Адыгеим социальнэ-экономикэ хэхъоныгъэ ышIыным фытегъэпсыхьэгъэ унэе программэм игъэцэкIэн мы илъэсым рагъэжьагъ. Непэрэ ма­фэм ехъулIэу мы лъэныкъомкIэ шъолъырым ипащэхэм зэшIуахыгъэр макIэп, ау агъэцэкIэнэу, пшъэрылъэу зыфагъэуцужьырэр джыри бэ.

АР-м и ЛIышъхьэу КъумпIыл Мурат анахьэу ынаIэ зыты­ри­гъэтырэр республикэм щыпсэу­хэрэм ящыIэкIэ-псэукIэ нахьышIу шIыгъэныр, ахэр социальнэу ухъумэгъэнхэр ары. Ащ фы­тегъэпсыхьэгъэ IофшIэнышхо республикэм щагъэцакIэ.

ЫпшъэкIэ зигугъу къэтшIыгъэ программэм ипроектыкIэхэм ащыщ псыхъоу Шъхьэгуащэ иджабгъу ыкIи сэмэгу нэпкъхэм ягъэпытэн тегъэпсыхьэгъэ Iоф­тхьабзэхэр зехьэгъэнхэр. Рес­публикэм ипащэ пшъэрылъэу афишIыгъэм диштэу мы проектыр гъэцэкIэгъэным изыфэгъэ­хьазырын рагъэжьагъ. Адыгеим иминистрэхэм я Кабинет, Мыекъуапэ иадминистрацие, «Стройзаказчикым» ялIыкIохэр зыхэлэжьэгъэхэ зэхэсыгъоу мы мафэхэм щыIагъэм мы Iофыгъом щытегущыIагъэх, ана­хьэу анаIэ зытырагъэтыщт лъэ­ныкъохэр агъэнэфагъэх.

— Унэе программэм диштэу, федеральнэ гупчэр IэпыIэгъу къытфэхъузэ, шъолъырымкIэ мэ­хьанэшхо зиIэ пшъэрылъхэм язэшIохын мыгъэ тыфежьагъ. Ахэм зэу ащыщ къэлэ паркым дэжь псыхъоу Шъхьэгуащэ инэпкъхэр щыгъэпытэгъэнхэмкIэ Iофтхьэбзэ гъэнэфагъэхэр зехьэгъэнхэр. Мэхьанэшхо зиIэ мы проектым ипхырыщынкIэ программэм къытитырэ амалхэр зэрифэшъуашэу дгъэфедэнхэ фае, — къыIуагъ КъумпIыл Мурат.

Къэлэ паркым дэжь Шъхьэгуащэ инэпкъхэр зэрэщагъэпытэщтхэм къыхэкIэу респуб­ликэм ипащэ пшъэрылъ афи­шIыгъ анахьэу ащ къекIущт про­ектыр къыхахынэу, мыщ пхырыкIырэ лъэс гъогухэр нахь зэтырагъэпсыхьанхэу. Инже­нернэ псэуалъэхэр зэрагъэ­псыщт­хэм дакIоу, цIыфхэм къыз­щакIухьан, зызщагъэпсэ- фын алъэкIыщт чIыпIэм хэгъэ­хъогъэн фаеу ылъытагъ. Мыщ дэжьым цIыфхэм яшIоигъоныгъэхэр къыдэлъытэгъэнхэм мэ­хьанэшхо иIэу АР-м и ЛIышъхьэ хигъэунэфыкIыгъ.

Непэрэ мафэм ехъулIэу проектым ипроект-сметэ доку­ментациер агъэхьазырыгъах. Псыхъо нэпкъэу агъэпытэщтыр километри 2,56-рэ мэхъу, илъэ­гагъэ метри 2,5-м щегъэжьагъэу 8-м нэсыщт. Джащ фэдэу Шъхьэгуащэ инэпкъ Iушъохэр нахь зэтырагъэпсыхьанхэ гу­хэлъ яI. Ащ сомэ миллион 405-м ехъу пэIуагъэхьанэу агъэнафэ. Проектым диштэу къэлэ паркым итеплъэ хэпшIыкIэу нахь дахэ хъущт, ащ изэтегъэпсыхьан екIолIэкIэ зэфэшъхьафхэр къыфагъотыщтых. Лъэс гъогухэр, кушъхьэфачъэхэм атесхэм ате­гъэпсыхьэгъэ гъогухэр, аттракционхэр, кIэлэцIыкIу ыкIи спорт площадкэхэр, нэмыкI псэуалъэ­хэр паркым къыдэуцощтых, ахэм паркыр къагъэкIэрэкIэщт.

ЦIыфхэм ящынэгъончъагъэ анаIэ тырагъэтыныр, джырэ шапхъэхэм адиштэрэ къэзыгъэ­нэфырэ ыкIи видеолъыплъэн пкъыгъохэр агъэуцунхэр пшъэ­рылъ шъхьаIэу АР-м и ЛIышъхьэ къыгъэуцугъ. Джащ фэдэу паркым чъыгхэр, куандэхэр, къэгъагъэхэр щагъэтIысынхэм мэ­хьанэшхо иIэу ылъытагъ.

ЗэрагъэнэфагъэмкIэ, 2021 — 2022-рэ илъэсхэм проектыр агъэцэкIэн фае. ЫпшъэкIэ къы­зэрэтIуагъэу, проектыр зэшIо­хыгъэ зыхъукIэ, къэлэ паркым итеплъэ нахь дахэ хъущт.

— Тыкъэзыуцухьэрэ чIыопсым амал къытеты къэлэ паркымрэ «Мэздахэм» къыпэIулъ чIыпIэм­рэ зэзыпхыщтхэ псэуалъэ Мые­къуапэ щыдгъэпсынэу. АщкIэ амалэу тиIэхэр тэрэзэу къыз­фэдгъэфедэнхэ фае, — къы-Iуагъ КъумпIыл Мурат.

Мы аужырэ илъэсхэм Мые­къуапэ итеплъэ бэкIэ нахь дахэ зэрэхъугъэр къэлэдэсхэм ямызакъоу, хьакIэхэми хагъэунэфыкIы. ПсэолъакIэхэр къыдэуцох, щыIэхэр агъэцэкIэжьых ыкIи агъэкIэжьых. А пстэури цIыфхэм алъэгъу, республикэм ипащэхэм мы лъэныкъомкIэ Iофэу ашIэрэм осэшIу фашIы. Къэлэ гупчэ паркыр зэрэзэтырагъэпсыхьащтым, Шъхьэгуащэ инэпкъхэр зэрагъэпытэщтым икъэбар цIыфхэр ыгъэгушIуа­гъэх, ащ къыраIолIагъэри бэ.

Сусана, Мыекъуапэ щэпсэу

— Шъхьэгуащэ инэпкъхэр зэрагъэпытэщтхэм дакIоу, паркым итеплъэ зэхъокIыныгъэшIухэр фашIынхэ гухэлъ зэрэщыIэм лъэшэу тигъэгушIуагъ. Мы чIыпIэр цIыф кIуапIэу щыт, арышъ, ар зэрэзэтегъэпсыхьагъэр типащэхэм ямызакъоу, тэ мыщ щыпсэухэрэми, тынап.

Александр, илъэс 36-рэ ыныбжь

— Унэе программэм къыдыхэлъытэгъэ проектыкIэр щы­Iэныгъэм щыпхырыщыгъэным сыд фэдэрэ лъэныкъокIи мэхьанэшхо иI. Федеральнэ гупчэм къытIупщырэ мылъкур шIуагъэ къытэу гъэфедэгъэным республикэм ипащэ мэхьанэшхо реты. АщкIэ зэфэхьысыжь дэгъухэри тиIэх, Мыекъуапэ имызакъоу, шъолъырым имуниципальнэ об­разованиехэм зэкIэми соци­альнэ мэхьанэ зиIэ псэолъа­кIэхэр къадэуцох, гъогухэр агъэ­цэкIэжьых. Къэлэ паркыр непи зэтегъэпсыхьагъ, ау проектыкIэр гъэцэкIагъэ зыхъукIэ, ащ итеплъэ дэхэ дэдэ хъущт.

Аслъан, Красногвардейскэ районым щэпсэу

— Шъхьэгуащэ инэпкъхэр загъэпытэхэкIэ ащ итеплъэ зыфэдэщтыр, къэлэ паркыр зызэтырагъэпсыхьэкIэ нахь кIэракIэ зэрэхъущтыр къизы­IотыкIырэ, къэзыгъэлъэгъорэ сурэтхэр сайт зэфэшъхьафхэм къарыхьагъэх. Проектыр гъэшIэгъон дэд ыкIи МыекъуапэкIэ мэхьанэшхо зиIэу щыт. Тиреспубликэ, тикъэлэ шъхьаIэ зэзгъэлъэгъунэу къэкIорэ хьа­кIэхэм, зекIохэм тичIыопс ибаи­ныгъэ, тичIыпIэхэр зэрэдахэхэр, зэрэкъабзэхэр бэрэ къыха­гъэщы. Пащэхэм гухэлъэу яIэр пхырыщыгъэ зыхъукIэ, паркыр, ащ къыпэIулъхэр джыри нахь кIэракIэ ыкIи гуIэтыпIэ хъущтых.

Зыгъэхьазырыгъэр ТХЬАРКЪОХЪО Адам.