«ЭкоЦентрэм» къеты
ЦIыфхэм сыдигъокIи зэпхыныгъэ адытиI
Уиунэ уисэу фэIо-фашIэу уищыкIагъэхэм ащыщыбэхэр къызIэкIэбгъэхьанхэмкIэ амалыбэ щыIэныгъэм къеты. КоронавирусыкIэу дунаир зэлъызыкIугъэм илъэхъан ахэм ягъо дэдэу щыт. Пыдзэфэ пытэхэм ядэщын фэгъэзэгъэ шъолъыр операторыми ахэр ыгъэфедэхи, пэIудзыгъэ шIыкIэм тетэу цIыфхэм зэпхыныгъэ адыриIэнэу ыгъэпсыгъ.
Мы мафэхэм «ЭкоЦентрэм» телефонымкIэ зыфэбгъэзэн плъэкIыщт, электроннэ почтэмкIэ уфэтхэнэу амал щыI, интернет нэкIубгъор бгъэфедэми хъущт. Мары номерэу узэрэтеощтхэр: 8-8772-57-64-82 (къалэу Мыекъуапэ), 8-962-868-12-29 (поселкэу Яблоновскэр). Электроннэ почтэу узэрэтхэщтым иадрес: adg_ecocentr@clean-rf.ru. Интернет нэкIубгъур: https//adygeya.clean-rf.ru.
Джащ фэдэу «линие плъырым» ителефонкIэ утеон плъэкIыщт: 8-800-707-05-8. Колл-гупчэм пчэдыжьым сыхьатыр 7-м къыщегъэжьагъэу пчыхьэм 8-м нэс Iоф ешIэ, гъэпсэфыгъо мафэ иIэп.
Комиссиер хамыубытыкIэу…
Зэпахырэ узым ыпкъ къикIыкIэ хэкIыр зэрэIуащырэм ыуаси «ЭкоЦентрэм» иофисхэм ащаштэрэп. НэмыкI организациеу а фэIо-фашIэр зыгъэцакIэхэрэм ащыщхэм комиссие пIахыщт.
Ащ фэдэ ахъщэ тедзэ имыщыкIагъэу «Урысыем ипочтэ» ыкIи ООО-у «МадиКом» зыфиIорэм якассэхэм ащыптын плъэкIыщт, ау ащи непэ щынагъо хэлъ, коронавирусым зызэриушъомбгъурэр къыдэплъытэн фае. Зэпстэумэ анахь Iэрыфэгъур телефон приложениеу «Сбербанк-онлайн» зыфиIорэр ары. Уиунэ уикIыщтэп, комиссии хаубытыкIыщтэп. Ащ пае хэкIыр зэрэIуащырэм ыуасэ зэрыт квитанциеу къахьыгъэм щыгъэнэфэгъэ QR-кодыр бгъэфедэн плъэкIыщт, уиунэе счет иномерэу итымкIэ птыми хъущт. «Автоплатеж» зыфиIорэ фэIо-фашIэр уиIэмэ, ахъщэр мазэ къэс хаубытыкIыщт. «Сбербанкым» ибанкоматхэми комиссиер хаубытыкIырэп.
ХэкIыр зэхэудзымэ
ЦIыфым, гурытымкIэ лъытагъэу, килограмм 450-рэ илъэсым хэкIэу къырехы. ГущыIэм пае, илъэс 70-рэ къыгъэшIагъэмэ, тонн 35-рэ фэдиз итэкъупIэм егъакIо. ХэкIыр зэхэбдзынэу зебгъасэмэ, а пчъагъэхэр нахь макIэ хъущт.
Ар тэ къызэрэтшIомышIэу къызэрыкIоу щыт. Пластикым хэшIыкIыгъэхэм къащебгъэжьэщт. Псы, щэ, дагъэ, кефир, йогурт, нэмыкI шъонхэр, химие зыхэлъэу унагъом щагъэфедэхэрэр зэрытыгъэ бэшэрэбхэр хэушъхьафыкIыгъэу къипхынхэшъ, ащ фэдэмэ апае къагъэуцугъэ контейнерхэм арыптэкъощтых. Ахэр ятеплъэкIэ адрэхэм къахэщых, ахэбгъэкIокIэнхэу щытэп.
Шъолъыр операторым пластикыр хэкIитэкъупIэм ыщэрэп. ЫпэрапшIэу ар зэхадзыжьы, нэужым мыщ фэдэ материалхэм пкъыгъохэр ахэзышIыкIырэ хъызмэтшIапIэм ещэ.
Шъугу къэтэгъэкIыжьы, хэкIым идэщын фэгъэхьыгъэ упчIэ зиIэр мы телефонхэмкIэ къытеон ылъэкIыщт: 8-800-707-05-8, 8-8772-21-06-00, 8-962-868-14-62. ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.
НэкIубгъор зыгъэхьазырыгъэр Хъут Нэфэсэт.