ШэкIогъум и 22-м Адыгеим апэрэ осэу къыщесыгъэм гумэкIыгъо гъэнэфагъэхэр къыздихьыгъэх.

Мыекъуапэ ичIыпIэхэм ащыщ­хэм электроэнергием икъэтын зэпыугъохэр фэхъугъэх. Ахэм ядэгъэзыжьын энергетикхэм етIупщыгъэу Iоф дашIагъ. Джащ фэдэу, гъогухэм къатехъорэ те­щтыкIыгъэхэр ыкIи осыр хэу­шъхьафыкIыгъэ техникэмкIэ агъэкъэбзагъэх.

— Ащ фэдэ гумэкIыгъо ана­хьэу хэфагъэр къутырэу Га­вердовскэр ары. Жьым хэт рыкIуапIэу ВЛ-10кВ-р зэрэзэпытхъыгъэм къыхэкIыкIэ сыхьат пчъагъэхэм къакIоцI цIыфхэм электроэнергиер аIэкIэхьагъэп. Джащ фэдэу, ДНТ-у «Звездам», поселкэу Западнэм, дачэхэу «Звездочка», «Строитель» зыфиIохэрэм электроэнергиер яIагъэп, — къытыгъ Мыекъопэ ТЭЦ-м ипресс-къулыкъу.

ООО-у «Мыекъопэ электрическэ сетьхэр» зыфиIорэм ибригадэхэм ыкIи ихэушъхьафыкIыгъэ техникэм гъэлъэшыгъэ шIыкIэм тетэу Iоф ашIагъ.

Ом изытет къызэрэзэIыхьагъэм къыхэкIэу Мыекъуапэ иурамхэр агъэкъэбзэнхэу техникэ 19 къыдэкIыгъэх. Общественнэ транспортыр зэрыкIорэ урамхэм анахьэу анаIэ тырагъэтыгъ. Фэтэрыбэу зэхэт унэхэм къапыщылъхэр игъом агъэкъэбзэнхэу ащ фэгъэзэгъэ гъэIорышIэкIо организацие­хэм, псэупIэ-псэолъэшI кооперативхэм, ТСЖ-хэм афа­гъэпытагъ.