Iофтхьабзэхэр игъом зэшIохыгъэнхэ фае
Адыгеим и ЛIышъхьэу КъумпIыл Мурат Адыгэ Республикэм иминистрэхэм я Кабинет хэтхэм, муниципальнэ образованиехэмрэ къэлэ койхэмрэ япащэхэм видеоконференцие шIыкIэм тетэу зэхэсыгъо тыгъуасэ адыриIагъ.
Лъэпкъ проектхэмрэ шъолъыр программэхэмрэ зэрагъэцакIэхэрэм япхыгъэ Iофыгъохэм зэхэсыгъом щатегущыIагъэх. Адыгэ Республикэм и Премьер-министрэу Геннадий Митрофановым къызэрэхигъэщыгъэмкIэ, лъэпкъ проектхэмкIэ контрактациер процент 95-м ехъугъ.
Республикэм и ЛIышъхьэ зэхэсыгъом къызэрэщиIуагъэмкIэ, псауныгъэм икъэухъумэнкIэ, псэупIэхэм япхыгъэ программэхэмкIэ Iофтхьэбзэ заулэмэ лъэшэу анаIэ атегъэтыгъэн, социальнэ псэолъэ заулэхэм яшIынкIэ лимитхэм ягъэфедэн агъэпсынкIэн фае.
«Финанс илъэсыр ыкIэм фэкIо. Бюджет мылъкур амал зэриIэкIэ нахь шIуагъэ къытэу гъэфедэгъэн, Iофтхьабзэу рахъухьагъэхэр игъом зэшIохыгъэнхэ фае. А пшъэрылъыр муниципальнэ образованиехэми къэлэ псэупIэхэми япащэхэм афэгъэхьыгъ, пшъэрылъхэр зэкIэ игъом агъэцэкIэнхэ фае», — къыIуагъ КъумпIыл Мурат.
Лъэпкъ, шъолъыр проектхэм ягъэцэкIэн фэгъэзэгъэ министрэхэм зэхэсыгъом отчетхэр къыщашIыгъэх. Муниципалитетхэм яадминистрациехэм япащэхэм ядокладхэм ядэIугъэх. Зэхэсыгъом зэрэщыхагъэунэфыкIыгъэмкIэ, Адыгеим социальнэ-экономикэ хэхъоныгъэ зэришIыщт унэе программэр процент 61-кIэ агъэцэкIагъ. Адыгэ Республикэм и Премьер-министрэ къызэрэхигъэщыгъэмкIэ, мыгъэ зэрахьанэу щыт IофтхьабзэхэмкIэ мылъкоу къыхагъэкIыгъэр тыгъэгъазэм и 20-м нэс къызфагъэфедэн фае.
Республикэм и ЛIышъхьэ джащ фэдэу агу къыгъэкIыжьыгъ Урысые политикэ партиеу «Единэ Россием» и Адыгэ шъолъыр къутамэ хьафизэхэм я Адыгэ республикэ библиотекэ компьютернэ техникэ фэщэфыгъэнэу пшъэрылъ зэрафишIыгъэр. Партием ишъолъыр къутамэ игъэцэкIэкIо комитет ипащэ къызэриIуагъэмкIэ, мы лъэныкъомкIэ Iоф гъэнэфагъэхэр зэрахьэх.
Адыгэ Республикэм ивице-премьерэу Наталья Широковам зэхэсыгъом къызэрэщиIуагъэмкIэ, Урысыем и Президент ипшъэрылъ гъэцэкIэгъэным тегъэпсыхьагъэу медицинэ кадрэхэр амбулаториехэм ащылэжьэнхэм, медицинэ IэпыIэгъу псынкIэ ягъэгъотыгъэным япхыгъэ республикэ законопроектыр къагъэхьазырыгъ.
Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец къафиIотагъ Урысыем и Президент и Указ къыдыхэлъытагъэу шъолъырыр зэрагъэIорышIэщт Гупчэмрэ Ситуационнэ гупчэмрэ Адыгеим зэрэщагъэпсырэм фэгъэхьыгъэу. Мы гупчэхэм шъолъырым социальнэ-экономикэ хэхъоныгъэу ышIыхэрэмкIэ къэбархэмрэ цIыфхэм ятхьаусыхэхэмрэ ащызэхафыщтых. Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, министерствэхэмрэ псэупIэхэм япащэхэмрэ лъэпкъ проектхэм, шъолъыр программэхэм къащыдэлъытэгъэ лъэныкъо пстэухэмкIи зэдэлэжьэныгъэ дэгъу зэдыряIэн фае.
«Псауныгъэм икъэухъумэнкIэ, гъэсэныгъэмкIэ, псэупIэхэм яшIынкIэ проектхэм цIыфхэм ящыIэкIэ-псэукIэ зыкъырагъэIэтын фае. Уахътэм ыпэ титэу Iоф тшIэн, цIыфхэм апашъхьэ къиуцорэ Iофыгъохэр псынкIэу зэшIотхынхэ фае», — хигъэунэфыкIыгъ КъумпIыл Мурат.
Адыгэ Республикэм и ЛIышъхьэ ипресс-къулыкъу