIофшIэн зэпыугъэп. АР-м и ЛIышъхьэу, партием и Адыгэ шъолъыр къутамэ исекретарэу КъумпIыл Мурат икIэщакIоу, тинахьыжъхэм гъогогъуищрэ шIушIэ IэпыIэгъу афэкIуагъ. Джырэблагъэ, лъэпкъ зыкIыныгъэм и Мафэ ипэгъо­кIэу, заом хэлэжьагъэхэм джыри зэ ащ фэдэ IэпыIэгъу ятыгъэ хъугъэ. Мэлылъфэгъу мазэм госпиталым Iоф щызышIэхэрэм «Единэ Россием» автомобиль псынкIэ афищэфыгъ. Нэужым, мэкъуогъу мазэм, партием иахъщэкIэ къыщэфыгъэу КъумпIыл Мурат IэпыIэгъу псынкIэм реанимобиль ритыгъ. Партием хэт депутатхэр республикэм щыпсэухэрэм, медицинэм иIофышIэхэм мызэу, мытIоу адеIагъэх. АР-м и Парламент хэтхэм сомэ миллионитIум ехъу къаугъоии, медицинэ оборудование, вирусым ущызыухъумэрэ пкъыгъохэр, гъомылапхъэхэр къащэфыгъэх.