Адыгеим и ЛIышъхьэу КъумпIыл Мурат коронавирусым пэуцужьыгъэнымкIэ Адыгэ Республикэм и Оперативнэ штаб изэхэсыгъо тыгъуасэ зэрищагъ.

Санитар-эпидемиологие Iофхэм язытет зэхэсыгъом щытегущыIагъэх. Роспотребнадзорым Адыгэ Рес­публикэмкIэ и ГъэIоры­шIа­пIэ ипащэу Сергей Зав­городнемрэ респуб­ликэм псауныгъэр къэу­хъумэгъэнымкIэ иминист­рэу Мэрэтыкъо Рустемрэ ащкIэ къэгущыIагъэх.

Зэхэсыгъом зэрэщы­хагъэунэфыкIыгъэмкIэ, республикэм Iофхэр щы­хьылъэх, пневмониемрэ коронавирусымрэ къызэуталIэхэрэм япчъагъэ хэ­хъо. Медицинэ IофышIэхэми, лабораториехэми яIофшIэн къыхэхъо. Ащ епхыгъэу къэлэ сымэ­джэщым лабораториякIэ щылэ мазэм къыщызэIуа­хынэу рахъухьэ. Федеральнэ гупчэм имылъкукIэ оборудование къащэфыщт. Компьютернэ томографитIуи къызIэкIа­гъэхьанэу щыт. Мыекъуапэ иполиклиникэу Чкаловым иурам тетымрэ Кощ­хьэблэ район сымэджэщымрэ ахэр ачIагъэуцощтых.

Урысыем и Роспотребнадзор иунэшъуакIэ къыдалъытэным мэхьанэшхо зэриIэр, ПЦР-анализхэмкIэ кIэуххэм яхьылIэгъэ къэбархэр сыхьат 48-м къыкIоцI цIыфхэм аIэкIагъэхьажьын зэрэфаер КъумпIыл Мурат зэхэсыгъом къыщиIуагъ. Анализ­хэр лабораторием IэкIэгъэхьэгъэнхэмкIэ джыдэ­дэм республикэм Iофхэр зыпкъ щырагъэуцох. ЦIыф­хэм макъэ ягъэIужьыгъэным волонтер 25-рэ къы­хэлэжьэщт, поликлини­кэ­хэм аIут медицинэ Iофы­шIэхэр сымаджэхэм зэралъыIэсыщтхэ транспорти 100 фэдиз къызфа­гъэфедэщт.

«Амбулаторнэу зэряIа­зэ­хэрэм хэбзэ икъу хэлъхьэгъэн, сымаджэхэр гъо­гоу къызэращэщтхэм нахь икъоу дегупшысэнхэ фае. Амбулаторнэ сымаджэхэм ящыкIэгъэ медицинэ IэпыIэгъур ара­гъэ­гъоты. Псауныгъэр къэу­хъумэгъэнымкIэ Минис­терствэм пшъэрылъ фэ­сэшIы амбулаторнэ сымаджэхэм аIукIэн фэе Iэзэгъу уцхэр зэрагощырэм пхъашэу гъунэ лъифынэу. Ахэм ащыкIэхэ аптекэхэм лъапIэу ащащэ хъущтэп», — хигъэунэ­фыкIыгъ КъумпIыл Мурат.

Шэпхъэ гъэнэфагъэхэр къызэрэдалъытэхэрэм гъунэ зэрэлъафыщтыгъэ уплъэкIунхэр лъыгъэкIо­тэгъэнхэ фаеу Адыгеим и ЛIышъхьэ къыIуагъ. Гъэ­сэныгъэ языгъэгъотырэ организациехэм нахь ма­кIэу ащысымэджэнхэм, гурыт еджапIэхэм дезинфекцие зэрашIырэ амал­хэр ягъэгъотыгъэнхэм япхыгъэ пшъэрылъхэри афишIыгъэх.

«Коронавирусыр нахь макIэу къяутэлIэнымкIэ амал икъухэр зехьэгъэнхэ фае. Зэпахырэ узыр къапымыпкIэнымкIэ пэшIорыгъэшъ Iофтхьабзэхэр зешъухьэх, нэгуи­хъо­хэр жъугъэфедэх», — къы­хигъэщыгъ КъумпIыл Мурат.

Адыгеим и ЛIышъхьэ ведомствэхэмрэ муниципалитетхэмрэ япащэхэм пшъэрылъ афишIыгъ зэ­лъыIэсыкIэ амалхэр зэкIэ, социальнэ хъытыухэри ахэм зэрахэтхэу, нахь ча­нэу къызфагъэфедэнхэу, Оперативнэ штабым иунашъохэр зэрагъэцакIэ­хэрэм пхъашэу гъунэ лъафынэу.

Адыгэ Республикэм и ЛIышъхьэ ипресс-къулыкъу